KILESO 08

Nge lenda kuma ndiku ya Yehova

KUWA NA

Yehova me zola ti nge zaba yandi mbote-mbote. Samu na yinki? Yandi zaba ti ntangu nge ke longoka bifu ya yandi ya mbote, faso ya yandi ya kutadila bamambu, mpe yina yandi zola samu na nge, nge ke zola kukuma ndiku ya yandi. Nge me ndima kwandi ti nge lenda kuma ndiku ya Nzambi? (Tanga Nkunga 25:14.) Yinki nge lenda sala samu na kukuma ndiku ya yandi? Biblia ke pesá bamvutu na byuvu yayi. Ya ke zonzá mpe samu na yinki Yehova ke ndiku ya kulutila mbote yina nge lenda kuzwa.

1. Yinki Yehova ke na lombá nge na kusala?

“Beno kwiza pene-pene na Nzambi, mpe yandi ke kwiza pene-pene na beno.” (Zaki 4:8) Yinki ya zola zonza? Yehova zola nge kuma ndiku ya yandi. Bantu ya nkaka ke kanisá ti ba lenda kuma ve bandiku ya Nzambi samu ba ke talá ve yandi. Kasi na kati ya Biblia, Yehova me zonzila nyonso yina lenda sadisa beto na kuzaba yandi, samu beto kuma pene-pene na yandi. Ntangu beto ke tangá mpe ke sadilá mambu yina ke na kati ya Biblia, kindiku ya beto na Yehova ke kula ata ti beto ke talá ve yandi.

2. Samu na yinki Yehova ke ndiku ya kulutila mbote yina nge lenda kuzwa?

Ata muntu ke zolá nge kulutila Yehova. Yandi zola ti nge vanda na kilengi, mpe nge sosa yandi sadisa nge ntangu nge ke na bamambu. Nge lenda ‘pesa manyongo nyonso ya nge na sika ya Nzambi, samu ti yandi ke sadisaka nge.’ (1 Piere 5:7) Yehova ke vandá ntangu nyonso na bandiku ya yandi samu na kusadisa bawu, kupesa bawu ngolo mpe kuwa bawu.—Tanga Nkunga 94:18, 19.

3. Yinki Yehova me zola ti bandiku ya yandi sala?

Yehova ke zolá bantu nyonso, “kasi yandi ke salá kindiku ya ngolo na bantu ya mbote.” (Bingana 3:32) Yehova zola ti bandiku ya yandi sala bangolo samu na kusala yina ke mbote na meso ya yandi. Yandi zola mpe ti, ba losa yina ke yimbi na meso ya yandi. Bantu ya nkaka ke zonzá ti ba ke lenda ve kusala nyonso yina Yehova zola ba sala. Kasi Yehova ke na ntima ya mbote. Yandi ke ndimá muntu nyonso yina zola yandi na ntima mosi mpe yina ke salá nyonso samu na kusepelisa yandi.—Nkunga 147:11; Bisalu 10:34, 35.

SOSA KUZABA MBOTE-MBOTE

Longoka mingi na faso nge lenda kuma ndiku ya Yehova, mpe tala samu na yinki yandi ke ndiku ya kulutila mbote yina nge lenda kuzwa.

4. Abrahami vandá ndiku ya Yehova

Disolo ya Abrahami (ba me bokila yandi mpe Abrami na kati ya Biblia) ke sadisá beto na kuzaba yinki beto me bonga kusala samu na kuvanda bandiku ya Nzambi, mpe bambote yina bandiku ya yandi ke zwaka. Tanga yawu na Kubanda 12:1-4. Mpe na manima beto zonzila byuvu yayi:

Yinki Yehova lombá na Abrahami na kusala?
Yinki Yehova zonzá ti yandi ke sala na Abrahami?
Na manima ya kuwa Yehova, yinki Abrahami salaka?

5. Yina Yehova me lomba na bandiku ya yandi na kusala

Beto ke na bima yina beto ke zolá ti bandiku ya beto sala.

Yinki nge ke zolá ti bandiku ya nge sala samu na nge?

Tanga 1 Yoane 5:3, mpe na manima beto zonzila kyuvu yayi:

Yinki Yehova ke zolá ti bandiku ya yandi sala?

Samu na kutumama na Yehova, beto me bonga kusoba ndyatulu ya beto. Tanga Izaya 48:17, 18, mpe na manima beto zonzila kyuvu yayi:

Samu na yinki Yehova ke na lombá na bandiku ya yandi na kutumama na misiku ya yandi?

Ndiku ya mbote ke zonzilá beto mambu yina lendá bumba mpe kubongisa luzingu ya beto. Ni faso yina mpe Yehova ke salá na bandiku ya yandi

6. Mutindu Yehova ke sadisá bandiku ya yandi

Ntangu bandiku ya Yehova ke bwabaná na bamambu ya mpasi, yandi ke pesá bawu ngolo ya kukanga ntima. Yandi ke sadisaka mpe bawu na kuyidika yawu. Tala VIDEO, mpe na manima beto zonzila kyuvu yayi.

VIDEO: Yehova salá mingi samu na munu (3:20)

Wa’ faso Yehova sadisá kento yina beto me tala na video, na kunwana na makanisi ya yimbi?

Tanga Izaya 41:10, 13, mpe na manima beto zonzila byuvu yayi:

Yinki Yehova ke sala samu na bandiku ya yandi nyonso?
Nge me kanisa ti Yehova lenda vanda ndiku ya mbote samu na nge? Samu na yinki?

Bandiku ya mbote ke sadisa nge ntangu nge ke na nsatu ba sadisa nge. Ni faso yina mpe Yehova ke sadisa nge

7. Samu na kuvanda ndiku ya Yehova beto me bonga kusolola na yandi mpe kuwa yandi

Samu bundiku kuma ngolo, bandiku me bonga kusolola ntangu nyonso. Tanga Nkunga 86:6, 11, mpe na manima beto zonzila byuvu yayi:

Wa’ faso beto lenda solola na Yehova?
Wa’ faso Yehova ke sololá na beto?

Beto ke sololá na Yehova na nzila ya lusambu, yandi ke sololá na beto na nzila ya Biblia

BANTU YA NKAKA KE ZONZAKA: “Muntu lenda kuma ata fioti ve ndiku ya Nzambi.”

Wapi verse ya Biblia nge lenda sadila samu na kulakisa ti beto lenda kuma ndiku ya Yehova?

NA BUNKUFI

Yehova me zola nge kuma ndiku ya yandi mpe yandi ke sadisa nge na kusala yawu.

Mambu ya kusimba

Wa’ faso Yehova ke sadisaka bandiku ya yandi?
Samu na yinki Yehova ke lombá na bandiku ya yandi na kutumama na yandi?
Nge me kanisa ti ya ke mpasi mingi na kukuma ndiku ya Yehova? Samu na yinki nge me zonza faso yina?

Sonika kilumbu yina kileso me manisa:

Yina nge lenda sala

Zonza na ndiku ya nge mambu mosi yina nge me longoka na yina me tadila Yehova.

Mambu ya nkaka ya kusala:

Your other goal