KILESO 16

Yinki Yesu salá ntangu yandi vandaka awa na ntoto?

KUWA NA

Bantu mingi zaba Yesu, kasi mingi na kati ya bawu zaba kaka disolo ya yandi ntangu yandi butamá, to zaba kaka disolo ya lufwa ya yandi. Ba ya nkaka zaba yandi kaka mutindu muntu ya mayela to mbikudi. Kasi, kulongoka mambu ya luzingu ya Yesu ntangu yandi vandá awa na ntoto, lenda longa beto mingi na yina me tadila yandi. Na kileso yayi, beto ke zonzila ndambu ya bamambu ya mfunu yina Yesu salá, mpe yina ya ke na longá beto.

1. Wapi yina vandá kisalu ya Yesu ya kulutila mfunu?

Kisalu ya ntete ya Yesu vandá ni ya “kuzabisa [. . .] Nsangu ya Mbote ya Kimfumu ya Nzambi.” (Tanga Luke 4:43.) Yandi vandá longa bantu ti Nzambi ke tula kimfumu to luyalu ya yandi, yina ke bongisa bamambu nyonso ya yinza. a Yesu lembá ve na kusamuna nsangu ya mbote yayi, yandi salá bamvula tatu na ndambu na kusalaka yawu.—Matayi 9:35.

2. Yinki lakisá bimangu yina Yesu salaka?

Biblia ke zonzá ti “Nzambi lakisaka beno bumfumu ya yandi na kusala bimangu.” (Bisalu 2:22) Nzambi pesá Yesu ngolo ya kutwadisa bamaza, mipepe ya ngolo. Yandi pesá mpe Yesu ngolo ya kudikisa mafunda ya bantu, ya kubelusa bantu mpe ya kuvumbula bantu ya kufwa. (Matayi 8:23-27; 14:15-21; Marke 6:56; Luke 7:11-17) Bimangu yina Yesu salaka, lakisá pwelele ti ni Nzambi filisaka yandi. Ya lakisá mpe ti Yehova ke na ngolo ya kubongisa bamambu nyonso ya yinza.

3. Yinki luzingu ya Yesu lenda longa beto?

Yesu tumamá na Yehova na nyonso. (Tanga Yoane 8:29.) Yesu salá nyonso yina Tata ya yandi lombaka yandi na kusala. Yandi salaka yawu luzingu ya yandi nyonso, ata ntangu ya vandá mpasi, mpe ata tii na lufwa. Yandi lakisá mpe ti, bantu lenda vanda ya kukangama na Nzambi ata ntangu ya ke kumá mpasi na kusala yawu. Na yawu, Yesu bikilá beto “kifwanusu yina, samu ti [beto] landa nzila ya yandi.”—1 Piere 2:21.

SOSA KUZABA MBOTE-MBOTE

Tala wa’ faso Yesu vandá zonzila bantu nsangu ya mbote, mpe wapi bimangu yandi salaka.

4. Yesu vandá zonzila bantu nsangu ya mbote

Yesu tambulá mingi, samu na kuzonza nsangu ya mbote na bantu mingi. Tanga Luke 8:1, mpe na manima beto zonzila byuvu yayi:

Yesu samuná kaka ba yina vanda kwiza samu na kuwa yandi?
Wapi bangolo Yesu vandá sala samu na kusosa bantu yina ke kuwa yandi?

Nzambi zonzá ti Masiya zolá samuna nsangu ya mbote. Tanga Izaya 61:1, 2, mpe na manima beto zonzila byuvu yayi:

Wa’ faso Yesu lungisá mbikululu yayi?
Nge me kanisa ti bubu yayi bantu ke na nsatu ya kuwa nsangu ya mbote yayi?

5. Yesu longá bileso ya mfunu

Yesu suká ve kaka na kuzonzila nsangu ya kimfumu ya Nzambi, kasi yandi longá mpe bileso ya mfunu, yina lenda sadisa bantu na luzingu ya bawu. Beto tala bifwani ya yawu na mambu yina Yesu zonzá na zulu ya mongo. Tanga Matayi 6:14, 34 na 7:12, mpe na manima beto zonzila byuvu yayi:

Wapi malongi yina Yesu zonzá lenda sadisa beto?
Nge me kanisa ti malongi yayi lenda sadisa kwandi bantu bubu yayi?

6. Yesu salá bimangu

Yehova pesá Yesu ngolo ya kusala bimangu. Na kifwani, tanga Marke 5:25-34 to tala VIDEO. Mpe na manima beto zonzila byuvu yina ke landa.

VIDEO: Yesu me belusa kento mosi (5:10)

Kento yina beto me tala na video, vandá na kiminu na yinki?
Yinki me simba ntima ya nge na kimangu yayi?

Tanga Yoane 5:36, mpe na manima beto zonzila kyuvu yayi:

Bimangu ya Yesu “ke na kulakisa” yinki?

Nge me zaba yawu?

Mambu mingi yina beto me zaba na yina me tadila Yesu me katuka na: Matayi, Marke, Luke, mpe Yoane. Ba ke bokilá babuku ya Biblia 4 yayi nsangu ya mbote to ba évangiles. Bawu nyonso ke zonzilá ve bamambu ya luzingu ya Yesu faso mosi. Kasi ntangu beto ke tanga yawu, beto ke zaba mbote-mbote luzingu ya Yesu.

MATAYI

ke muntu ya ntete yina soniká ba évangiles. Yandi me zonzila beto bamambu mingi yina Yesu longá samu na kimfumu ya Nzambi.
MARKE

soniká évangile ya kulutila nkufi. Yandi soniká ve mingi, kasi beto lenda longoka mingi na kati ya yawu.
LUKE

lakisá ti lusambu vandá mfunu samu na Yesu, mpe faso Yesu vanda bakilá bakento.
YOANE

ke lakisá beto kimuntu ya Yesu, ntangu yandi ke zonzá masolo yina Yesu vandá na yawu na bandiku ya yandi mpe na bantu ya nkaka.

BANTU YA NKAKA KE ZONZAKA: “Yesu vandá kaka muntu ya mbote, kasi ve muntu yina Nzambi filisaka.”

Nge me kanisa yinki?

NA BUNKUFI

Yesu longá bantu kimfumu ya Nzambi, salá bimangu mpe tumamá na Yehova na mambu nyonso.

Mambu ya kusimba

Ntangu Yesu vandá awa na ntoto, wapi yina vandá kisalu ya yandi ya kulutila mfunu?
Yinki bimangu ya Yesu ke na lakisaka?
Wapi bileso ya mfunu yina Yesu longá lenda sadisa beto?

Sonika kilumbu yina kileso me manisa:

Yina nge lenda sala

Tala Film “ Sachez avec Certitude que Dieu l’a fait Seigneur et Christ ” (partie 2) to tanga Matayi bikapu 5 tii 7, samu na kuzaba mingi na kisalu ya Yesu ya kusamuna.

Mambu ya nkaka ya kusala:

Your other goal