KILESO 17

Wapi mutindu ya muntu Yesu kele?

KUWA NA

Kulongoka kuzaba mambu yina Yesu salá na zulu ya ntoto ke sadisa beto na kuzaba bifu ya yandi ya mbote. Ni yawu ke nata beto na kuzola Yesu, na kukuma ndiku ya yandi mpe ya Tata ya yandi Yehova. Wapi yina ke ndambu ya bifu ya mbote ya Yesu? Mpe wa’ faso beto lenda landa kifwani ya yandi?

1. Samu na yinki beto lenda zonza ti Yesu ke faso Tata ya yandi?

Yesu lutisá bamvula mingi na zulu na Tata ya yandi. Ni kuna, yandi longoká mambu mingi na yina me tadila Tata ya yandi. Mpe ni yawu salá ti, banda ntama tii bubu yayi, Yesu ke kanisá mpe ke salá bamambu kaka mutindu Yehova. (Tanga Yoane 5:19.) Yesu ke landá mbote-mbote Tata ya yandi, ni na yawu yandi zonzaka: “Muntu yina me tala munu me tala Tata.” (Yoane 14:9) Kulongoka bumuntu ya Yesu ke sadisa beto na kuzaba Yehova mbote-mbote. Na kifwani, mutindu Yesu vanda talá kyadi ya bantu, ke na lakisá faso Yehova ke talá kyadi ya nge.

2. Wa’ faso Yesu lakisá ti yandi ke zolá Yehova?

Yesu zonzá: “Samu ti bantu ya yinza zaba ti mu ke zolaka Tata, [. . .] mu ke salaka nyonso yina yandi ke tumisaka munu.” (Yoane 14:31) Ntangu Yesu vandá awa na ntoto, yandi vandá kaka ya kukangama na Tata ya yandi ata ntangu ya vandá mpasi. Samu Yesu vanda zolá Tata ya yandi mingi, yandi vanda sadisá bantu na kuzaba mpe na kukuma bandiku ya Tata ya yandi, Yehova.—Yoane 14:23.

3. Wa’ faso Yesu lakisá ti yandi ke zolá bantu?

Biblia ke lakisá ti Yesu “vandá zola mingi bantu.” (Bingana 8:31, note ya yisi ya paje) Yandi lakisaka yawu ntangu yandi vanda sadisa bantu mpe kukindisa bawu. Yandi salá ve bimangu kaka samu na kulakisa ngolo ya yandi, kasi samu yandi vandá mpe na kyadi ya bantu. (Marke 1:40-42) Yandi vanda bakila bantu nyonso mutindu mosi mpe na faso ya mbote. Malongi ya yandi vanda pesá ngolo mpe kivuvu na bantu nyonso yina vanda kuwa yandi na ntima ya mwasi. Luzolo nataka yandi na kundima kutala mpasi mpe na kufwa samu na bantu. Kasi yandi ke zolá ya kulutila ba yina ke kuwá yandi mpe ke sadilá malongi ya yandi.—Tanga Yoane 15:13, 14.

SOSA KUZABA MBOTE-MBOTE

Longoka mingi na yina me tadila bumuntu ya Yesu. Mpe tala wa’ faso nge lenda landa luzolo ya yandi mpe kifu ya yandi ya kukabulaka.

4. Luzolo ya Yesu samu na Tata ya yandi

Yesu me longa beto faso ya kulakisa luzolo ya beto samu na Yehova. Tanga Luke 6:12 na Yoane 15:10; 17:26. Na manima ya kutanga baverse yayi beto zonzila kyuvu yayi:

Mutindu Yesu, wa’ faso beto lenda lakisa ti beto ke zolá Yehova?

Yesu vanda zolá mingi Tata ya yandi, mpe vanda sololá na yandi ntangu nyonso na nzila ya lusambu

5. Faso Yesu ke tadilá bantu yina ke na nsatu ba sadisa bawu

Yesu vanda kanisá ntete na bantu ya nkaka, tekila yandi kanisa na yandi mosi. Ata ntangu yandi vandá ya kulemba, Yesu vanda sadilá ntangu mpe ngolo ya yandi samu na kusadisa bantu. Tanga Marke 6:30-44, mpe na manima beto zonzila byuvu yayi:

Na disolo yayi, wa’ faso Yesu lakisá ti yandi ke talá kyadi ya bantu?—Tala baverse 31, 34, 41, na 42.
Yinki vanda nata Yesu na kusadisa bantu?—Tala verse 34.
Kuzaba ti Yesu landá mbote-mbote bifu ya Yehova ke na longá nge yinki na yina me tadila Yehova?
Wa’ faso beto lenda lakisa ti beto ke talá kyadi ya bantu mutindu Yesu?

6. Kifu ya Yesu ya kukabula

Ata yandi vandá ve na mingi, Yesu vandá na kifu ya kukabula, mpe yandi zonzá na beto na kulanda kifwani ya yandi. Tanga Bisalu 20:35, mpe na manima beto zonzila kyuvu yayi:

Samu na Yesu, yinki ke pesá muntu kilengi?

Tala VIDEO, mpe na manima beto zonzila kyuvu yina ke landa.

VIDEO: “Kilengi ke vandá mingi na muntu yina ke kabulaka”—Ndambu (4:00)

Ata beto ke ve na mingi, wa’ faso beto lenda kabula bampangi?

Nge me zaba yawu?

Biblia ke longá beto na kusambila Yehova na nkumbu ya Yesu. (Tanga Yoane 16:23, 24.) Kusala yawu zola zonza, kuvutula Yesu matondo na yina yandi salá samu beto kuma bandiku ya Yehova.

BANTU YA NKAKA KE ZONZAKA: “Nzambi ke kipeke ve beto.”