KILESO 19
Bambangi ya Yehova kele kwandi bakristo ya tsyeleka?
Beto Bambangi ya Yehova, beto ke na kundima ti beto ke bakristo ya tsyeleka. Samu na yinki? Beto ke tala wa’ faso ya ke talaná na mambu yina beto ke kwikilá, na nkumbu yina ba me zabila beto, mpe na luzolo yina beto ke lakisá.
1. Wapi kisika ke katuká malongi ya Bambangi ya Yehova?
Yesu zonzá: “mambu ya [Nzambi] kele butsyelika.” (Yoane 17:17) Mutindu Yesu, Bambangi ya Yehova ke kwikilá kaka na mambu yina ke katuká na Biblia. Na kifwani, beto tala wa’ faso bandá disolo ya Bambangi ya Yehova ya bubu yayi. Na 1870, ndambu ya bantu yina vandá sosa kuzaba matsyeleka, bandá kulongoka mbote-mbote Biblia. Ba vanda soolá kukwikila na mambu yina ba vandá longoka na Biblia ata ti ya vandá ve faso mosi na yina mabuundu vandá longa. Mpe na manima, ba bandá kuzonzila matsyeleka yina ba vandá longoka na Biblia na bantu ya nkaka. a
2. Samu na yinki beto baká nkumbu ‘Bambangi ya Yehova’?
Yehova ke bokilá bisadi ya yandi Bambangi, samu ti ba ke zonzá matsyeleka na yina me tadila yandi. (Baebre 11:4–12:1) Na kifwani, na ntama, Nzambi zonzá na bisadi ya yandi: “Beno kele Bambangi ya munu.” (Tanga Izaya 43:10.) Ba me bokila Yesu “Mbangi ya kukwikama.” (Luzabusu 1:5) Ni na yawu, na 1931 beto baká nkumbu: Bambangi ya Yehova. Beto ke na kilengi ya kuvanda Bambangi ya Yehova.
3. Wa’ faso Bambangi ya Yehova ke landá luzolo ya Yesu?
Yesu zolá mingi bilandi ya yandi, na yawu ba kumá faso bantu ya dikanda ya yandi. (Tanga Marke 3:35.) Faso mosi mpe, Bambangi ya Yehova ya yinza nyonso ke kaka dikanda mosi. Ni na yawu beto ke bokilá beto na beto bampangi. (Filemo 1, 2) Beto ke tumamá mpe na musiku yayi: “Beno zola bampangi ya beno ya kiminu.” (1 Piere 2:17) Luzolo ya Bambangi ya Yehova ke talaná na bafaso mingi. Na kifwani, beto ke sadisá bampangi ya beto yina ke na lutisá bantangu ya mpasi na yinza nyonso.
SOSA KUZABA MBOTE-MBOTE
Baka ntangu samu na kuzaba mbote-mbote disolo ya Bambangi ya Yehova, mpe tala na nge mosi ti beto kele bakristo ya tsyeleka.
Bakristo ya tsyeleka ke kwikilá kaka na mambu ya Biblia, mpe ba ke longaka yawu na bantu ya nkaka
4. Beto ke kwikilá kaka na Biblia
Yehova zonzá ti matsyeleka ya Biblia yina vandá ya kubumbana ke zabana. Tanga Danyele 12:4 mpe note na yisi ya paje, mpe na manima beto zonzila kyuvu yayi:
-
Yinki ke “kuma mingi” ntangu bisadi ya Nzambi ke bika ve kulongoka Biblia mbote-mbote?
Tala wa’ faso, Charles Russell, na balongoki ya nkaka ya Biblia vandá longoka Biblia kintwadi. Tala VIDEO, mpe na manima beto zonzila kyuvu yina ke landa.
-
Na kati ya video, wa’ faso Charles Russell na balongoki ya nkaka vandá longoka Biblia?
Nge me zaba yawu?
Ya me kuminá beto na kusoba mambu yina beto vanda longa. Samu na yinki? Kaka faso ntangu ke basiká malembe-malembe, Nzambi ke sadisá beto na kuzaba mbote-mbote matsyeleka ya Biblia malembe-malembe. (Tanga Bingana 4:18.) Ata ti Biblia ke sobá ve, ntangu beto ke kwizá zaba mbote-mbote matsyeleka ya yawu, beto ke bongisá mambu yina beto ke kwikilaka.
5. Nkumbu ya beto ke lakisá yina beto ke salaka
Samu na yinki beto baká nkumbu, Bambangi ya Yehova? Tala VIDEO, mpe na manima beto zonzila kyuvu yina ke landa.
-
Samu na yinki nkumbu ‘Bambangi ya Yehova’ me bonga na beto?
Samu na yinki Yehova soolá bantu samu na kuvanda Bambangi ya yandi? Samu ba lakisa ti ni yandi ke Nzambi ya matsyeleka, mpe kusukula nkumbu ya yandi na luvunu yina bantu ke zonzá na yina me tadila yandi. Tala zole ya bamambu ya luvunu yango.
Mabuundu mingi ke longá ti, Nzambi ke zolá ba sadila biteki ntangu ba ke sambilaka yandi. Na yawu, tanga Balevi 26:1, mpe na manima, beto zonzila byuvu yayi:
-
Wapi yina ke matsyeleka? Wapi yina ke dikanisi ya Yehova na yina me tadila biteki?
Bamfumu ya mabuundu mingi ke longá ti Yesu ke Nzambi. Kasi, tanga Yoane 20:17, mpe na manima beto zonzila byuvu yayi:
-
Wapi yina ke matsyeleka? Nzambi na Yesu ke kaka muntu mosi?
-
Ya ke na salá nge yinki na kuzaba ti Yehova filisá Bambangi ya yandi, samu na kulonga matsyeleka na yina me tadila yandi mpe mwana ya yandi?
6. Beto ke zolasanaka
Biblia ke fwanisá bakristo na binama ya nzutu ya muntu. Tanga 1 Bakorinto 12:25, 26, mpe na manima beto zonzila byuvu yayi:
-
Yinki bakristo ya tsyeleka me bonga kusala ntangu bampangi ya bawu ke talá mpasi?
-
Yinki me lakisa nge ti Bambangi ya Yehova ke zolasanaka?
Ntangu Bambangi ya Yehova ya kisika mosi na yinza ke kutaná na bampasi, bampangi ya babwala ya nkaka ke salá nyonso samu na kusadisa bawu na mbangu. Na kutala mosi ya bifwani, landa VIDEO. Mpe na manima beto zonzila kyuvu yina ke landa.
-
Wa’ faso lusalusu yina Bambangi ya Yehova natiná bampangi ya bawu ke na lakisá luzolo?
Bakristo ya tsyeleka ke sadisá ba yina ke na nsatu ya lusalusu
BANTU YA NKAKA KE ZONZAKA: “Ata muntu me talá Yehova. Samu na yinki beno ke zonzá ti beno ke Bambangi ya yandi?”
-
Kubanda wapi ntangu Yehova ke bokilá bisadi ya yandi Bambangi?
NA BUNKUFI
Bambangi ya Yehova ke bakristo ya tsyeleka. Bisadi ya Yehova ya ntoto nyonso ke kaka dikanda mosi. Beto ke kwikilá kaka na Biblia, mpe ke zonzá matsyeleka na yina me tadila Yehova.
Mambu ya kusimba
-
Samu na yinki beto baká nkumbu Bambangi ya Yehova?
-
Wapi mutindu beto ke bakilá bampangi?
-
Nge me kanisa ti Bambangi ya Yehova ke bakristo ya tsyeleka?
SOSA KUZABA DYAKA
Longoka dyaka na yina me tadila disolo ya Bambangi ya Yehova.
Les Témoins de Jehovah. La Foi en action, 1re Partie : La sortie des ténèbres (1:00:53)
Beto tala mosi ya bifwani yina ke na lakisá faso Bambangi ya Yehova, lakisá pwelele yina vandá malongi ya luvunu.
Dikanda ya Nzambi ke na pesá nkembo na nkumbu ya yandi (7:08)
Kuzwa bamvutu na byuvu yina nge lenda vanda na yawu na yina me tadila bambangi ya Yehova.
“Byuvu yina bantu ke yufulá na yina me tadila Bambangi ya Yehova” (Tanga yawu na jw.org)
Stephen vandá yiiná bantu ya mpusu ya nkaka, mpe yandi vanda salá bawu yimbi. Tala yinki nataka yandi na kusoba ndyatulu ya yandi.
“ Ma vie allait de plus en plus mal ” (La Tour de Garde, 1er Juillet 2015)
a Kubanda 1879, Yinzo ya Kengidi ke mukanda ya beto ya ntete yina ke zonzilá matsyeleka ya biblia tii bubu yayi.
