Yehova ke ve Nzambi ya muvusu. (1 Bakorinto 14:33) Ni na yawu beto mpe bisadi ya yandi zolá vanda ve na muvusu. Wa’ faso bamambu ke salamá na kati ya dibuundu ya Yehova? Yinki mosi na mosi na kati ya beto lenda sala samu bamambu tambula na faso ya mbote?

1. Nani ke mfumu ya dibuundu ya Yehova?

“Kristo kele yintu ya dibuundu.” (Baefeze 5:23) Katuka na zulu yandi ke na twadisá kisalu ya bisadi ya Yehova ya yinza nyonso. Samu na kusala yawu, yandi ke sadilá “kisadi ya kukwikama mpe ya mayela”—kimvuka ya fioti ya bakuluntu yina ke ya kuyela na kimpeve. Beto ke bokilá mpe kimvuka yango Kimvuka ya Bantwadisi. (Tanga Matayi 24:45-47.) Kaka faso bantumwa mpe bakuluntu na Yeruzalemi na siècle ya ntete, Kimvuka ya Bantwadisi ke lakisá nzila ya kulanda na dikanda ya Yehova ya ntoto nyonso. (Bisalu 15:2) Kasi ya zola zonza ve ti ba kele bamfumu ya dibuundu ya beto. Samu na yinki? Samu ti bawu mpe ke sambilá mpe ke longoká mbote-mbote Biblia, samu na kuzaba yinki Yehova me zola ba sala, mpe ba ke tumamá na Yesu na ntima mosi.

2. Banani kele bakuluntu mpe yinki ba ke salaka?

Bakuluntu kele bakristo ya babakala yina ke ya kuyela na kimpeve. Ba ke sadilá Biblia samu na kulonga, kukipe mpe kukindisa bisadi ya Yehova. Ba ke futá ve bawu samu na kisalu yina ba ke salaka. Kasi, ba ke salaka yawu “na ntima mosi mutindu Nzambi ke zolaka; samu na kuzwa mbongo ve, kasi na luzolo ya kulutila.” (1 Piere 5:1, 2) Ya ke na bampangi ya bakala na kati ya kimvuka yina ke sadisá bakuluntu, ba ke bokilá bawu basadisi, mpe na manima, ba lenda kuma bakuluntu kana ba me lungisa bamambu yina Biblia ke lombá na bakuluntu.

Kimvuka ya Bantwadisi ke soolá bakuluntu ya nkaka na kuvanda bantwadisi ya circonscription (kikunku ya bimvuka). Bantwadisi ya circonscription ke kwendá talá bimvuka mingi, samu na kukindisa mpe kupesa bawu malongi. Ni bawu mpe ke tulá bakuluntu mpe basadisi na kati ya bimvuka. Samu na yawu, ba ke sadilá mambu yina Biblia ke lombá na bakuluntu mpe na basadisi.—1 Timote 3:1-10, 12; Tite 1:5-9.

3. Yinki konso muntu na kati ya dibuundu ya Yehova me bonga kusala?

Konso muntu na kati ya dibuundu ya Yehova ke “kembila nkumbu ya Yehova.” Na yawu, konso Mbangi ya Yehova ke yimbá, ke pesá bamvutu na balukutakanu ya kimvuka, mpe ke salá nyonso yina yandi lenda sala samu na kusamuna mambu ya Yehova.—Tanga Nkunga 148:12, 13.

 SOSA KUZABA MBOTE-MBOTE

4. Yesu kele mfumu yina ke na ntima ya mbote

Yesu me lomba na beto na kusala mambu mosi ya mfunu. Tanga Matayi 11:28-30, mpe na manima beto zonzila byuvu yayi:

• Wa’ faso Yesu me zola beto tadila bumfumu ya yandi?

5. Bakuluntu ke longá beto na kifwani ya bawu

1. Bakuluntu ke bumbá ngolo kiminu ya bawu mpe ya makanda ya bawu

2. Bakuluntu ke kipeke bantu nyonso na kati ya kimvuka

3.   Bakuluntu ke samuná mingi

4. Bakuluntu ke longaka. Ba ke tulá diboko samu na kubongisa kisika ya balukutakanu, mpe na bisalu ya nkaka

6. Ya ke mbote na kusala kintwandi na bakuluntu

Biblia ke lakisá beto mfunu ya kusala kintwandi na bakuluntu. Tanga Baebre 13:17, mpe na manima beto zonzila kyuvu yayi:

• Samu na yinki Biblia ke lombá na beto na kutumama na ntima nyonso na ba yina ke twadisá kimvuka?

Tanga Luke 16:10, mpe na manima beto zonzila kyuvu yayi:

• Samu na yinki ya ke mfunu na kutumama na bakuluntu ata na bamambu ya fioti-fioti?

 NA BUNKUFI

Yesu ke mfumu ya dibuundu ya Yehova. Beto ke sepelá na kusala kintwadi na bakuluntu, samu ti ba ke kindisá beto mpe ke longá beto na bifwani ya bawu ya mbote. Beto nyonso ke tumamá kintwandi na mfumu ya beto, Yesu.

Mambu ya kusimba

• Nani ke mfumu ya dibuundu ya Yehova?

• Wa’ faso bakuluntu ke sadisá kimvuka?

• Yinki konso muntu na kati ya dibuundu ya Yehova me bonga kusala?