KILESO 22

Wapi faso nge lenda zonzila nsangu ya mbote na bantu ya nkaka?

KUWA NA

Ntangu nge ke na longoká kuzaba matsyeleka ya Biblia, nge lenda kanisa, ‘Bantu nyonso me bonga kuwa mambu yayi!’ Ya ke ya tsyeleka. Kasi ntangu ya nkaka, nge lenda vanda na boma ya kuzonzila mambu yina nge me longoka na bantu ya nkaka. Beto tala wa’ faso nge lenda katula malembe-malembe boma yina, mpe faso nge lenda banda kuzonzila nsangu ya mbote na kilengi nyonso.

1. Wa’ faso nge lenda zonzila mambu yina nge me longoka na bantu yina nge zaba?

Bilandi ya Yesu zonzà: “Beto lenda kumanga ve na kuzonzila mambu yina beto talaka mpe kuwaka.” (Bisalu 4:20) Ba zolà mingi malongi ya Yesu, mpe talá ti ya vandá mfunu mingi. Ni yawu natá bawu na kukabula matsyeleka yina na bantu ya nkaka. Kana ya ke faso yina na nge mpe, sosa ntangu ya mbote yina nge lenda zonzila na buzitu nyonso, mambu yina nge me longoka na dikanda ya nge mpe na bandiku ya nge.—Tanga Bakolose 4:6.

Mutindu nge lenda banda kusala yawu

Ntangu nge ke solola na bantu ya dikanda ya nge, nge lenda zonza: “Lumingu yayi mu me longoka mambu mosi ya kitoko na Biblia.”
Nge lenda tanga verse ya Biblia, samu na kupesa ngolo na mpangi ya nge yina ke na beelá to ke na mambu yina ke na kwamisaka yandi.
Kana mpangi me yufula nge faso nge me lutisa lumingu ya nge, zonzila yandi mambu yina nge me longoka na balukutakanu mpe na kulongoka ya nge ya Biblia.
Lakisa na bandiku ya nge site internet jw.org.
Bokila bampangi ya nge na kuvukana na nge ntangu nge ke longoka Biblia, to lakisa bawu faso ba lenda lomba kulongoka ya Biblia na site internet jw.org.

2. Samu na yinki kusamuna kintwadi na kimvuka ke mambu ya mbote?

Bilandi ya Yesu vanda zonzilá ve mambu ya Nzambi kaka na bantu yina ba zabaka. Yesu “fidisaka bawu zole zole na bambaza nyonso” samu na kusamuna. (Luke 10:1) Faso ya kusala yayi salá ti bantu mingi kuwa nsangu ya mbote. Kusamuna kintwadi sadisá mpe bilandi ya Yesu na kuvanda na kilengi mingi. (Luke 10:17) Na yawu, nge lenda baka mukanu ya kusamuna kintwadi na kimvuka?

SOSA KUZABA MBOTE-MBOTE

Longoka faso nge lenda katula malembe-malembe boma ya kusamuna, mpe faso nge lenda kuzwa kilengi na kusala yawu.

3. Yehova ke vanda na nge

Mingi ya bantu yina ke sosá kusamuna, ke vandá na boma na faso bantu ke tadila bawu to ke bakila bawu.

Nge mpe ke na boma ya kuzonza mambu yina nge me longoka na bantu ya nkaka? Samu na yinki?

Tala VIDEO, mpe na manima beto zonzila kyuvu yina ke landa.

VIDEO: Mu sambilá Yehova samu yandi pesa munu bukindi (4:05)

Wa’ faso bantwenya yayi lendá na kununga boma ya bawu?

Tanga Izaya 41:10, mpe na manima beto zonzila kyuvu yayi:

Ntangu nge ke na boma ya kusamuna, samu na yinki nge me bonga kusambila?

Nge me zaba yawu?

Mingi ya Bambangi ya Yehova, vanda kanisá ti ba ke lenda ve ata fioti na kusamuna. Ni faso vandá Sergey, yandi vanda talá ti yandi vandá kaka muntu ya mpamba, mpe ya vandá mpasi na yandi na kusolola na bantu. Kasi na manima ya kulongoka Biblia, yandi zonzá: “Ata boma ya munu, mu bandá kuzonzila mambu yina mu vandá longoka na bantu ya nkaka. Mu pamuká munu mosi na kutala ti, kuzonzila mambu ya Biblia na bantu, sobá faso ya munu ya kutadila munu mosi. Mpe ya kulisá kiminu ya munu.”

4. Lakisa buzitu

Tekila nge zonzila muntu mambu ya Biblia, yidika mambu yina nge ke zonza, mpe faso nge lenda zonzila yawu na buzitu nyonso. Tanga 2 Timote 2:24 na 1 Piere 3:15, mpe na manima beto zonzila byuvu yayi:

Wa’ faso nge lenda sadila baverse yayi ntangu nge ke na zonzilá bantu mambu ya Biblia?
Bantu ya nkaka ya dikanda ya nge to bampangi ya nge lenda manga kuwa nge. Yinki nge lenda sala? Yinki nge me bonga kusala ve?
Samu na yinki ya ke mbote na kuzaba kuzonza na bantu, kasi kunata ve bawu na ngolo na kukwikila na malongi ya beto?

5. Kusamuna nsangu ya mbote ke pesá kilengi

Yehova pesá Yesu kisalu ya kusamuna. Na yawu, wa’ faso Yesu vanda bakila kisalu yango? Tanga Yoane 4:34, mpe na manima beto zonzila byuvu yayi:

Kudya mbote ke pesá mavimpi mpe kilengi na luzingu. Na yawu, samu na yinki Yesu zonzá ti kusala luzolo ya Nzambi—faso kusamuna nsangu ya mbote—ke mutindu nge ke na kudya madya ya mbote?
Wapi bambote nge lenda kuzwa na kisalu ya kusamuna nsangu ya mbote?

Mambu yina lenda sadisa nge

Na balukutakanu ya kati ya lumingu, sosa kusimba dikanisi yina nge lenda sadila samu na kulonga bantu mambu ya Biblia.
Solola na muntu yina ke longoká na nge Biblia, samu nge banda kusala masolo ya Biblia na mantwala ya bampangi na balukutakanu ya kati ya lumingu. Ya ke sadisa nge mingi na kuzaba faso ya kuzonza mambu yina nge ke na longoká na bantu ya nkaka.
Sadila bitini “Bantu ya nkaka ke zonzaka” to “Muntu lenda yufula” yina ke na kileso yayi, samu na kuzaba bamvutu yina nge ke pesa na byuvu yina nge lenda bwabana na yawu.

MUNTU LENDA YUFULA: “Wapi bansangu?”