Yesu longá ti bilandi ya yandi fwana kuzwa mbotokolo. (Tanga Matayi 28:19, 20.) Kasi mbotokolo zola zonza yinki? Mpe yinki muntu me bonga kusala samu na kuzwa yawu?

1. Mbotokolo zola zonza yinki?

“Mbotokolo” me katuka na ndinga ya Grec, ya zola zonza “kudyamisa” na kati ya maza. Ntangu Yesu kuzwá mbotokolo, ba kotisaka yandi nyonso na maza ya Yordani, mpe na manima yandi “basikaka na maza.” (Marke 1:9, 10) Faso mosi mpe, ntangu bakristo ya tsyeleka ke kuzwá mbotokolo ba ke dyamisá mpe bawu na kati ya maza.

2. Ntangu muntu ke kuzwá mbotokolo yinki ya ke lakisaka?

Ya ke lakisá ti yandi me kukipesa na Yehova. Kasi wa’ faso muntu ke kukipesá na Nzambi? Tekila yandi kuzwa mbotokolo, yandi ke baka ntangu ya kusambila, ke zonza na Yehova ti yandi ke sadila kaka yandi luzingu ya yandi nyonso. Mpe kusala luzolo ya Yehova ke vanda mambu ya ntete na luzingu ya yandi. Yandi ke soola “kubika kubanza na mambu yina me tadila yandi mosi mpe [. . .] ke landa” malongi ya Yesu na kifwani ya yandi. (Matayi 16:24) Samu yandi me kukipesa na Yehova mpe me kuzwa mbotokolo, bundiku ya yandi na Yehova, mpe na bisadi ya yandi ke kuma dyaka ngolo.

3. Wapi bangolo muntu me lunga kusala samu na kuzwa mbotokolo?

Tekila nge kuzwa mbotokolo, nge me lunga kulongoka mingi na yina me tadila Yehova mpe kukulisa kiminu na yandi. (Tanga Baebre 11:6.) Na yawu, ntangu kuzaba ya nge na kiminu ya nge ke na kulá, luzolo ya nge na Yehova mpe ke kula. Ya tsyeleka nge ke tala na nge mosi ti nge ke banda kuzola kuzonzila mambu ya Yehova na bantu ya nkaka, mpe kulanda misiku ya yandi. (2 Timote 4:2; 1 Yoane 5:3) Ntangu muntu ke kuma ‘na luzingu ya kudedama na ntwala ya Yehova na kusalaka mambu yina ke sepelisaka yandi,’ yandi ke kuma na nsatu ya kupesa luzingu ya yandi na Yehova, mpe kuzwa mbotokolo.—Bakolose 1:9, 10. a

 SOSA KUZABA MBOTE-MBOTE

4. Mambu yina mbotokolo ya Yesu lenda longa beto

Tanga Matayi 3:13-17 samu na kuzaba mingi na yina me tadila mbotokolo ya Yesu. Mpe na manima beto zonzila byuvu yayi:

• Yesu vandá kwandi mwana ya fioti ntangu yandi kuzwá mbotokolo?

• Wa’ faso mbotokolo ya yandi salamaka? Ba tulaka yandi kaka maza na zulu ya yintu?

Na manima ya kuzwa mbotokolo, Yesu bandá kisalu ya mfunu yina Nzambi pesaka yandi na zulu ya ntoto. Tanga Luke 3:21-23 na Yoane 6:38, mpe na manima beto zonzila kyuvu yayi:

• Na manima ya kuzwa mbotokolo, wapi kisalu Yesu tulá na kisika ya ntete na luzingu ya yandi?

5. Kukuma tii na mbotokolo ke ve mambu ya mpasi

Dikanisi ya kukipesa na Yehova mpe kuzwa mbotokolo lenda pesa beto boma. Kasi, ntangu kiminu ya nge ke kuma ngolo nge ke lenda na kubaka mukanu ya mfunu yayi. Samu na kutala bifwani ya ba yina salaka yawu, landa VIDEO.

Tanga Yoane 17:3 na Zaki 1:5, mpe na manima beto zonzila kyuvu yayi:

• Yinki lenda sadisa muntu samu yandi bongama na kuzwa mbotokolo?

1. Beto ke kukipesá na Yehova, ntangu beto ke zonzá na yandi ti beto ke sadila kaka yandi luzingu ya beto nyonso

2. Ntangu beto ke kuzwa mbotokolo, beto ke lakisa na meso ya bantu nyonso ti beto kukipesá na Nzambi

 6. Mbotokolo ke salá ti beto kota na dikanda ya Yehova

Ntangu beto ke kuzwa mbotokolo, beto ke kota na dikanda ya Yehova ya yinza nyonso. Ata bisika yina beto kele, mpe bandinga yina beto ke zonzá, beto nyonso ke kwikilá na mambu mosi mpe ke landá misiku mosi. Tanga Nkunga 25:14 na 1 Piere 2:17, mpe na manima beto zonzila kyuvu yayi:

• Wapi mutindu mbotokolo ke bongisá bundiku ya beto na Yehova mpe na bisadi ya yandi ya nkaka?

 NA BUNKUFI

Yesu longá ti bilandi ya yandi fwana kuzwa mbotokolo. Tekila muntu kuzwa mbotokolo, yandi me bonga kukulisa kiminu ya yandi na Yehova, kutumama na misiku ya yandi, mpe kukipesa na Yehova.

Mambu ya kusimba

• Mbotokolo kele yinki, mpe samu na yinki ya ke mfunu?

• Ntangu muntu ke kuzwá mbotokolo yinki ya ke lakisaka?

• Yinki muntu me bonga kusala tekila yandi kukipesa na Yehova mpe kuzwa mbotokolo?