KILESO 24

Banani kele bambazi mpe yinki ba ke salaka?

KUWA NA

Yehova me zola beto zaba dikanda ya yandi yina kele na zulu. Bambazi (anges) ke na kati ya dikanda yango. Ba ke bokilá bawu “bana ya Nzambi.” (Yobi 38:7) Yinki Biblia ke zonzá na yina me tadila bambazi? Wa’ faso bantu ke tadilá bawu? Mpe bawu nyonso kele kwandi na kati ya dikanda ya Yehova?

1. Banani kele bambazi?

Yehova yidiká ntete bambazi tekila yandi yidika ntoto. Mutindu Yehova, bawu mpe ke vandá na zulu mpe ke na nzutu ya kimpeve. (Baebre 1:14) Ba kele mingi, mpe mosi na mosi ya bawu ke na kimuntu ya yandi. (Luzabusu 5:11) Ba “ke zitisaka ndinga ya [Yehova], mpe ke tumamá na mambu ya yandi.” (Nkunga 103:20) Na ntama, Yehova sadilá bambazi ya yandi samu na kunata bansangu na dikanda ya yandi, kusadisa bawu mpe kupesa bawu ngolo. Bubu yayi mpe, bambazi ke twadisá bisadi ya Yehova na sika ya bantu yina ke na nsatu ya kuzaba mingi na yina me tadila Nzambi.

2. Nani ke Satana mpe banani kele bambazi ya yimbi?

Bambazi ya nkaka kangamá ve na Yehova. Mbazi ya ntete yina balukilá Yehova “ba ke bokilaka yandi Dyabulu [mpe] Satana, yina ke vunaka bantu nyonso.” (Luzabusu 12:9) Satana vanda sosa kuyala, na yawu yandi vuná bantu ya ntete Adami na Eva. Na manima yandi natá mpe bambazi ya nkaka na kubalukila Yehova. Biblia ke bokilá bawu bambazi ya yimbi to bampeve ya yimbi (démons). Yehova bingisá bawu na zulu mpe losá bawu na ntoto. Ntama mingi ve yandi ke kufwa bawu.—Tanga Luzabusu 12:9, 12.

3. Wapi mutindu Satana na bambazi ya yimbi ke sosá kuvuna beto?

Satana na bambazi ya yimbi ke sosá kuvuna bantu. Na yawu, ba ke bumbaná na manima ya bunganga mpe bansalulu ya mutindu na mutindu samu na kunata bantu na kusolola na bawu, mpe kuwa bawu. Kasi ba yina ke salá bansalulu yayi ke zabá ve ti ni bambazi ya yimbi ke na manima ya yawu. Na kifwani, samu na kuzaba mambu ya luzingu ya bawu, bantu mingi ke kwendá talá ba yina ke sadilá bambwetete, ba yina ke tangá banzila ya maboko, ba yina ke bangulá bandosi, ba yina ke talá bamambu, mpe ba yina ke sadisaka. Ya ba nkaka ke kwendá na bizinga to ke salá bakisi samu na kubeluka. Ba ya nkaka, Satana na bambazi ya yimbi ke natá bawu na kundima ti ba lenda solola na bantu ya kufwa. a Kasi Yehova me kebisa beto: “Kukwenda ve na bantu yina ke sololá na bantu ya kufwa, mpe kuwa ve bantu yina ke zabisá bantu ya nkaka mambu yina ke kumina bawu.” (Balevi 19:31) Yandi me kebisa beto samu na kubumba beto na yimbi yina Satana na bambazi ya yimbi ke salaka. Ba ke bambeni (ennemis) ya Yehova, mpe me zola kusala beto yimbi.

SOSA KUZABA MBOTE-MBOTE

Longoka bamambu ya mbote yina bambazi ke salá, samu na yinki ya ke yimbi na kusosa kusolola, mpe kusosa kuwa Satana na bambazi ya yimbi, mpe faso beto lenda kubwa ve na mutambu ya bawu.

4. Bambazi ke sadisá bantu na kuzaba Yehova

Bambazi ke kwendá ve na bayinzo ya bantu samu na kusamuna bawu. Kasi, ba ke twadisá bisadi ya Yehova na sika ya bantu yina ke na nsatu ya kuzaba yandi. Tanga Luzabusu 14:6, 7, mpe na manima beto zonzila byuvu yayi:

Samu na yinki beto ke na nsatu ya lusalusu ya bambazi samu na kusamuna?
Kuzaba ti bambazi lenda twadisa nge samu na kuzonza mambu ya Biblia na bantu ke na kindisá kwandi nge? Samu na yinki?

5. Losa bamambu ya kusosa kusolola to kuwa bambazi ya yimbi

Satana na bambazi ya yimbi ke bambeni ya Yehova. Ba kele mpe bambeni ya beto. Tanga Luke 9:38-42, mpe na manima beto zonzila kyuvu yayi:

Yinki bambazi ya yimbi ke salá na bantu?

Beto kukotisa ve bambazi ya yimbi na luzingu ya beto. Tanga Kulonga Misiku 18:10-12, mpe na manima beto zonzila byuvu yayi:

Wapi bima to bamambu bambazi ya yimbi ke sadilá samu na kusosa kuvuna beto to kusolola na beto? Wapi bansalulu ke salamá kisika yina nge ke vandaka?
Samu na nge, ya ke kwandi mbote Yehova nimina bansalulu ya kusosa kusolola to kuwa bambazi ya yimbi? Samu na yinki?

Tala VIDEO, mpe na manima beto zonzila byuvu yina ke landa.

VIDEO: “Beno pesa ve nzila na Satana” (5:02)

Nge me kanisa ti mulunga yina Palesa lwatisá mwana ya yandi vandá yimbi? Samu na yinki?
Yinki Palesa zolá sala samu na kuvanda ntama na bambazi ya yimbi?

Bakristo ya tsyeleka ke salá nyonso samu na kuvanda ntama na bambazi ya yimbi. Tanga Bisalu 19:19 na 1 Bakorinto 10:21, mpe na manima beto zonzila kyuvu yayi:

Samu na yinki ya ke mfunu na kuyoka bima yina lenda bokila bambazi ya yimbi?

6. Nunga Satana na bambazi ya yimbi

Satana ke twadisá bambazi ya yimbi. Kasi Yesu yina ba ke bokilá Mikayele mfumu ya bambazi, ke twadisá bambazi nyonso ya kukwikama na Nzambi. Wapi ngolo ke na Mikayele? Tanga Luzabusu 12:7-9, mpe na manima beto zonzila byuvu yayi:

Nani me lutila ngolo, Mikayele na bambazi ya yandi to Satana na bambazi ya yandi?
Nge me kanisa ti bilandi ya Yesu zolá vanda na boma ya Satana na bambazi ya yimbi?

Nge lenda nunga Satana na bambazi ya yimbi. Tanga Zaki 4:7, mpe na manima beto zonzila kyuvu yayi:

Yinki nge lenda sala samu na kuvanda ntama na Satana mpe na bambazi ya yandi?

BANTU YA NKAKA KE ZONZAKA: “Ya ke ve yimbi na kutala bizizi to kubula bansaka yina ke lakisá bundoki, ya ke kaka samu na kusakana.”

Samu na yinki kukanisa faso yina ke yimbi?

NA BUNKUFI

Bambazi ya kukwikama ke sadisá beto. Satana na bambazi ya yandi ke bambeni ya Yehova, mpe ba ke natá bantu na kusosa kusolola na bawu, mpe kusosa kuwa bawu, samu na kuvuna bantu.

Mambu ya kusimba

Wa’ faso bambazi ya Yehova ke sadisá bantu na kuzaba yandi?
Nani ke Satana mpe banani ke bambazi ya yimbi?
Samu na yinki nge ke na nsatu ya kuvanda ntama na bansalulu ya kusosa kusolola to kuwa bambazi ya yimbi?

Sonika kilumbu yina kileso me manisa:

Yina nge lenda sala

Tala kana nge ke na bima yina lenda bokila bambazi ya yimbi to bampeve ya yimbi, mpe sambila Yehova samu yandi sadisa nge na kubaka mukanu ya mbote samu na yawu.

Mambu ya nkaka ya kusala:

Your other goal