Yinki ya ke salá nge ntangu mosi ya bandiku ya nge ke pesá nge dikabu ya kitoko? Ntembe ve, ya ke pesá nge kilengi mingi, mpe nge ke vandá na nsatu ya kulakisa yandi ti nge me sepela na yawu. Yehova na Yesu mpe pesá beto dikabu mosi ya nene yina nabunu beto kuzwa: munkayulu ya Yesu. Na yawu, wa’ faso beto lenda vutula bawu matondo samu na dikabu yango?

1. Wapi yina ke mosi ya bafaso ya kuvutula matondo na yina Nzambi na Kristo salá samu na beto?

Biblia ke zonzá ti “konso muntu yina ke kwikila [na Yesu]” ke zinga ntangu nyonso. (Yoane 3:16) Yinki zola zonza kukwikila? Ya zola zonza ve kaka kundima Yesu. Kasi ya zola zonza mpe kulakisa kiminu ya beto na mikanu yina beto ke baká mpe na mambu yina beto ke salaka. (Zaki 2:17) Ntangu beto ke lakisá kiminu ya beto na ndyatulu ya beto mpe na nzonzolo ya beto, bundiku ya beto na Yesu mpe na Tata ya yandi, Yehova, ke kulaka.—Tanga Yoane 14:21.

2. Wapi kilumbu ya mfunu lenda sadisa beto na kuvutula matondo na yina Yehova na Yesu salaka?

Na nkokila yina tekilá lufwa ya yandi, Yesu zonzá na bilandi ya yandi na kubambukila lufwa ya yandi. Biblia ke bokilaka yawu “madya ya Mfumu.” Beto me zabila mpe yawu na nkumbu ya ‘Kubambuka moyo lufwa ya Yesu’ (Mémorial). Ya ke kilumbu mosi ya mfunu mingi. (1 Bakorinto 11:20) Na kusalá faso yina, Yesu zolá ti bantumwa ya yandi mpe bakristo nyonso ya tsyeleka yina zolá kwiza na manima, bambukila moyo ti Yesu pesá luzingu ya yandi samu na bantu. Ni na yawu Yesu pesá musiku: “Beno sala mutindu yayi samu na kubambuka munu moyo.” (Luke 22:19) Ntangu nge ke salá bangolo samu na kuvukana kintwadi na bampangi kilumbu ya Kubambuka moyo lufwa ya Yesu, nge ke lakisá ti nge ke na vutula matondo, samu na luzolo ya nene yina Yehova na Yesu ke na yawu samu na nge.

 SOSA KUZABA MBOTE-MBOTE

3. Yina beto lenda sala samu na kuvutula matondo

Kanisa ti nge vandá dyama na maza, mpe muntu mosi me kwiza vuukisa nge. Nge lenda zimbana kwandi yina yandi me sala samu na nge? To nge ke sala nyonso samu na kuvutula yandi matondo samu yandi me vuukisa luzingu ya nge?

Ni Yehova muntu me vuukisa luzingu ya beto. Tanga 1 Yoane 4:8-10, mpe na manima beto zonzila byuvu yayi:

• Samu na yinki munkayulu ya Yesu kele dikabu mosi ya nene?

• Ntangu nge ke na kanisá na yina Yehova na Yesu salá samu na nge, ya ke na salá nge yinki?

Wa’ faso beto lenda lakisa ti beto ke na vutulá matondo na yina Yehova na Yesu me sala samu na beto? Tanga 2 Bakorinto 5:15 na 1 Yoane 4:11; 5:3. Na manima ya kutanga mosi na mosi ya baverse yayi, beto zonzila kyuvu yayi:

• Mutindu baverse yina beto me tanga me lakisa yawu, wa’ faso beto lenda vutula matondo na Yehova mpe na Yesu?

4. Landa kifwani ya Yesu

Faso ya nkaka ya kuvutula matondo, ni ya kulanda kifwani ya Yesu. Tanga 1 Piere 2:21, mpe na manima beto zonzila kyuvu yayi:

• Na wapi mutindu beto lenda landa mbote-mbote kifwani ya Yesu?

• Wa’ faso lukutakanu ya Kubambuka moyo lufwa ya Yesu ke salamaka?

 NA BUNKUFI

Beto lenda lakisa ti beto ke na vutulá matondo na yina Yesu salá samu na beto, na kukwikilá na yandi mpe na kuvandá na lukutakanu ya kilumbu ya Kubambuka moyo lufwa ya yandi.

Mambu ya kusimba

• Yinki zola zonza kukwikila na Yesu?

• Wa’ faso nge lenda lakisa ti nge ke na vutulá matondo na yina Yehova na Yesu salá samu na nge?

• Samu na yinki ya ke mfunu mingi na kuvandaka na lukutakanu ya Kubambuka moyo lufwa ya Yesu?