Ntangu beto ke fwidilá muntu, beto ke vandá na mawa mingi. Ni na yawu, Biblia ke bokilá lufwa mbeni. (1 Bakorinto 15:26) Na Kileso 27, nge longoká ti Yehova ke sala ti lufwa vanda dyaka ve. Kasi yinki yandi ke sala na bantu yina me kufwaka? Na kileso yayi, nge ke longoka mingi na nsilulu ya kitoko yina Yehova me sala, ya kuvutula na luzingu mafunda na mafunda ya bantu ya kufwa, samu ba sepela na luzingu ya ntangu nyonso. Kasi ya lenda salama kwandi? Ba ke vumbuka na zulu to na ntoto?

1. Yinki Yehova me zola kusala samu na bantu yina me kufwaka?

Yehova ke na nsatu ya kuvumbula bantu yina me kufwaka. Yobi vandá na kiminu ti, ata yandi kufwa, Nzambi ke zimbana ve yandi ata fioti. Yandi zonzá na Nzambi: “Nge ke bokila, mpe munu ke ndima na [kati ya ndyamu].”—Tanga Yobi 14:13-15.

2. Wa’ faso beto me zaba ti bantu ya kufwa lenda vumbuka na lufwa?

Ntangu Yesu vandá awa na ntoto, Nzambi pesaka yandi ngolo ya kuvumbula bantu ya kufwa. Yesu vumbulá na lufwa mwana mosi ya kento ya bamvula 12, mpe mwana mosi ya bakala. (Marke 5:41, 42; Luke 7:12-15) Na manima, Lazare, ndiku ya Yesu kufwaka. Ata Lazare salá bilumbu 4 na kati ya ndyamu to tombe, Yesu vumbulaka yandi na lufwa. Yesu sambilá mpe na ndinga ya ngolo, yandi zonzá: “Lazale basika!” Mpe “muntu yina kufwaka basikaka na ndyamu”—moyo! (Yoane 11:43, 44) Kanisa na kilengi yina vandá na dikanda ya Lazare mpe na bandiku ya yandi!

3. Wapi kivuvu nge kele na yawu samu na bampangi ya nge yina nge fwidilaka?

Biblia ke zonzá ti: “Nzambi ke vumbula na lufwa bantu.” (Bisalu 24:15) Ntangu Yesu vandá awa na ntoto, bantu nyonso yina yandi vumbulá na lufwa kwendá ve na zulu. (Yoane 3:13) Ba vandá na kilengi ya kuvutuka na luzingu awa na ntoto. Faso mosi mpe, na bilumbu yina ke kwiza, Yesu ke vumbula bantu mingi samu ba zinga ntangu nyonso na kati ya paradiso awa na ntoto. Yandi zonzá ti “bantu nyonso na bandyamu ke kuwa ndinga ya Mwana ya Muntu, mpe ke vumbuka na lufwa”—ata ti bantu zimbaná bawu.—Yoane 5:28, 29.

 SOSA KUZABA MBOTE-MBOTE

4. Yesu lakisá ti yandi lenda vumbula bantu ya kufwa

Tala yinki Yesu salá samu na ndiku ya yandi Lazare. Tanga Yoane 11:14, 38-44, mpe na manima beto zonzila byuvu yayi:

• Wa’ faso beto me zaba ti ya tsyeleka, Lazare kufwaka?—Tala verse 39.

• Kana Lazare kwendá na zulu, nge me kanisa ti Yesu zolá vumbula dyaka yandi awa na ntoto?

Tala VIDEO.

5. Bantu mingi ke vutuka na luzingu!

Tanga Nkunga 37:29, mpe na manima beto zonzila kyuvu yayi:

• Wapi kisika ke zinga bantu mingi yina ke vutuka na luzingu?

Yesu ke vumbula na lufwa ba yina vandá sadila Yehova, yandi ke vumbula mpe ba yina kuzwá ve bweso ya kuzaba Yehova. Tanga Bisalu 24:15, mpe na manima beto zonzila kyuvu yayi:

• Nani nge me zola kutala na kati ya bantu yina ke vutuka na luzingu?

• Wapi mutindu kuvanda na kivuvu ti bantu ya kufwa ke vumbuka pesá ngolo mpe sadisá bibuti ya Phelicity?

 NA BUNKUFI

Biblia ke zonzá ti bantu mingi yina kufwá ke vumbuka. Yehova zola ti ba vutuka na luzingu, mpe yandi pesá Yesu ngolo ya kuvumbula bantu na lufwa.

Mambu ya kusimba

• Wapi yina ke makanisi ya Yehova na Yesu na yina me tadila kuvutula bantu ya kufwa na luzingu?

• Wapi kisika bantu mingi yina ke vutuka na luzingu ke zinga—na zulu to na ntoto? Samu na yinki nge me zonza faso yina?

• Yinki ke na natá nge na kundima ti bantu yina nge fwidilá ke vutuka na luzingu?