KILESO 32

Kimfumu ya Nzambi ke na yalaka!

KUWA NA

Kimfumu ya Nzambi bandá kuyala na zulu na 1914. Ni na mvula yina mpe bilumbu ya nsuka ya luyalu ya bantu bandaka. Wa’ faso beto me zaba yawu? Beto tala faso bambikululu (prophéties) ya Biblia, bamambu mpe mavanga yina ke na lutá na yinza, banda 1914 ke na lakisaka yawu.

1. Yinki bambikululu ya Biblia ke na zonzaka?

Buku ya Danyele ke zonzá ti kimfumu ya Nzambi bandá kuyala na nsuka ya ntangu yina ba ke bokilá “bantangu sambwadi.” (Danyele 4:16, 17) Na manima ya ba siècle mingi, Yesu bokilá mpe ntangu yango “ntangu ya makanda”. (Luke 21:24) Faso beto ke tala yawu, bantangu sambwadi (7) yayi manisá na 1914.

2. Wapi bamambu mpe wapi mavanga ke na lutá na yinza banda 1914?

Bilandi ya Yesu yufulaka yandi: “Wapi ntangu mambu yina ke salama mpe wapi kidimbu ke lakisa mvwandulu ya nge mpe bilumbu ya nsuka ya yinza?” (Matayi 24:3, nwt) Yesu vutulá bawu ti, mambu mingi zolá salama na manima ya ntangu yina yandi zolá banda kuyala na zulu, na kimfumu ya Nzambi. Na kati ya bamambu yango, zolá vanda na ba guerres, bansatu, kuningana ya ntoto na bisika mingi. (Tanga Matayi 24:7.) Biblia zonzá mpe ti, mavanga ya bantu na “bilumbu ya nsuka” ke sala ti “bampasi ke lutila” na luzingu. (2 Timote 3:1-5) Nyonso yayi ke na salamá ya kulutila na yinza banda 1914.

3. Samu na yinki bamambu ke na kumá kaka yimbi banda ntangu yina kimfumu ya Nzambi ke na yalaka?

Ntangu fioti na manima ya kukuma Mfumu ya kimfumu ya Nzambi, Yesu nwaná na zulu na Satana mpe na bambazi ya yimbi. Yesu nungá bawu. Biblia ke zonzá ti “ba losaka [Satana] na ntoto kintwadi na bambazi ya yandi.” (Luzabusu 12:9, 10, 12) Satana ke na nkele mingi, samu yandi zaba ti kaka ntangu fioti me bikana, ba ke kufwa yandi. Ni na yawu, yandi ke na salaka yimbi na zulu ya ntoto nyonso na faso ya kulutila. Ni yina me sala ti yinza beba mingi! Kasi ntangu fioti kaka me bikana, kimfumu ya Nzambi ke katula bampasi nyonso yayi.

SOSA KUZABA MBOTE-MBOTE

Tala wa’ faso beto me zaba ti kimfumu ya Nzambi bandá kuyala na 1914, mpe yinki ya zola zonza samu na beto.

4. Bambikululu ya Biblia me sadisa beto na kuzwa mvula ya 1914

Tala VIDEO.

VIDEO: Kimfumu ya Nzambi bandá kuyala na 1914 (5:02)

Nzambi pesá ndosi na Nebukadenezare mfumu ya Babylone ya ntama. Ndosi yayi na faso Danyele bangulaka yawu, ke na lakisá ti ya vanda zonzila kimfumu ya Nebukadenezare na kimfumu ya Nzambi.—Tanga Danyele 4:17. a

Tanga Danyele 4:20-26, mpe sadila bizizi yayi samu na kuzwa bamvutu na byuvu yina ke landa:

(A) Yinki Nebukadenezare talá na ndosi ya yandi?—Tala baverse 20, 21..
(B) Yinki zolá kumina na yinti?—Tala verse 23.
(C) Yinki zolá salama na nsuka ya “bantangu sambwadi”?—Tala verse 26.

Faso yinti ya ndosi yayi me kwelana na kimfumu ya Nzambi

MBIKULULU (Danyele 4:20-36)

Kimfumu

(A) Yinti mosi ya nene

Kimfumu me suka ntete

(B) “Beno zenga yinti yina,” mpe beno bika “bantangu sambwadi luta”

Ba me vutula kimfumu

(C) “Kimfumu ke vanda dyaka ya nge”

Na kulungana ya ntete ya mbikululu . . .

(D) Yinti kele kifwani ya nani?—Tala verse 22.
(E) Wa’ faso kimfumu ya yandi suká ntete?—Tanga Danyele 4:29-33.
(F) Yinki kuminá Nebukadenezare na nsuka ya “bantangu sambwadi”?—Tanga Danyele 4:34-36.

KULUNGANA YA NTETE

Kimfumu

(D) Nebukadenezare, mfumu ya Babylone

Kimfumu me suka ntete

(E) Na manima ya 606 T.N.B. Nebukadenezare lawukaka, yandi lendá dyaka ve na kuyala na kati ya bamvula sambwadi

Ba me vutula kimfumu

(F) Nebukadenezare me beluka, mpe yandi me banda dyaka kuyala

Na kulungana ya zole ya mbikululu . . .

(G) Yinti ke na lakisá nani?—Tanga 1 Bansangu 29:23.
(H) Wa’ faso luyalu yango manisá ntete? Wa’ faso beto me zaba ti, ya vandá kaka faso yina tii ntangu Yesu vandá awa na ntoto?—Tanga Luke 21:24.
(I) Wapi ntangu mpe kisika luyalu yayi bandá dyaka?

KULUNGANA YA ZOLE

Kimfumu

(G) Luyalu ya bamfumu ya Izraele vandá kifwani ya luyalu ya Nzambi

Kimfumu me suka ntete

(H) Ba me mwangisa Yeruzalemi, bamfumu ya Izraele ke yala dyaka ve tii na nsuka ya bamvula 2 520

Ba me vutula kimfumu

(I) Yesu me kuma mfumu ya kimfumu ya Nzambi na zulu

Bamvula yikwa ke na kati ya bantangu sambwadi?

Ya ke na bitini ya Biblia yina ke sadisá beto na kuzaba mbote-mbote bitini ya nkaka ya Biblia. Na kifwani, buku ya Luzabusu ke zonzá ti bantangu tatu na ndambu ke pesá bilumbu 1260. (Luzabusu 12:6, 14) Bantangu sambwadi kele bilumbu 1260 bambala zole (1260x2). Ni yina ke pesá bilumbu 2520. Ntangu ya nkaka, Biblia ke sadilá kilumbu mosi samu na kuzonzila mvula to année mosi. (Ezekiele 4:6) Ni faso yina ya kele na mbikululu ya bantangu sambwadi na buku ya Danyele—bantangu sambwadi yina zola zonza bamvula 2520.

5. Na 1914 yinza sobaka

Tala VIDEO.

VIDEO: Na 1914 yinza sobaka (1:10)

Yesu zonzá wapi mutindu yinza zolá vanda na manima ya ntangu yina yandi zolá banda kuyala. Tanga Luke 21:9-11, mpe na manima beto zonzila kyuvu yayi:

Na bamambu nyonso yina ba me zonzila na kati ya baverse yayi, wapi yina nge me tala ti ya ke na lunganá bubu yayi?

Ntumwa Polo zonzilá mavanga ya bantu na bilumbu ya nsuka ya luyalu ya bantu. Tanga 2 Timote 3:1-5, mpe na manima beto zonzila kyuvu yayi:

Wapi mavanga yina ba me zonzila awa nge ke na talá na bantu bubu yayi?

6. Lakisa ti nge ke na kwikilá ti kimfumu ya Nzambi ke na yalaka

Tanga Matayi 24:3, 14, mpe na manima beto zonzila byuvu yayi:

Wapi kisalu ya mfunu ke na lakisá ti kimfumu ya Nzambi ke na yalaka?
Wa’ faso nge mpe lenda tula diboko na kisalu yango?

Luyalu ya kimfumu ya Nzambi bandá, mpe ntama mingi ve, ya ke yala ntoto nyonso. Tanga Baebre 10:24, 25, mpe na manima beto zonzila kyuvu yayi:

Yinki mosi na mosi na beto me bonga kusala samu “Kilumbu ya Mfumu me kuma pene-pene”?

Kana nge me longoka mambu yina lenda sadisa, to lenda vuukisa bantu ya nkaka, yinki ya ke nata nge na kusala?

MUNTU LENDA YUFULA: “Samu na yinki Bambangi ya Yehova ke zonzilá mingi 1914?”

Wapi mvutu nge ke pesa?

NA BUNKUFI

Bambikululu ya Biblia mpe bamambu yina ke na salamá na kati ya yinza, ke na lakisá ti kimfumu ya Nzambi ke na yalaka. Beto ke lakisá ti beto ke kwikilá na yawu, na kusamuná nsangu ya mbote yayi mpe na kuvukaná na bampangi na balukutakanu ya kimvuka.

Mambu ya kusimba

Yinki salamá na nsuka ya bantangu sambwadi yina Danyele zonzilaka?
Samu na yinki nge me ndima ti kimfumu ya Nzambi bandá kuyala na 1914?
Wapi mutindu nge lenda lakisa ti nge ke na ndimá ti kimfumu ya Nzambi ke na kuyalaka?

Sonika kilumbu yina kileso me manisa:

Yina nge lenda sala

Sala bangolo samu na kukuma mosi ya ba yina ke samuná nsangu ya mbote.

Mambu ya nkaka ya kusala:

Your other goal