KILESO 35

Wapi mutindu beto lenda baka mikanu ya mbote

KUWA NA

Na luzingu ya beto, beto nyonso ke baká mikanu. Mingi ya yawu lenda natina beto bambote to ve, mpe lenda kulisa to kufwa kindiku ya beto na Yehova. Na kifwani, beto ke baká mikanu na yina me tadila kisika yina beto ke vanda, faso beto ke sala samu na kuzwa mbongo mpe kana beto ke kwela to ve. Ntangu beto ke baká mikanu ya mbote, beto lenda vanda na luzingu ya kilengi mpe kusepelisa Yehova.

1. Wapi mutindu nge lenda sadila Biblia samu na kubaka mikanu ya mbote?

Tekila nge baka mukanu, sambila Yehova samu yandi sadisa nge, mpe sosa na Biblia dikanisi ya Yehova samu na mambu yina. (Tanga Bingana 2:3-6.) Na bamambu ya nkaka, bansiku ya Yehova ke pwelele. Kutumama na yawu, ke vanda mbote mingi.

Kasi yinki nge ke sala kana ya kele ve na nsiku ya Biblia yina ke na zonzilá pwelele mambu yina nge fwana kusala? Yehova ke bika ata fioti ve kutwadisa nge “na nzila yina nge fwana tambula.” (Izaya 48:17) Wapi mutindu yandi ke sala yawu? Yandi tulá mambu yina lenda twadisa beto na Biblia. Bamambu yango ke sadisá beto na kuzaba yina Nzambi ke zolá mpe yina yandi ke zolá ve. Bantangu ya nkaka beto lenda zaba yina Yehova ke kanisá to ke zolá, ntangu beto ke tangá masolo ya Biblia. Ni yawu ke sadisa beto na kubaka mukanu yina ke pesa yandi kilengi.

2. Tekila nge baka mukanu, na yinki nge me lunga kukanisa?

Biblia ke zonzá: “Muntu ya mayela ke tadilaka konso kisika yandi ke tulaka dikulu ya yandi.” (Bingana 14:15) Ya zola zonza ti tekila beto baka konso mukanu, beto me bonga kubaka ntangu ya kukanisa mbote-mbote na yawu. Na yawu, beto lenda yufula: ‘Wapi malongi ya Biblia mu lenda sadila na mambu yayi? Ntangu mu ke baka mukanu yayi, mu ke vanda kwandi na kizunu na ntima? Yinki mukanu yina mu ke baka ke sala na bampangi? Ya kulutila mfunu, mukanu yango ke pesa kwandi Yehova kilengi?’—Kulonga Misiku 32:29.

Yehova me lunga kuzonza na beto wapi yina ke mambu ya mbote mpe wapi yina ke mambu ya yimbi. Ntangu beto ke zaba mbote-mbote mambu ya yandi, mpe ke baka mukanu ya kusadila yawu, beto ke bongisa makanisi ya ntima ya beto. Ntima awa, kele ndinga yina ke zonzá na kati ya beto mambu yina ke mbote to ke yimbi. (Baroma 2:14, 15) Kana beto me sadila mambu ya Biblia samu na kubongisa ntima ya beto, ya ke sadisa beto na kubaka mikanu ya mbote.

SOSA KUZABA MBOTE-MBOTE

Tala wa’ faso mambu ya Biblia lenda twadisa ntima ya beto na kubaka mikanu ya mbote.

3. Bika Biblia twadisa nge

Wapi mutindu Biblia lenda twadisa beto ntangu beto ke baká mikanu? Tala VIDEO, mpe na manima beto zonzila byuvu yina ke landa.

VIDEO: Bika Biblia twadisa nge (5:54)

Wapi dikabu ya kitoko Yehova pesá beto?
Samu na yinki Yehova pesá beto makoki ya kubaka mikanu samu na beto mosi?
Yinki yandi pesá beto samu beto baka mikanu ya mbote?

Samu na kutala kifwani mosi ya malongi ya Biblia, tanga Baefeze 5:15, 16. Na manima beto zonzila wa’ faso nge lenda “kusadila mbote ntangu yina Nzambi me pesa” beto samu na . . .

kutanga Biblia bilumbu nyonso.
kukuma kento to bakala ya mbote, bibuti mpe mwana ya mbote.
kukwenda na balukutakanu.

4. Longa ntima ya nge samu na kubaka mikanu ya mbote

Ntangu ya ke na nsiku yina ke na zonzilá pwelele mambu yina ke mbote to yimbi samu na beto, ya ke vandá ve mpasi na kubaka mukanu ya mbote. Kasi yinki kusala ntangu nsiku yango kele ve pwelele? Tala VIDEO, mpe na manima beto zonzila kyuvu yina ke landa.

VIDEO: “Bumba ntima ya nge” (5:13)

Na video, yinki mpangi ya beto ya kento me sala samu na kunata ntima ya yandi na kubaka mukanu ya mbote, yina ke sepelisa Yehova?

Samu na yinki beto me bonga ve kulomba na bantu ya nkaka na kubaka mikanu samu na beto? Tanga Baebre 5:14, mpe na manima beto zonzila byuvu yayi:

Ata ti ya lenda talana pete na kulomba na bantu ya nkaka mambu yina ke mbote to yimbi, kasi yinki beto me lunga kusala beto mosi?
Yinki ke sadisa nge na kulonga ntima ya nge mpe na kubaka mikanu ya mbote?

Mutindu mosi na carte, makanisi ya mbote ke sadisá beto na kubaka mikanu ya mbote

5. Zitisa mikanu yina bampangi ke bakaka

Bantu nyonso ke baká ve mikanu faso mosi. Na yawu, wa’ faso beto lenda lakisa buzitu na mikanu ya bampangi? Beto tala bamambu zole:

Mambu 1: Mpangi mosi ya kento yina ke zolá kuzenga basuki mutindu bakala, me kwenda na kimvuka kisika bampangi mingi ya bakento ke zolá ve faso ya kusala yina.

Tanga Baroma 15:1 mpe 1 Bakorinto 10:23, 24, mpe na manima beto zonzila byuvu yayi:

Wa’ faso baverse yayi lenda sadisa mpangi ya kento yina? Yinki nge ke sala kana nge kele na muntu yina ke na talá yimbi na kusala mambu yina nge ke ve na talá yimbi?

Mambu 2: Mpangi mosi ya bakala zaba ti Biblia ke niminá ve na kunwa malafu, kasi yandi baká mukanu ya kunwá ve yawu. Ba me bokila yandi na kukwenda kudya na bampangi, mpe kisika yina, yandi ke na talá bampangi ke na kunwá malafu.

Tanga Longi 7:16 mpe Baroma 14:1, 10, mpe na manima beto zonzila byuvu yayi:

Wa’ faso baverse yayi lenda sadisa mpangi ya bakala yina? Yinki nge ke sala kana nge me tala muntu ke na salá mambu yina nge ke talá yimbi?

Yinki nge me bonga kusala samu na kubaka mikanu ya mbote?

1. Lomba na Yehova na kusadisa nge na kubaka mikanu ya mbote.—Zaki 1:5.

2. Sosa na kati ya Biblia mpe na kati ya mikanda ya beto bamambu yina lenda sadisa nge. Nge lenda tala mpe bakristo yina ke ya kuyela na kimpeve.

3. Kanisa na mambu yina mukanu nge ke baka ke sala na nge mosi mpe na bampangi.

BANTU YA NKAKA KE ZONZAKA: “Sala yina nge ke na nsatu ya kusala. Kukipe ve yina bantu ya nkaka ke zonzaka.”

Ntangu beto ke baká mikanu, samu na yinki beto me bonga kukanisa na yina ya ke sala Nzambi, mpe bampangi ya beto?

NA BUNKUFI

Beto ke baká mikanu ya mbote ntangu beto ke zabá faso Yehova ke na tadilá mambu yango, mpe ntangu beto ke kanisá na yina ya lenda sala na bampangi.

Mambu ya kusimba

Wa’ faso nge lenda baka mikanu yina ke pesa Yehova kilengi?
Wa’ faso nge lenda longa ntima ya nge?
Wapi mutindu nge lenda zitisa mikanu yina bampangi ke bakaka?

Sonika kilumbu yina kileso me manisa:

Yina nge lenda sala

Kanisa na mukanu mosi yina nge ke na sosá kubaka na bilumbu yina ke kwiza. Sadila bamambu 3 yina ba me zonzila na kitini “ Yinki nge me bonga kusala samu na kubaka mikanu ya mbote?”

Mambu ya nkaka ya kusala:

Your other goal