Muntu nyonso ke zolá ti bandiku ya yandi vanda bantu yina ke zonzá kaka matsyeleka. Yehova mpe ke zolá ti bandiku ya yandi vanda bantu yina ke zonzá kaka matsyeleka. Kasi ya ke mpasi na kuvanda kaka muntu ya matsyeleka, na kati ya yinza yina bantu mingi me zaba kaka kuvuna. Wapi yina ke bambote ya kuvanda muntu ya matsyeleka na mambu nyonso?

1. Samu na yinki ya ke mfunu na kuvanda bantu yina ke zonzá ve luvunu?

Ntangu beto ke zonzá kaka matsyeleka to ke vuná ve bampangi, beto ke lakisá na Yehova ti beto ke zolá mpe ke zitisaka yandi. Beto kuzimbana ve ti Yehova zaba makanisi ya beto, mpe mambu nyonso yina beto ke salaka. (Baebre 4:13) Yandi ke talá ntangu beto ke zonzá kaka matsyeleka, mpe ya ke pesaka yandi kilengi. Biblia ke zonzá ti: “Yehova ke mangaka muntu ya luvunu, kasi yandi ke salaka kindiku ya ngolo na bantu ya mbote.”—Bingana 3:32.

2. Wa’ faso kuvanda muntu ya matsyeleka bilumbu nyonso?

Yehova zola ti “konso muntu tubila mpangi ya yandi tsyeleka.” (Zakari 8:16, 17) Yinki ya zola zonza? Ntangu beto ke sololá na dikanda ya beto, na bampangi ya kisalu, na bampangi ya kimvuka, to na bantu ya luyalu, beto fwana kuvuna ve mpe kuzonza ve tsyeleka ya ndambu. Muntu yina ke zonzá tsyeleka ke yibá ve, to ke vuná ve samu na kuzwa mbongo to kima ya nkaka. (Tanga Bingana 24:28 na Baefeze 4:28.) Yandi ke futá mpe bampaku ya luyalu (impôts). (Baroma 13:5-7) Na kusalá faso yayi, beto ke lakisa ti “beto ke sosaka na kuvanda na nkadulu (ndyatulu) ya mbote na mambu nyonso.”—Baebre 13:18.

3. Wapi yina ke bambote ya kuvanda kaka muntu yina ke zonzá tsyeleka?

Ntangu bantu ke zabilá beto mutindu muntu yina ke vuná ve, ba ke tudilá beto ntima. Na kusalá faso yayi, beto ke sala ti bumosi vanda na kati ya kimvuka, kaka mutindu ya ke vandá na kati ya dikanda yina ke na luzolo mingi. Ya ke sadisa beto na kuvanda mpe na kizunu ya ntima. Kana beto vanda bantu yina ke vuná ve, beto ke “pesa nkembo na mambu nyonso na ndongosolo (malongi) ya Nzambi kivuukisi ya beto,” mpe beto ke pesa ba yina ke sadilá ve Yehova nsatu ya kusadila yandi.—Tite 2:10.

 SOSA KUZABA MBOTE-MBOTE

5. Beto vanda bantu yina ke vuná ve ntangu nyonso

 6. Bambote ya kuzonza matsyeleka

Ntangu ya nkaka kuzonza matsyeleka lenda natina beto bampasi. Ata faso yina, kuzonza matsyeleka ke vandá kaka mambu ya kulutila mbote ya kusala. Tanga Nkunga 34:12-16, mpe na manima beto zonzila kyuvu yayi:

• Wa’ faso kuzonzá kaka matsyeleka lenda bongisa luzingu ya nge?

1. Babakala na bakento yina ke zonzá kaka matsyeleka ke kumisá ngolo dikwela ya bawu

2. Bantu yina ke zonzá kaka matsyeleka na kisalu ya bawu, bamfumu ya bawu ke tudilá bawu ntima

3. Bantu ya luyalu ke sepelá na bantu yina ke zonzá matsyeleka

 NA BUNKUFI

Yehova zola ti bandiku ya yandi vanda bantu ya matsyeleka na mambu yina ba ke zonzá mpe ke salaka.

Mambu ya kusimba

• Wapi yina ke bafaso ya kuvanda bantu yina ke zonzá kaka matsyeleka?

• Samu na yinki ya ke buzoba na kukanisa ti beto lenda bumba matsyeleka?

• Samu na yinki nge zolá zonza matsyeleka ntangu nyonso?