KILESO 37
Dikanisi ya Biblia samu na kisalu mpe mbongo
Ya me kuminá nge na kuvanda na manyongi na yina me tadila kisalu to mbongo? Ya lenda vanda mpasi na kukipe bansatu ya beto mpe na kusambila Yehova na faso yina yandi me zola. Kasi, ya ke kilengi na kuzaba ti Biblia ke pesá malongi mosi ya mbote yina lenda sadisa beto.
1. Yinki Biblia ke zonzá na yina me tadila kisalu?
Nzambi zola ti beto tala kilengi na kisalu ya beto. Biblia ke zonzá ti “kima ya kulutila mbote samu na muntu kele ve, katula kaka . . . kuwa kilengi samu na kisalu ya yandi ya ngolo.” (Longi 2:24) Yehova ke salá mingi. Ntangu beto ke landá kifwani ya yandi na kusalá mingi, beto ke pesá ntima ya yandi kilengi, beto mosi mpe ke talá kilengi.
Kisalu ke mfunu, kasi beto fwana kubika ata fioti ve ya kuma kima ya kulutila mfunu na bundiku ya beto na Yehova. (Yoane 6:27) Yehova zonzá ti, ntangu beto ke tula yandi na kisika ya ntete na luzingu ya beto, yandi ke pesa beto yina beto ke na yawu nsatu samu na kuzinga.
2. Wapi yina ke faso ya mbote ya kutadila mbongo?
Ata ti Biblia ke zonzá ti “mbongo ke bumbisaka,” kasi ya ke kebisá beto mpe ti mbongo yawu mosi kaka, lenda pesa ve beto kilengi. (Longi 7:12) Biblia ke lombá beto na kuvanda ve na luzolo ya mbongo, kasi ya ke zonzá na beto: “beno yangalala na bima yina ke na beno.” (Tanga Baebre 13:5.) Ntangu beto ke talá kilengi na yina ke na beto, beto ke fuluka ve na manyongi ya kukanisa ti beto ke ve na nyonso yina me lunga samu na luzingu. Beto ke vanda mpe ve bantu ya bamfuka. (Bingana 22:7) Ya ke sadisa beto na kubwa ve na mitambu ya bansaka (jeux) ya mbongo, mpe kuzwa bisalu to makanisi ya kusosa bimvwama na mbangu-mbangu.
3. Wa’ faso beto lenda sadila mbongo na faso ya mbote?
Yehova ke Nzambi mosi yina ke kabulaka. Beto ke landá kifwani ya yandi ntangu beto ke “lembaka ve na kusadisa, mpe [. . .] kukabula na bampangi.” (1 Timote 6:18) Beto lenda sadila mbongo ya beto na faso ya mbote, na kupesá makabu samu na kimvuka, na kusadisá mpe ba yina ke na mpasi, mingi-mingi bampangi ya beto ya kimpeve. Kima ya mfunu na Yehova kele ve yina beto me pesa, kasi makanisi yina me nata beto na kupesa yawu. Ntangu beto ke pesá na kilengi nyonso, beto ke vandá na kilengi ya kulutila mpe beto ke sepelisaka Yehova.—Tanga Bisalu 20:35.
SOSA KUZABA MBOTE-MBOTE
Tala bambote ya kubika kisalu na kisika ya yawu mpe bambote ya kuvanda muntu yina ke sepelá na yina yandi ke na yawu.
4. Pesa nkembo na Yehova na faso ya nge ya kusala
Bundiku ya beto na Yehova zolá nata beto na kutadila kisalu mutindu yandi ke tadilaka yawu. Tala VIDEO, mpe na manima beto zonzila byuvu yina ke landa.
-
Na video, yinki me simba ntima ya nge na yina me tadila ndyatulu ya Jason na kisalu ya yandi?
-
Yinki yandi salá samu na kubika kisalu na kisika ya yawu?
Tanga Bakolose 3:23, 24, mpe na manima beto zonzila kyuvu yayi:
-
Samu na yinki mutindu ya beto ya kutadila kisalu ke mfunu?
Kisalu ke mfunu, kasi beto fwana kubika ata fioti ve kisalu kuma kima ya kulutila mfunu na bundiku ya beto na Yehova
5. Kusepela na yina ke na beto ke natina beto bambote
Bantu mingi ke sosá kuzwa mbongo ya kulutila. Kasi Biblia ke lombá beto na kusala ve faso yina. Tanga 1 Timote 6:6-8, mpe na manima beto zonzila kyuvu yayi:
-
Yinki Biblia ke na lombá beto na kusala?
Ata ti beto ke kaka na ndambu, beto lenda vanda na kilengi. Tala VIDEO, mpe na manima beto zonzila kyuvu yina ke landa.
-
Ata ti ba ke ve na mbongo, yinki ke na salá ti makanda yayi vanda na kilengi?
Yinki lenda kumina beto kana beto ke na mbongo, kasi beto ke na sosá kaka kubwela? Yesu pesá kifwani samu na kulakisa ti kusala mutindu yina ke yimbi. Tanga Luke 12:15-21, mpe na manima beto zonzila kyuvu yayi:
-
Yinki nge me longoka na kifwani yina Yesu me pesa?—Tala verse 15.
Tanga mpe fwanisa mambu yina ke na Bingana 10:22 mpe yina ke na 1 Timote 6:10. Na manima beto zonzila byuvu yayi:
-
Samu na nge, yinki me lutila mfunu: Kuvanda na kindiku na Yehova to kuvanda na mbongo mingi? Samu na yinki nge me zonza faso yina?
-
Wapi bamambu ya mpasi lenda kumina beto kana beto ke sosá ntangu nyonso na kubwela na mbongo yina beto ke na yawu?
6. Yehova ke lungisa bansatu ya beto
Ntangu ya ke vandá mpasi na beto na kuzwa kisalu to mbongo, ya lenda sadisa beto na kuzaba kana beto ke na kiminu na Yehova to ve. Tala VIDEO samu na kutala yinki kusala ntangu bamambu ya mutindu yayi ke meká kiminu ya beto, mpe na manima beto zonzila byuvu yina ke landa.
-
Na video, wapi bampasi mpangi ya beto yayi kutaná na yawu?
-
Yinki sadisaka yandi na kununga bampasi yango?
Tanga Matayi 6:25-34, mpe na manima beto zonzila kyuvu yayi:
-
Yinki Yehova me zonza ti yandi ke sala na ba yina ke tulaka yandi na kisika ya ntete na luzingu ya bawu?
BANTU YA NKAKA KE ZONZAKA: “Mu lenda kwenda ve na balukutakanu nyonso. Mu me bonga kusala samu na kudikisa dikanda ya munu.”
-
Wapi verse lenda sadisa nge na kundima ti, kana nge tula mambu ya kimpeve na kisika ya ntete na luzingu ya nge, Yehova ke lungisa bansatu ya nge?
NA BUNKUFI
Kuvanda na kisalu mpe mbongo ke mfunu na luzingu, kasi beto me bonga ata fioti ve kubika yawu kanga beto nzila na kusadila Yehova.
Mambu ya kusimba
-
Yinki lenda sadisa nge na kuvanda na dikanisi ya mbote na yina me tadila kisalu?
-
Wa’ faso kusepela na bima yina nge ke na yawu lenda natina nge bambote?
-
Wapi mutindu nge lenda lakisa ti nge ke na tulá ntima na mambu yina Yehova zonzá, ya kukipe bisadi ya yandi?
SOSA KUZABA DYAKA
Tala kana Biblia ke zonzá ti mbongo ke yimbi.
“Mbongo ke kwandi musisa ya mambu nyonso ya yimbi?” (Tanga yawu na jw.org)
Longoka faso ya kukabula yina ke pesaka Yehova kilengi.
“Yinki Biblia ke zonzá na yina me tadila kukabula?” (Tanga yawu na jw.org)
Bansaka ya mbongo ke kwandi yimbi?
“ D’après la Bible : Les jeux d’argent ” (Réveillez-vous !, Mars 2015)
Tala yinki nataka muntu mosi yina vandá muyibi mpe vanda bulá bansaka ya mbongo na kusoba luzingu ya yandi.
“ Les courses de chevaux étaient ma passion ” (La Tour de Garde, 1er Novembre 2011)
