Kanisa na mama mosi ya luzolo yina ke na bongisá mwana ya yandi ya fioti samu na kukwenda na lukolo (école). Yandi ke sosa kutala kana mwana ya yandi me yobila mpe kana bilele ya yandi ke ve na mvindu. Ni yawu ke sadisa yandi na kuvanda na mavimpi ya mbote, mpe ya ke lakisa na bantu ya nkaka ti bibuti ya yandi ke zolaka yandi mpe ke kipeke yandi. Kaka faso bibuti yina, Tata ya beto ya luzolo, Yehova, zola ti beto vanda ve na mvindu—ya vanda na nzutu ya beto, na makanisi ya beto, nzonzolo ya beto mpe bansalulu ya beto. Kuvanda na bunkete (propre) mpe ya kuvedila (pur), ke natiná beto bambote mpe ya ke pesá nkembo na Yehova.

1. Yinki beto lenda sala samu na kuvanda na bunkete?

Yehova me zonza na beto: “Beno vanda bantu ya santu.” (1 Piere 1:16) Samu na kuvanda santu beto me lunga kuvanda na makanisi, nzonzolo mpe ndyatulu ya mbote mpe kuvanda na bunkete. Beto ke lakisa ti beto ke na bunkete, na kuyobilá ntangu nyonso, na kusukulá mpe kuyidiká bilele, yinzo mpe tomabilu ya beto. Beto lenda tula mpe diboko na kukombolá mpe kusukulá Yinzo ya Kimfumu. Na kuvandá na bunkete, beto ke pesa nkembo na Yehova.—2 Bakorinto 6:3, 4.

2. Samu na kuvanda ya kuvedila, wapi bifu beto me fwana kulosa?

Biblia ke lombá beto na “kukatula mvindu nyonso yina ke bebisaka nzutu mpe mpeve.” (2 Bakorinto 7:1) Ya zola zonza ti beto fwana kusala bangolo samu na kulosa bima nyonso yina lenda bebisa nzutu ya beto mpe makanisi ya beto. Makanisi ya beto me lunga kupesa kilengi na Yehova. Na yawu, beto sala nyonso samu na kulosa makanisi ya yimbi. (Nkunga 104:34) Beto fwana kusala mpe bangolo samu na kuvanda na nzonzolo ya mbote.—Tanga Bakolose 3:8.

Yinki dyaka lenda nata mvindu na nzutu, nzonzolo, makanisi mpe ndyatulu ya beto? Bima ya nkaka lenda bebisa nzutu ya beto. Na yawu, beto fwana kulosa bima mutindu tabaka, cigarette, dyamba, chicha mpe ba drogues ya nkaka. Kulosa bima nyonso yayi, ke sadisa beto na kuvanda na mavimpi ya mbote mpe beto ke lakisa ti luzingu ke dikabu mosi ya mfunu samu na beto. Beto ke vanda mpe na makanisi, na ndyatulu ya kuvedila, na kusalá bangolo samu na kumanga bansalulu ya mvindu mutindu, kusakana na binama ya kuvukisa nzutu (masturbation), kutala bafoto na bavideo yina ke lakisá bantu yina ke bipene to ke na vukisá nzutu, to kutanga mikanda mpe kuwa banzimbu yina ke vumbulá nsatu ya kuvukisa nzutu (pornographie). (Nkunga 119:37; Baefeze 5:5) Ya lenda vanda mpasi na kubika bansalulu yayi, kasi Yehova ke sadisa beto na kulosa yawu.—Tanga Izaya 41:13.

 SOSA KUZABA MBOTE-MBOTE

3. Bunkete ke pesá nkembo na Yehova

Beto lenda zaba dikanisi ya Yehova na yina me tadila bunkete kana beto tanga misiku yina yandi pesá na bana ya Izraele. Tanga Kubasika 19:10 na 30:17-19, mpe na manima beto zonzila byuvu yayi:

• Yinki baverse yayi me lakisa na yina me tadila dikanisi ya Yehova samu na bunkete?

• Yinki nge lenda sala ntangu nyonso samu na kubumba bunkete?

Ya ke lombá ntangu mpe bangolo mingi samu na kuvanda na bunkete. Kasi beto lenda sala yawu ata kisika yina beto kele mpe kana beto ke na mbongo to ve. Tala VIDEO, mpe na manima beto zonzila kyuvu yina ke landa.

• Wapi mutindu kuvanda na bunkete ke pesá nkembo na Yehova ntangu beto ke samunaka?

4. Losa bansalulu ya mvindu

Kana nge ke kunwá cigarette to ba drogues ya nkaka, nge me zaba ti ya ke mpasi mingi na kubika yawu. Yinki nge lenda sala? Kanisa na mambu ya yimbi yina ya ke na natiná nge. Tanga Matayi 22:37-39, mpe beto tala yinki kunwa tabaka mpe kusadila ba drogues ke salá na . . .

• kindiku ya muntu na Yehova.

• dikanda ya yandi mpe na bantu ya nkaka.

Kanisa na yina nge ke sala samu na kulosa bansalulu ya yimbi mpe sonika yawu. a Tala VIDEO.

Tanga Bafilipi 4:13, mpe na manima beto zonzila kyuvu yayi:

• Wapi mutindu kuvanda na kifu ya kusambila, kulongoka Biblia mpe kukwenda na balukutakanu lenda sadisa muntu na kununga bansalulu ya yimbi?

 5. Sala bangolo na kulosa makanisi mpe bansalulu ya mvindu

Tanga Bakolose 3:5, mpe na manima beto zonzila byuvu yayi:

• Wa’ faso beto me zaba ti kutala bizizi ya bantu yina ke vukisá nzutu, kufidisa ba messages, bafoto to bavideo yina ke vumbulá nsatu ya kuvukisa nzutu mpe kusakana na binama ya kuvukisa nzutu ke mvindu na meso ya Yehova?

• Nge me kanisa ti ya ke mbote Yehova lomba na beto na kuvanda na makanisi, nzonzolo mpe ndyatulu ya kuvedila? Samu na yinki nge me zonza faso yina?

Beto tala wa’ faso beto lenda sala samu na kulosa makanisi ya mvindu. Tala VIDEO.

Yesu sadilá kifwani mosi samu na kulakisa mfunu ya kubumba makanisi, nzonzolo mpe ndyatulu ya kuvedila. Tanga Matayi 5:29, 30, mpe na manima beto zonzila kyuvu yayi:

• Yesu vanda sosa ve kuzonza ti beto talisa banzutu ya beto mpasi, kasi yandi vanda sosa kuzonza ti beto me lunga kusala bangolo. Wapi bima ya mfunu muntu lenda sala samu na kulosa makanisi ya mvindu? b

Zaba ti kana nge ke na nwaná na kubika makanisi ya mvindu, Yehova ke na sepelá na bangolo ya nge. Tanga Nkunga 103:13, 14, mpe na manima beto zonzila kyuvu yayi:

• Kana nge ke na nwaná na nsalulu mosi ya yimbi, wapi mutindu verse yayi lenda sadisa nge na kulemba ve?

 NA BUNKUFI

Ntangu beto ke salá bangolo na kubumba bunkete, kuvanda na makanisi, nzonzolo mpe ndyatulu ya mbote, beto ke pesá Yehova kilengi.

Mambu ya kusimba

• Samu na yinki ya ke mfunu na kuvanda na bunkete?

• Wapi mutindu beto lenda vanda na bunkete?

• Wapi mutindu nge lenda bumba makanisi mpe ndyatulu ya kuvedila?