Yesu longá ti bilandi ya yandi me lunga kuvanda ve “bantu ya yinza.” (Yoane 15:19) Ya zola zonza ti beto ke vandá ya kukangama kaka na kimfumu ya Nzambi. Na kifwani beto ke kotá ve na politique mpe na ba guerres to na muvusu ya yinza. Ntangu ya nkaka, kutula ve yintu na mambu ya politique lenda vanda mpasi. Bantu lenda seka beto samu beto ke kotá ve na mambu ya politique to na mambu ya nkaka ya yinza. Wa’ faso beto lenda vanda kaka ya kukangama na Nzambi ya beto Yehova mpe na kimfumu ya yandi?

1. Wapi mutindu bakristo ya tsyeleka ke tadilá baluyalu ya bantu?

Bakristo ke zitisá baluyalu ya bantu. Beto ke salá mutindu Yesu zonzá mpe “ke [pesaka] na ntinu Sezale bima yina kele ya Sezale.” Na yawu, beto ke tumamá na misiku ya bwala mutindu musiku ya kufuta mpaku. (Marke 12:17) Biblia ke longá ti kana baluyalu ya bantu kele, ya ke samu ni Yehova me bika ya salama mutindu yina. (Baroma 13:1) Ni yawu ke na natá beto na kuzaba ti, bimfumu ya bantu ke kaka na lutumu ya fioti na mantwala ya Nzambi. Beto ke kwikilá ti kaka ni Nzambi na kimfumu ya yandi lenda yidika bamambu ya yinza.

2. Wa’ faso beto lenda lakisa ti beto ke ya kukangama kaka na kimfumu ya Yehova?

Mutindu Yesu, beto ke kotá ve na mambu ya politique. Ntangu bantu talá mosi ya bimangu ya Yesu, ba sosá kutula yandi mfumu ya bawu awa na ntoto. Kasi Yesu mangaka (Yoane 6:15) Samu na yinki yandi mangaka? Mutindu yandi zonzá na manima, “Kimfumu ya munu kele ve ya yinza yayi.” (Yoane 18:36) Mutindu bilandi ya Yesu, beto ke lakisá ti beto ke kaka ya kukangama na kimfumu ya Nzambi na bafaso mingi. Na kifwani, beto ke nwaná ve ba guerres. (Tanga Mika 4:3.) Beto ke zitisá bidimbu ya bwala mutindu drapeau, beto ke pesá ve yawu nkembo yina beto me lunga kupesa na Nzambi. (1 Yoane 5:21) Beto ke soolá ve bimvuka ya politique to bantu yina zola kubaka kimfumu. Ni na kusalá mutindu yayi mpe mitindu mingi ya nkaka beto ke lakisá ti beto ke ya kukangama kaka na kimfumu ya Nzambi.

 SOSA KUZABA MBOTE-MBOTE

3. Bakristo ya tsyeleka ke kotá ve na mambu ya politique

Yesu na bilandi ya yandi bikilá beto kifwani samu na mambu yayi. Tanga Baroma 13:1, 5-7 na 1 Piere 2:13, 14. Na manima, tala VIDEO mpe beto zonzila byuvu yina ke landa.

• Samu na yinki beto me lunga kuzitisa bantu ya luyalu?

• Wa’ faso beto lenda lakisa ti beto ke tumamá na bawu?

Na bantangu ya guerre, bayinsi ya nkaka ke zonzá ti ba ke ve na kati ya mambu yina, kasi ba ke sadisá bayinsi yina ke nwanaka. Yinki bakristo ya tsyeleka me lunga kusala? Tanga Yoane 17:16. Na manima, tala VIDEO mpe beto zonzila kyuvu yina ke landa.

• Yinki zola zonza kukota ve na mambu ya politique?

Yinki beto ke sala kana bamfumu ya yinsi me lomba beto na kusala mambu yina ke na kwelaná ve na luzolo ya Nzambi? Tanga Bisalu 5:28, 29. Na manima, tala VIDEO mpe beto zonzila byuvu yina ke landa.

• Kana musiku ya luyalu ke na kwelaná ve na musiku ya Nzambi, na wapi yina beto ke tumama?

• Na wapi bamambu nge me kanisa ti mukristo me lunga ve kutumama na luyalu ya bantu?

 4. Beto kukota ve na mambu ya yinza na makanisi mpe na ndyatulu ya beto

Tanga 1 Yoane 5:21. Na manima, tala VIDEO mpe beto zonzila byuvu yina ke landa.

• Na video, samu na yinki Ayenge mangá kupesa nkembo to mbote na drapeau, kuyimba nzimbu ya yinsi ya yandi (hymne nationale), to kukota na mambu ya politique?

• Nge me kanisa ti yandi baká mukanu ya mbote?

Wapi mambu ya nkaka lenda sala ti ya vanda mpasi samu na beto na kukota ve na mambu ya politique? Tala VIDEO, mpe na manima beto zonzila byuvu yina ke landa.

• Wa’ faso beto lenda lakisa ti beto ke kotá ve na mambu yina ke kabulá yinza, na ntangu ya bansaka ya nene yina ke vukisá babwala mingi (compétition sportive internationale)?

• Wa’ faso beto lenda lakisa ti beto ke na kotá ve na mambu ya politique, ata ntangu mambu yina bantu ya politique ke zonzá mpe ke salá lenda natina beto bambote to ve?

• Yinki lenda kumina beto kana beto ke lutisá ntangu mingi na kuwa, kutala to kutanga mambu ya politique to na bantu yina ke zonzilá mingi mambu ya politique?

 NA BUNKUFI

Bakristo ke salá nyonso samu na kukota ve na mambu ya politique na makanisi, nzonzolo mpe ndyatulu ya bawu.

Mambu ya kusimba

• Wa’ faso beto ke tadilá baluyalu ya bantu?

• Samu na yinki beto me lunga kukota ve na mambu ya politique na makanisi, nzonzolo mpe ndyatulu ya beto?

• Wapi bamambu lenda sala ti ya vanda mpasi samu na beto na kukota ve na bamambu yina ke kabulá yinza?