KILESO 47
Nge me bongama samu na kuzwa mbotokolo?
Na kulongoka ya nge ya Biblia, nge me longoka mambu mingi na yina me tadila Yehova. Nge me sala bangolo mingi samu na kusadila mambu yina nge me longoka. Kasi, ya lenda vanda na mambu yina lenda nata nge na kukanisa ti nge ke ve ntete ya kubongama samu na kukipesa na Yehova mpe kuzwa mbotokolo. Na kileso yayi, beto ke zonzila ndambu ya bamambu yina lenda kanga nge nzila na kuzwa mbotokolo mpe faso nge lenda nunga yawu.
1. Nge me fwana kwandi kuzaba mambu nyonso ya Biblia tekila nge kuzwa mbotokolo?
Tekila nge kuzwa mbotokolo, nge fwana “bakula butsyelika.” (1 Timote 2:4) Kasi ya zola zonza ve ti nge fwana zaba mambu nyonso ya Biblia to kuzwa bamvutu na byuvu nyonso yina bantu ke yufula nge tekila nge kuzwa mbotokolo. Ata bakristo yina kuzwá mbotokolo bamvula mingi me luta, ke biká ve na kulongoka. (Bakolose 1:9, 10) Kasi nge fwana zaba mambu ya Biblia yina ke mfunu. Na yawu, bakuluntu ya kimvuka ke sadisa nge na kuzaba kana mambu yina nge me zaba na Biblia ke ya kulunga samu nge kuzwa mbotokolo.
2. Wapi yina ke ndambu ya bamambu nge me lunga kusala tekila nge kuzwa mbotokolo?
Biblia ke zonzá ti tekila nge kuzwa mbotokolo, nge fwana “balula ntima . . . mpe kubaluka.” (Tanga Bisalu 3:19, nwt-MK.) Ya zola zonza ti nge me lunga kunyonga masumu yina nge salá mpe kulomba na Yehova na kulemvokila nge. Nge me lunga mpe kulosa ndyatulu yina ke yimbi na meso ya Yehova, mpe na ntima mosi kusala bangolo samu na kusala mambu yina ke pesá yandi kilengi. Kima ya nkaka ya kusala, ni kubanda kuvukana na kimvuka na balukutakanu mpe kusamuna kintwadi na kimvuka.
3. Samu na yinki nge me lunga ve kubika boma kanga nge nzila?
Bantu ya nkaka ke vandá na boma ya kulenda ve kusala mambu yina ba zonzá na Yehova na lusambu, ntangu ba kukipesá na yandi. Ya tsyeleka, ya kuminá bisadi ya Yehova yina Biblia ke zonzilá na kusala bamambu yina Yehova ke zolaka ve. Mutindu mosi bubu yayi mpe ya lenda kumina nge na kusala mambu yina Yehova ke zolá ve. Kasi zaba ti, Yehova ke lombá ve ti bisadi na yandi vanda bantu ya kulunga to yina ke ve na masumu. (Tanga Nkunga 103:13, 14.) Yandi ke talá kilengi ntangu nge ke salá bangolo samu na kupesa yandi kilengi! Yandi ke sadisa nge. Ya tsyeleka, Yehova me zonza ti ata dyambu “lenda kukabula beto na luzolo [ya yandi].”—Tanga Baroma 8:38, 39.
SOSA KUZABA MBOTE-MBOTE
Tala wa’ faso kuzaba mbote Yehova mpe kundima yandi sadisa nge, ke pesa nge ngolo ya kulenda kununga bima nyonso yina lenda kanga nge nzila na kuzwa mbotokolo.
4. Longoka kuzaba Yehova mbote-mbote
Wapi bamambu nge ke na nsatu ya kuzaba na yina me tadila Yehova tekila nge kuzwa mbotokolo? Nge me lunga kuzaba bamambu yina ke nata nge na kuzola yandi mpe kupesa yandi kilengi. Tala VIDEO samu na kutala wa’ faso balongoki mingi ya Biblia na yinza nyonso salaka yawu. Na manima beto zonzila byuvu yina ke landa.
-
Yinki sadisá bampangi yina beto me tala na video na kuyidama samu na mbotokolo?
Tanga Baroma 12:2, mpe na manima beto zonzila byuvu yayi:
-
Nge ke na mwa bantembe na mambu yina Biblia ke longá to kana Bambangi ya Yehova ke longá kwandi matsyeleka?
-
Kana ya ke faso yina, yinki nge lenda sala?
5. Nunga mambu nyonso yina lenda kanga nge nzila na kuzwa mbotokolo
Ntangu beto ke baká mukanu ya kukipesa na Yehova mpe ya kuzwa mbotokolo, beto nyonso ke kutaná na bakwamusu. Samu na kutala mosi ya bifwani, tala VIDEO, mpe na manima beto zonzila byuvu yina ke landa.
-
Na video, wapi bamambu Narangerel zolá nunga samu na kusadila Yehova?
-
Wa’ faso luzolo samu na Yehova sadisaka yandi na kununga bamambu yango?
Tanga Bingana 29:25 na 2 Timote 1:7, mpe na manima beto zonzila kyuvu yayi:
-
Yinki ke pesa beto ngolo ya kununga mambu nyonso yina lenda kanga beto nzila na kusadila Yehova?
6. Tula ntima na lubakusu ya Yehova
Yehova ke sadisa nge na kupesa yandi kilengi. Tala VIDEO, mpe na manima beto zonzila byuvu yina ke landa.
-
Samu na yinki bakala yina vandá na boma ya kuzwa mbotokolo?
-
Yinki sadisaka yandi na kukumisa ngolo kiminu ya yandi na Yehova?
Tanga Izaya 41:10, 13, mpe na manima beto zonzila kyuvu yayi:
-
Samu na yinki nge lenda vanda na kundima ti nge ke lenda kulungisa mambu nyonso yina nge me zonza na Yehova ntangu nge me kukipesa na yandi?
7. Kulisa nsatu ya nge ya kuvutulá matondo na Yehova samu na luzolo ya yandi
Kukanisa ntangu nyonso na luzolo ya Yehova samu na nge, ke kulisa nsatu ya nge ya kuvutula yandi matondo mpe ya kusadila yandi luzingu ya nge nyonso. Tanga Nkunga 40:5, mpe na manima beto zonzila kyuvu yayi:
-
Na makabu nyonso yina Yehova me pesa nge, wapi yina nge ke zolá ya kulutila?
Mbikudi Yeremia vanda zolá mingi Yehova mpe malongi ya yandi. Yandi vanda kulisá nsatu ya yandi ya kuvutula Yehova matondo samu na bweso ya kunata nkumbu ya yandi. Yandi zonzá: “Ndinga ya nge kumaka kyese ya munu mpe kuyangalala ya ntima ya munu, samu ba ke bokilaka munu na nkumbu ya nge, O Yehova Nzambi.” (Yeremia 15:16) Pesa mvutu na byuvu yayi:
-
Samu na yinki kuvanda mosi ya Bambangi ya Yehova ke bweso mosi ya nene?
-
Nge me zola kuzwa mbotokolo mpe kukuma Mbangi ya Yehova?
-
Ya ke kwandi na kima yina ke na kangá nge nzila na kusala yawu?
-
Yinki nge me kanisa kusala samu na kulungisa mukanu ya kuzwa mbotokolo?
BANTU YA NKAKA KE ZONZAKA: “Mu ke na boma ya kubwa na disumu na manima ya kuzwa mbotokolo.”
-
Ni mutindu yina mpe nge ke kanisaka?
NA BUNKUFI
Na lubakusu ya Yehova, nge ke lenda kununga mambu nyonso yina lenda kanga nge nzila na kuzwa mbotokolo.
Mambu ya kusimba
-
Wapi malongi ya Biblia nge me lunga kuzaba tekila nge kuzwa mbotokolo?
-
Wapi bamambu nge me fwana kusoba na luzingu ya nge tekila nge kuzwa mbotokolo?
-
Samu na yinki nge me lunga ve kubika boma vutula nge na manima?
SOSA KUZABA DYAKA
Tala mambu yina me lunga kunata nge na kubaka mukanu ya kuzwa mbotokolo.
“Nge me yidama samu na kuzwa bateme?” (Yinzo ya Kengidi, Mars 2020)
Longoka wa’ faso nge lenda nunga mambu ya nkaka yina lenda kanga nge nzila na kuzwa mbotokolo.
“ Qu’est-ce qui m’empêche de me faire baptiser ? ” (La Tour de Garde, Mars 2019)
Tala wa’ faso bakala mosi nungá bamambu yina vanda sosa kukanga yandi nzila na kuzwa mbotokolo.
Bakala mosi na nkumbu ya Ataa vandá na boma ya kuzwá mbotokolo. Tala yinki nataka yandi na kubaka mukanu ya mfunu yayi.
