Ntangu bantu ke kwelaná, ba ke vandá na nsatu ti kilengi ya kilumbu ya makwela ya bawu vanda ntangu nyonso. Ya tsyeleka, ya lenda salama. Bakristo yina kwelaná ntama mpe yina ke salá bangolo samu na kusadila misiku ya Biblia na luzingu ya bawu zaba ti ya lenda salama.

1. Wapi malongi Biblia ke pesá na babakala?

Yehova tulá bakala mfumu ya dikanda. (Tanga Baefeze 5:23.) Yehova ke na vingilá ti yandi baka mikanu yina ke natina bambote na dikanda ya yandi. Biblia me zonza na babakala: “Beno zola bakento ya beno.” (Baefeze 5:25) Yinki ya zola zonza? Bakala yina zola kento ya yandi ke bakilaka yandi na malembe nyonso, ya vanda na yinzo ya bawu mpe na meso ya bantu. Yandi ke salá nyonso samu na kubumba kento ya yandi na mambu ya yimbi yina lenda kumina yandi. Yandi ke salá bangolo samu kento ya yandi vanda na kisika ya mbote, mpe na mavimpi ya mbote. Yandi ke salá mpe nyonso samu na kulakisa luzolo na kento ya yandi. (1 Timote 5:8) Ya kulutila mfunu, yandi ke sadisá kento ya yandi na kuvanda na kindiku ya ngolo na Yehova. (Matayi 4:4) Na kifwani, yandi me bonga kusambila mpe kutanga Biblia kintwadi na kento ya yandi. Ntangu bakala ke kipeke kento ya yandi na luzolo nyonso, yandi ke bumba ngolo kindiku ya yandi na Yehova.—Tanga 1 Piere 3:7.

2. Wapi malongi Biblia me pesa na bakento?

Biblia ke zonzá ti “kento fwana kuzitisa bakala ya yandi.” (Baefeze 5:33) Wapi mutindu yandi lenda sala yawu? Yandi lenda kanisa na bifu ya mbote ya bakala ya yandi mpe na bangolo yina yandi ke salá samu na kukipe yandi na bana ya bawu. Yandi lenda sadisa bakala ya yandi na kulungisa mikanu yina yandi me baka samu na dikanda. Yandi ke lakisa mpe buzitu ntangu yandi ke zonzá na bakala na lembami nyonso (douceur), mpe ntangu yandi ke zonzilá mambu yina me tadila bakala ya yandi na bantu ya nkaka, ata ti yandi ke sadilá ve Yehova.

3. Wapi mutindu bakala na kento lenda kumisa ngolo dikwela ya bawu?

Biblia ke zonzá samu na kento na bakala yina ke ya kukwelana: “Bawu zole ke kuma kaka muntu mosi.” (Matayi 19:5) Ya zola zonza ti ba zolá sala bangolo samu ata kima sala ti luzolo ya bawu kuma fioti. Ba fwana kulutisa ntangu mingi kintwadi mpe kulakisa pwelele luzolo ya bawu. Ba fwana mpe kuzonzila bampangi mambu yina ba ke na yawu na kati ya ntima na lembami nyonso. Ba zolá sala nyonso samu kaka Yehova baka kisika ya kulutila mfunu na luzingu ya bawu. Ba ke salá keba samu na kukuma ve pene-pene ya kulutila na muntu yina ke ve bakala to kento ya bawu.

 SOSA KUZABA MBOTE-MBOTE

4. Bakala: zola mpe kipe kento ya nge

5. Kento: zola mpe pesa buzitu na bakala ya nge

Biblia ke zonzá na kento na kuzitisa bakala ya yandi ata ti yandi ke sadilá Yehova to ve. Tanga 1 Piere 3:1, 2, mpe na manima beto zonzila byuvu yayi:

• Kana nge ke na bakala yina ke sadilá ve Yehova, ya tsyeleka nge zola ti yandi kuma kisadi ya Yehova. Na yawu, Yinki ke vanda mbote: kuzonzilaka yandi ntangu nyonso mambu ya Biblia to kuvanda na ndyatulu ya mbote mpe na buzitu na mantwala ya yandi? Samu na yinki nge me zonza mutindu yina?

Babakala na bakento lenda baka mikanu kintwadi. Ntangu ya nkaka, kento lenda tala ti mukanu yina bakala ya yandi me baka ke ve mbote. Yandi  lenda zonza makanisi ya yandi na kulembama nyonso mpe na buzitu nyonso. Kasi yandi me lunga ve kuzimbana ti, ni na bakala Yehova pesá kiyeko ya kubaka mikanu samu na bambote ya dikanda. Na yawu yandi me lunga kusala nyonso samu na kuzitisa mikanu yina bakala ya yandi ke bakaka. Kana kento sala faso yina, dikanda nyonso ke vanda na kilengi. Tanga 1 Piere 3:3-5, mpe na manima beto zonzila kyuvu yayi:

• Yinki ya ke salaka Yehova ntangu yandi ke talá ti kento ke na pesá buzitu na bakala ya yandi?

6. Nge lenda nunga bamambu na kati ya dikwela ya nge

 NA BUNKUFI

Bakala na kento ke vanda na kilengi kana ba ke zolasaná, ke lakisá buzitu, mpe ke sadilá malongi ya Biblia na kati ya dikwela ya bawu.

Mambu ya kusimba

• Yinki bakala lenda sala samu dikwela ya bawu vanda na kilengi?

• Yinki kento lenda sala samu dikwela ya bawu vanda na kilengi?

• Kana nge ke ya kukwela, wapi malongi ya Biblia lenda sadisa nge na kukumisa dikwela ya nge ngolo?