KILESO 50

Wapi mutindu dikanda ya nge lenda vanda na kilengi?—Kitini 2

KUWA NA

Bana ke dikabu ya Yehova. Yandi ke na vingilá ti bibuti kipe dikabu yango na faso ya mbote. Ni na yawu, Yehova me pesa malongi ya mbote na bibuti, yina ke sadisa bawu na kusala yawu. Yehova me pesa mpe bana malongi yina lenda sadisa bawu na kusala ti dikanda ya bawu vanda na kilengi.

1. Wapi malongi Yehova me pesa na bibuti?

Yehova zola ti bibuti zola bana ya bawu mpe ba lutisa ntangu mingi na bawu. Yandi zola mpe ti bibuti bumba bana ya bawu na mambu nyonso ya yimbi mpe ba sadila misiku ya Biblia samu na kulonga bawu. (Bingana 1:8) Yandi me zonza na batata: “Beno yundula [bana ya beno] na kupesa bawu . . . ndongosolo yina [Yehova] ke zolaka.” (Tanga Baefeze 6:4.) Yehova ke sepelá ntangu bibuti ke longá bawu mosi bana ya bawu, na kisika ya kulomba bantu ya nkaka na kusala yawu.

2. Wapi malongi Yehova me pesa na bana?

Yehova me lomba na bana: “Beno tumama na bibuti ya beno.” (Tanga Bakolose 3:20.) Ntangu bana ke zitisá mpe ke tumamá na bibuti ya bawu, ba ke pesá ve kaka bibuti ya bawu kilengi kasi na Yehova mpe. (Bingana 23:22-25) Na yawu, Yesu pesá kifwani ya mbote ntangu yandi vandá mwana. Ata ti yandi vandá muntu ya kulunga, yandi tumamá mpe zitisá bibuti ya yandi yina vandá bantu ya masumu.—Luke 2:51, 52.

3. Wapi mutindu dikanda ya beno lenda kuma pene-pene na Nzambi?

Kana beno ke na bana, ntembe ve beno zola ti bana ya beno zola Yehova kaka mutindu beno mosi. Wa’ faso beno lenda sala yawu? Na kulandá mambu yayi Biblia me zonza: “Nge fwana kotisa [malongi ya Yehova] na bana ya nge mpe kuzonzila yawu ntangu nge ke vanda na yinzo ya nge mpe ntangu nge ke tambula na nzila.” (Kulonga Misiku 6:7) “Kukotisa” zola zonza kulonga mambu mbala na mbala. Mutindu mosi mpe, samu bana ya beno simba mambu mpe bambukila yawu, beno me bonga kuzonzila bawu yawu bambala mingi. Baverse yayi zola zonza ti ntangu nyonso beno me bonga kusosa bafaso ya kuzonzila bawu mambu ya Yehova. Kuvanda na kilumbu ya kulongoka Biblia kintwadi na dikanda ke mambu ya mbote. Kana beno ke ve na bana, ya ke vanda mpe mbote beno vanda na kilumbu ya beno ya kulongoka Biblia beno mosi.

SOSA KUZABA MBOTE-MBOTE

Tala mambu ya mfunu yina lenda kengidila dikanda mpe yina lenda sala ti dikanda vanda na kilengi.

4. Longa bana ya nge na luzolo nyonso

Kulonga mwana lenda vanda mpasi. Kasi wa’ faso Biblia lenda sadisa bibuti? Tanga Zaki 1:19, 20, mpe na manima beto zonzila byuvu yayi:

Ntangu bibuti ke longá bana ya bawu, wapi mutindu ba lenda lakisa bawu luzolo?
Samu na yinki tata to mama me lunga ve kusemba mwana ya yandi ntangu yandi ke vandá na nkele? a

5. Kengidila bana ya nge

Samu na kukengidila bana ya nge, ya ke mfunu mingi na kusolola na mosi na mosi na kati ya bawu na yina me tadila mambu ya kuvukisa nzutu. Ya lenda vanda mambu ya nsoni to mwa mpasi na kusala yawu. Tala VIDEO, mpe na manima beto zonzila byuvu yina ke landa.

VIDEO: Bumba bana ya nge na mambu ya yimbi (2:58)

Samu na yinki ya ke mpasi samu na bibuti ya nkaka na kusolola na bana ya bawu na mambu yina me tadila kuvukisa nzutu?
Wapi mutindu bibuti ya nkaka ke salá samu na kusolola na bana ya bawu na mambu yina me tadila kuvukisa nzutu?

Mutindu Biblia zonzaka yawu, yinza ya Satana ke na fuluká na mambu ya yimbi. Tanga 2 Timote 3:1, 13, mpe na manima beto zonzila kyuvu yayi:

Na kati ya bantu ya yimbi yina verse 13 me zonzila, kele na bantu yina ke natá bana ya fioti na kuvukisa nzutu na bawu to ke salá bawu bifu ya yimbi. Na yawu, samu na yinki ya ke mfunu bibuti zonzila na bana ya bawu mambu yina me tadila kuvukisa nzutu, mpe mutindu ba lenda kubwa ve na mutambu ya bantu yina?

Nge me zaba yawu?

Bambangi ya Yehova ke basisá mikanda mingi yina ke sadisá bibuti na kulonga bana ya bawu mambu yina me tadila kuvukisa nzutu, mpe kubumba bana ya bawu na bantu yina ke vandá na makanisi ya yimbi ya kuvukisa nzutu na bawu to ke salá bawu bifu ya yimbi. Na kifwani, tala:

Kengidila bana ya nge (video)
Écoute le grand Enseignant, chapitres 10 mpe 32
“ Parler de sexualité à son enfant ” (Réveillez-vous ! n^o 5 2016)

6. Zitisa bibuti ya nge

Bana mpe bantwenya lenda lakisa buzitu na bibuti ya bawu na faso ba ke zonzaka na bawu. Tala VIDEO, mpe na manima beto zonzila byuvu yina ke landa.

VIDEO: Wapi mutindu mu lenda solola na bibuti ya munu? (2:19)

Samu na yinki ya ke mfunu na bantwenya na kusolola na bibuti ya bawu na buzitu nyonso?
Wapi mutindu ntwenya lenda solola na bibuti ya yandi na faso yina ke lakisa buzitu ya yandi samu na bawu?

Tanga Bingana 1:8, mpe na manima beto zonzila kyuvu yayi:

Yinki ntwenya me bonga kusala ntangu bibuti ya yandi ke pesaka yandi malongi to masembo?

7. Sadila Yehova kintwadi na dikanda ya nge

Konso lumingu, Bambangi ya Yehova ke baká ntangu ya kulongoka Biblia kintwadi na makanda ya bawu. Wa’ faso kulongoka yango ke salamaka? Tala VIDEO, mpe na manima beto zonzila byuvu yina ke landa.

VIDEO: Kulongoka ya dikanda—Bima yina lenda kanga nzila mpe bambote (8:04)

Yinki dikanda lenda sala samu kulongoka ya bawu salama ntangu nyonso?
Yinki tata to mama lenda sala samu kulongoka ya dikanda ya bawu salama na faso mosi ya mbote, mpe yina ke pesa bawu kilengi?—Tala foto ya kubanda ya kileso yayi.
Yinki lenda sala ti ya vanda mpasi samu na nge na kulongoka Biblia kintwadi na dikanda ya nge?

Na ntangu ya ntama Yehova lombá na bana ya Izraele, na kuzonzilá mambu ya yandi ntangu nyonso na dikanda. Tanga Kulonga Misiku 6:6, 7, mpe na manima beto zonzila kyuvu yayi:

Wapi mutindu nge lenda sadila musiku yayi?

Yina beno lenda sala samu na kulongoka ya dikanda:

Kulongoka mambu yina ba ke zonzila na balukutakanu.
Kutanga mpe kusolola na masolo ya Biblia yina dikanda me soola.
Kana beno ke na bana ya fioti, beno baka to basisa na mukanda mosi ya bamambu yina bana lenda sala na jw.org.
Kana beno ke na bana yina ke bantwenya, beno solola na bawu mambu yina ba me zonzila samu na bantwenya na jw.org.
Ntangu beno ke na tangá Biblia na bana ya beno, beno sala mutindu beno me kuma bantu ya ntama yina Biblia ke zonzilá mpe beno lwata bilele mutindu bawu.
Beno tala video mosi na jw.org mpe beno solola na yawu.

BANTU YA NKAKA KE ZONZAKA: “Bana ya fioti lenda zaba ve mambu ya Biblia samu ti ata bantu ya kukula bawu mosi ke zabá ve yawu mbote-mbote.”

Yinki nge ke zonza?

NA BUNKUFI

Yehova zola ti bibuti longa, zola, mpe kengidila bana ya bawu. Bana zitisa mpe tumama na bibuti ya bawu, mpe dikanda nyonso sadila Yehova kintwadi.

Mambu ya kusimba

Wapi mutindu bibuti lenda longa mpe kukengidila bana ya bawu?
Wapi mutindu bana lenda lakisa ti ba ke zitisá bibuti ya bawu?
Wapi bambote dikanda lenda kuzwa kana konso lumingu ba ke baká ntangu ya kulongoka kintwadi?

Sonika kilumbu yina kileso me manisa:

Yina nge lenda sala

Lomba na bampangi ya kimvuka mambu ya nkaka yina beno lenda sala na kulongoka ya dikanda.

Mambu ya nkaka ya kusala:

Your other goal

SOSA KUZABA DYAKA

Wapi bileso nge lenda sadila samu na kusadisa mwana ya nge na kuvanda muntu ya kukula yina ke baká mikanu ya mbote?

“ Six valeurs à transmettre aux enfants ” (Réveillez-vous ! n^o 2 2019)

Tala malongi ya mbote yina Biblia ke pesá na ba yina ke kipeke bibuti ya bawu yina me nunaka.

“Yinki Biblia ke zonzá na yina me tadila kukipe bibuti yina me nunaka?” (Tanga yawu na jw.org)

Tala wapi mutindu bakala yina vanda zabá ve faso ya kukulisa bana ya yandi kwizá kuma tata ya mbote.

Yehova longá beto mutindu ya kukulisa bana ya beto (5:58)

Tala wapi mutindu bibuti lenda kuma pene-pene na bana ya bawu.

“ Comment un père peut-il rester proche de son fils ? ” (La Tour de Garde, 1^er Novembre 2011)

a Ntangu Biblia ke zonzilá “kusemba”, ya zola zonza kulonga, kutwadisa, mpe kusungika (correction). Ya zola zonza ata fioti ve kunyokola to kufinga.—Bingana 15:5.

SEPELA NA LUZINGU YA NTANGU NYONSO!—MASOLO SAMU NA KUZABA BIBLIA