Mosi na mosi na kati ya beto ke na mutindu yina yandi ke zolá kulwata mpe kuyidika nzutu. Kana beto landa mambu yina Biblia ke zonzá, beto ke soola kusala ve kaka mambu yina beto ke zolá, kasi mambu yina ke pesá Yehova kilengi. Beto zonzila ndambu ya malongi ya Biblia yina ke sadisa beto.

1. Wapi malongi ya Biblia me fwana kutwadisa beto na faso ya beto ya kulwata mpe ya kuyidika nzutu?

Beto me fwana kusoola “bilele yina me fwanana, kukondwa kulutisa ndilu mpe kuvanda na makanisi ya mbote,” mpe kubumba bunkete na faso ya beto ya kuyidika nzutu yina ke lakisa ti beto kele “ya kukangama na Nzambi.” (1 Timote 2:9, 10, nwt) Beto zonzila mbote-mbote malongi 4 yayi: (1) Bilele ya beto me fwana kuvanda “ya kufwanana.” Kaka mutindu nge ke talaka yawu na balukutakanu, mutindu ya kulwata, ya kuyidika basuki mpe ya kuyidika nzutu ya Bambangi ya Yehova kele ve faso mosi. Kasi ntangu beto ke salaka yawu, beto ke salá nyonso samu na kulakisa buzitu ya beto na Nzambi yina beto ke sambilaka. (2) Mutindu ya beto ya kulwata me lunga “kulutisa ve ndilu.” Ya zola zonza ti faso ya beto ya kuyidika nzutu zolá vumbula ve na bampangi nsatu ya kuvukisa nzutu, to kunata bampangi na kutala ti beto ke na salá matalana. (3) Beto ke lakisá “makanisi ya mbote” ntangu beto ke soolá ve kulanda bafaso nyonso ya yinza ya kulwata mpe ya kuyidika nzutu. (4) Mutindu ya beto ya kuyidika nzutu me fwana kulakisa ntangu nyonso ti “beto kele ya kukangama na Nzambi,” mpe kulakisa na bantu ya nkaka ti beto ke sambilá Nzambi ya tsyeleka.—1 Bakorinto 10:31.

2. Samu na yinki kukanisa na bampangi ntangu beto ke soolá bilele mpe faso ya kuyidika nzutu?

Mosi na mosi na kati ya beto ke soolaka yandi mosi faso ya kuyidika nzutu to bilele yina yandi ke lwata. Kasi ntangu beto ke na salaka yawu, beto me fwana kukanisa na yina ya ke sala na bampangi. Beto ke sosá kusala nyonso samu na kunyongisa ve bampangi kasi samu “na kuyangidika mpangi [kupesa kilengi] na kusala yandi mambu ya mbote samu na kukulisa yandi na kiminu.”—Tanga Baroma 15:1, 2.

3. Wapi mutindu mvwatulu ya beto lenda nata bantu na kusosa kuzaba matsyeleka?

Beto ke salá bangolo na kulwata na faso ya mbote bisika nyonso beto ke kwendá. Kasi beto ke salá mingi keba na faso ya beto ya kulwata ntangu beto ke kwendá na balukutakanu ya kimvuka mpe ntangu beto ke samunaka. Beto ke salá faso yina samu bantu yamba na faso ya mbote nsangu ya mbote yina beto ke natinaka bawu. Na yawu, faso ya beto ya kuyidika nzutu mpe ya kulwata lenda nata bantu ya nkaka na kusosa kulongoka matsyeleka ya Biblia mpe ya ke “pesa nkembo na mambu nyonso na ndongosolo ya Nzambi, kivuukisi ya beto.”—Tite 2:10.

 SOSA KUZABA MBOTE-MBOTE

4. Kuyidika nzutu na faso yina me fwanana ke lakisá buzitu na Yehova

Wapi yina ke mosi ya bamambu yina ke natá beto na kuyidika nzutu ya beto na mutindu ya mbote? Tanga Nkunga 47:2, mpe na manima beto zonzila byuvu yayi:

• Wapi mutindu kuzaba ti beto ke natá nkumbu ya Yehova me fwana kunata beto na kubaka mikanu ya mbote na faso ya beto ya kulwata?

• Nge me kanisa ti ya ke mbote na kuyidika nzutu ntangu beto ke kwendá na balukutakanu to ntangu beto ke samunaka? Samu na yinki nge me zonza mutindu yina?

 5. Wapi mutindu kubaka mikanu ya mbote na mambu ya kulwata mpe ya kuyidika nzutu

Tala VIDEO.

Ata ti bilele ya beto kele ntalu to ve, ya me fwana kuvanda na bunkete mpe ya kulunga na kisika yina beto kele. Tanga 1 Bakorinto 10:24 mpe 1 Timote 2:9, 10. Na manima, beto zonzila samu na yinki beto zolá lwata ve bilele yina ke . . .

• mvindu, ya kupasuka mpe fioti to nene mingi na nzutu ya beto.

• nkufi, ke simbá nzutu (serré), ke lakisá bisika ya nzutu yina zolá talana ve to ke natá bampangi na kuvanda na makanisi ya yimbi to nsatu ya kuvukisa nzutu.

Bakristo ke ve na yisi ya musiku ya Moyize, kasi mambu yina ke na kati ke sadisá beto na kuzaba mutindu Yehova ke tadilá bamambu ya nkaka. Tanga Kulonga Misiku 22:5, mpe na manima beto zonzila kyuvu yayi:

• Samu na yinki beto fwana kulosa mutindu ya kulwata mpe ya kuyidika nzutu yina ke natá babakala na kutalana mutindu bakento mpe bakento kutalana mutindu babakala?

Tanga 1 Bakorinto 10:32, 33 na 1 Yoane 2:15, 16, mpe na manima beto zonzila byuvu yayi:

• Samu na yinki beto fwana kutala kana mutindu ya beto ya kuyidika nzutu ke na salá mpasi na bampangi kisika yina beto ke vandá to na kati ya kimvuka?

• Wapi mutindu bantu ke lwatá to ke yidiká nzutu kisika yina nge ke vandaka?

• Nge me kanisa ti bafaso ya nkaka ya kulwata yayi me lunga ve samu na bakristo? Samu na yinki nge me zonza mutindu yina?

 NA BUNKUFI

Ntangu beto ke baká mikanu ya mbote na mambu ya kuyidika nzutu, beto ke lakisá buzitu ya beto na Yehova mpe na bampangi.

Mambu ya kusimba

• Samu na yinki faso ya beto ya kulwata mpe ya kuyidika nzutu ke mfunu mingi na meso ya Yehova?

• Wapi malongi ya Biblia lenda sadisa beto na kubaka mikanu ya mbote na yina me tadila faso ya beto ya kuyidika nzutu?

• Mutindu ya beto ya kulwata mpe ya kuyidika nzutu ke salá yinki na bantu yina ke ve bisadi ya Yehova?