Yesu ke mfumu ya dibuundu ya bakristo. (Baefeze 5:23) Ata ti Yesu ke na zulu bubu yayi, yandi ke na ntwadisá bisadi ya yandi yina kele na zulu ya ntoto, na nzila ya “kisadi ya kukwikama mpe ya mayela.” (Tanga Matayi 24:45.) Yesu muntu tulá kisadi yango, mpe pesaka yandi bweso ya kubaka mikanu ya nkaka. Kasi ata faso yina, yandi ke mosi ya bisadi ya Yesu, mpe ke sadilá bampangi ya Kristo. Nani ke kisadi yango? Wa’ faso kisadi yango ke kipeke beto?

1. Nani ke “kisadi ya kukwikama mpe ya mayela”?

Banda ntama, Yehova ke sadilá muntu to kikunku ya bantu samu na kutwadisa dikanda ya yandi. (Malaki 2:7; Baebre 1:1) Na manima ya lufwa ya Yesu, ni bantumwa na bakuluntu ya Yeruzalemi bandá kutwadisa dikanda ya Yehova na ntoto. (Bisalu 15:2) Mutindu mosi, bubu yayi mpe ni kikunku mosi ya fioti ya bakuluntu, yina beto ke bokilá Kimvuka ya Bantwadisi ya Bambangi ya Yehova, ke pesá madya ya kimpeve mpe ke twadisá kisalu ya kusamuna na yinza nyonso. Kimvuka yango kele “kisadi ya kukwikama mpe ya mayela yina [Yesu] pesaka kisalu.” (Matayi 24:45a) Bampangi nyonso yina ke na kati ya Kimvuka ya Bantwadisi, ke na kati ya bakristo yina Yehova me soola na mpeve ya yandi ya santu. Ba ke na kivuvu ya kukwenda yala na Yesu na zulu na kati ya kimfumu ya yandi ntangu luzingu ya bawu awa na ntoto ke suka.

2. Wapi madya ya kimpeve kisadi ya kukwikama ke pesaka?

Yesu zonzá ti kisadi ya kukwikama zolá vanda na “kisalu ya kukabula madya na bisadi nyonso ya yandi na ntangu ya kulunga.” (Matayi 24:45b) Kaka mutindu madya yina beto ke kudyá ke pesá beto ngolo mpe mavimpi ya mbote, mutindu mosi mpe madya ya kimpeve yina me katuka na Biblia, ke pesá beto ngolo yina beto ke na yawu nsatu samu na kuvanda kaka ya kukangama na Yehova, mpe samu na kusala kisalu yina Yesu pesá beto. (1 Timote 4:6) Beto ke kuzwá madya ya kimpeve yango na nzila ya balukutakanu ya kimvuka, ya balukutakanu ya nene, na mikanda ya beto, mpe na bavideo. Nyonso yayi ke sadisá beto na kuzaba mbote-mbote yinki Yehova me zola, mpe na kukumisa ngolo kindiku ya beto na yandi.

 SOSA KUZABA MBOTE-MBOTE

3. Bisadi ya Yehova me fwana kusala bamambu mutindu dibuundu

Kimvuka ya Bantwadisi ke landá lutwadusu ya Yesu samu na kutwadisa kisalu ya Bambangi ya Yehova na yinza. Ni mutindu yina ya vanda salama na ntangu ya bakristo ya ntete. Tala VIDEO.

Tanga 1 Bakorinto 14:33, 40, mpe na manima beto zonzila kyuvu yayi:

• Wapi mutindu baverse yayi ke na lakisá ti Yehova me zola ti Bambangi ya yandi vanda na kati ya dibuundu?

4. Kisadi ya kukwikama ke twadisá kisalu ya kusamuna

Kusamuna vandá kisalu ya kulutila mfunu yina bakristo ya ntete vanda salaka. Tanga Bisalu 8:14, 25, mpe na manima beto zonzila byuvu yayi:

• Na ntangu ya bakristo ya ntete, nani vanda twadisá kisalu ya kusamuna?

• Yinki Piere na Yoane salá ntangu bantumwa ya nkaka pesá bawu kisalu ya kusala?

Kisalu ya kusamuna ke kisalu ya kulutila mfunu yina Kimvuka ya Bantwadisi ke twadisaka. Tala VIDEO.

 Yesu lakisá ti kisalu ya kusamuna ke mfunu mingi. Tanga Marke 13:10, mpe na manima beto zonzila byuvu yayi:

• Samu na yinki kisalu ya kusamuna ke mfunu mingi samu na Kimvuka ya Bantwadisi?

• Samu na yinki beto ke na nsatu ti “kisadi ya kukwikama mpe ya mayela” twadisa kisalu yayi ke na salamá na yinza nyonso?

5. Kisadi ya kukwikama ke lakisá beto mambu ya kusala

Kimvuka ya Bantwadisi ke lakisá nzila ya kulanda samu na bakristo ya yinza nyonso. Yinki ke sadisá bawu na kuzaba wapi lutwadusu kupesa? Tala wa’ faso Kimvuka ya Bantwadisi ya ntete vanda salaka yawu. Tanga Bisalu 15:1, 2, mpe na manima beto zonzila byuvu yayi:

• Na wapi mambu bakristo ya ntete vandá wisana ve?

• Na sika ya nani Polo, Barnabasi, mpe bampangi ya nkaka kwendá samu na kuyidika mambu yango?

Tanga Bisalu 15:12-18, 23-29, mpe na manima beto zonzila kyuvu yayi:

• Tekila ba baka mukanu, yinki sadisá Kimvuka ya Bantwadisi ya ntete na kuzaba dikanisi ya Nzambi na mambu yango?—Tala baverse 12, 15, mpe 28.

Tanga Bisalu 15:30, 31 na 16:4, 5, mpe na manima beto zonzila byuvu yayi:

• Yinki bakristo ya ntete salá ntangu Kimvuka ya Bantwadisi lakisá bawu mambu ya kusala?

• Wa’ faso Yehova sakumuná bawu ntangu ba tumamaka?

Tanga 2 Timote 3:16 na Zaki 1:5, mpe na manima beto zonzila kyuvu yayi:

• Bubu yayi, yinki ke twadisá Kimvuka ya Bantwadisi ntangu ba ke baká mikanu?

 NA BUNKUFI

Kimvuka ya Bantwadisi kele “kisadi ya kukwikama mpe ya mayela” yina Yesu tulaka, samu na kutwadisa mpe kupesa madya ya kimpeve na bilandi ya yandi ya ntoto nyonso.

Mambu ya kusimba

• Nani tulá “kisadi ya kukwikama mpe ya mayela”?

• Wapi mutindu kisadi ya kukwikama ke kipeke beto?

• Nge ke na ndimá kwandi ti Kimvuka ya Bantwadisi ke “kisadi ya kukwikama mpe ya mayela”?