KILESO 55
Sadisa kimvuka ya nge
Na yinza nyonso, mafunda na mafunda (millions) ya bantu ke sadilá Yehova na kilengi nyonso na kati ya mafunda (milliers) ya bimvuka. Ba ke ndimá malongi yina ba ke kuzwá, mpe ke vutulá matondo mingi samu na yawu, mpe na kilengi nyonso ba ke tulá diboko na bisalu ya kimvuka na bafaso mingi. Ni faso yina mpe nge ke na kanisá samu na kimvuka ya nge?
1. Wapi mutindu nge lenda sadila ntangu mpe bangolo ya nge samu na kusadisa kimvuka?
Mosi na mosi na kati ya beto lenda sadisa bampangi na kati ya kimvuka ya yandi. Na kifwani, ya ke na biboba to bantu yina ke na bimbevo na kimvuka ya nge? Nge lenda sadisa bawu na kukwenda na balukutakanu? To nge lenda sadisa bawu na bafaso mingi ya nkaka. Na kifwani, kukwenda sumbila bawu babima to kusadisa bawu na bisalu ya yinzo? (Tanga Zaki 1:27.) Beto lenda tula mpe diboko samu na kusala bunkete mpe na kubongisa Yinzo ya Kimfumu. Ata muntu ke nata beto na ngolo na kusala mambu nyonso yayi. Kasi, ni luzolo ya beto samu na Nzambi mpe samu na bampangi ke nata beto na “kukipesa na luzolo.”—Nkunga 110:3.
Bampangi yina kuzwá mbotokolo lenda sadisa dyaka kimvuka na bafaso mingi ya nkaka. Bampangi ya bakala yina ke ya kukula na kimpeve mpe me lungisa mambu yina Biblia ke lombá, lenda kuzwa bweso ya kusadisa kimvuka mutindu basadisi, mpe na mantwala, mutindu bakuluntu. Bampangi ya bakala na ya kento lenda sala dyaka mingi na kisalu ya kusamuna na kukumá mipasuli nzila (pionniers). Bampangi ya nkaka lenda tula diboko na kisalu ya kutunga Bayinzo ya Kimfumu, to kukwenda na babwala to na bimvuka yina ke na nsatu ya lubakusu.
2. Wa’ faso beto lenda sadila bima yina beto ke na yawu samu na kusadisa kimvuka?
Beto lenda “kumisa Yehova na bima ya [beto] ya ntalu.” (Bingana 3:9) Ya ke vandá bweso ya nene ntangu beto ke pesá mbongo mpe bima yina ke na beto samu na bansatu ya kimvuka ya beto, mpe samu kisalu ya kusamuna na yinza nyonso kwenda na mantwala. (Tanga 2 Bakorinto 9:7.) Ba ke sadilá mpe makabu yango ntangu kuningana ya ntoto to bamambu ya nkaka ya mpasi ke kuminá bampangi ya yinza nyonso. Mingi ya Bambangi ya Yehova ke sepelá “kukatula [mwa] mbongo” ntangu nyonso samu na kupesa yawu na makabu. (Tanga 1 Bakorinto 16:2.) Beto ke salá mpe makabu na kutulá mbongo na ba caisses na Yinzo ya Kimfumu to na nzila ya internet na donate.pr418.com. Bafaso nyonso yayi ya kusadila bima yina ke na beto ke pesá beto bweso ya kulakisa Yehova ti beto ke zolaka yandi.
SOSA KUZABA MBOTE-MBOTE
Tala bafaso yina nge lenda sadisa kimvuka ya nge.
3. Beto lenda pesa bima yina beto ke na yawu
Yehova na Yesu ke zolá ba yina ke pesá na kilengi nyonso. Na kifwani, Yesu zonzá mambu ya mbote na yina me tadila mufwidi yina vandá kaka na mbongo ndambu, kasi yandi pesá nyonso yina yandi vandá na yawu na Yehova. Tanga Luke 21:1-4, mpe na manima beto zonzila byuvu yayi:
-
Samu na kusepelisa Yehova, beto ke kwandi na nsatu ya kupesa mbongo mingi?
-
Yinki ya ke salaka Yehova na Yesu ntangu beto ke pesá na kilengi nyonso?
Samu na kuzaba wapi mutindu ba ke sadilá makabu ya beto, tala VIDEO. Na manima beto zonzila kyuvu yina ke landa.
-
Wapi mutindu makabu yina beto ke pesá ke sadisá bimvuka ya yinza nyonso?
4. Beto lenda tula diboko na kisalu
Na ntangu ya ntama, bisadi ya Yehova vanda salá kisalu ya kubongisa bisika yina ba vanda sambilá Yehova na kilengi mpe tiya nyonso. Ya vanda lombá ve bawu kaka mbongo kasi mpe bangolo mingi na kusala yawu. Tanga 2 Bansangu 34:9-11, mpe na manima beto zonzila kyuvu yayi:
-
Yinki bana ya Izraele vanda salá samu na kubongisa yinzo ya Yehova to kisika yina ba vanda sambilaka?
Na kutala wapi mutindu bubu yayi, Bambangi ya Yehova ke landá kifwani ya dikanda ya Yehova ya ntama, tala VIDEO. Na manima beto zonzila byuvu yina ke landa.
-
Samu na yinki ya ke mbote na kubumba ntangu nyonso bunkete mpe kitoko ya Yinzo ya beto ya Kimfumu?
-
Yinki nge lenda sala samu na kutula diboko na kisalu?
5. Bampangi ya bakala lenda sala bangolo samu na kusala dyaka mingi na kimvuka
Biblia ke lombá na bakristo ya bakala na kusala nyonso yina ba lenda sala samu na kusadisa kimvuka. Samu na kutala mosi ya bifwani, tala VIDEO. Na manima beto zonzila kyuvu yina ke landa.
-
Na video, wapi mutindu Ryan salá bangolo samu na kusadisa dyaka mingi kimvuka?
Biblia ke zonzilá mambu yina bampangi ya bakala fwana kusala samu na kuzwa bweso ya kukuma basadisi mpe bakuluntu. Tanga 1 Timote 3:1-13, mpe na manima beto zonzila byuvu yayi:
MUNTU LENDA YUFULA: “Wapi kisika Bambangi ya Yehova ke kuzwá mbongo samu na bisalu ya bawu?”
-
Wapi mvutu nge ke pesa?
NA BUNKUFI
Yehova ke sepelá na nyonso yina beto ke salá samu na kupesa ntangu, bangolo mpe bima yina ke na beto samu na kusadisa kimvuka.
Mambu ya kusimba
-
Wapi mutindu beto lenda sadila ntangu mpe bangolo ya beto samu na kusadisa kimvuka?
-
Wapi mutindu beto lenda sadila bima yina ke na beto samu na kusadisa kimvuka?
-
Na wapi mutindu nge zola kusadisa kimvuka?
SOSA KUZABA DYAKA
Tala samu na yinki Nzambi ke lombá dyaka ve na bisadi ya yandi na kupesa dîme.
“Yinki Biblia ke zonzá na yina me tadila dîme?” (Tanga yawu na jw.org)
Biblia me pesa bisalu ya nkaka na babakala yina kuzwaka mbotokolo. Kasi yinki ke salama kana kento mosi yina kuzwaka mbotokolo ke na sosaka kusala bisalu yango?
“Otorite yina bakuluntu ke na yawu na kati ya kimvuka” (Yinzo ya kengidi, février 2021)
Tala disolo ya bampangi ya bakala yina na bukindi nyonso salá bangolo samu na kunata mikanda na bampangi ya bawu ya bisika ya nkaka.
Bangolo yina ba ke salá samu na kukabula mikanda na bwala ya RDC (4:25)
Tala samu na yinki mutindu ya Bambangi ya Yehova ya kuzwa mbongo samu na bisalu ya bawu ke ve faso mosi na ya mabuundu ya nkaka.
“Wapi kisika Bambangi ya Yehova ke kuzwá mbongo samu na bisalu ya bawu?” (Tanga yawu na jw.org)
