Ntangu beto ke vandá na bampangi ya beto ya kimpeve, beto ke talá pwelele mambu yina mfumu Davidi zonzaka: “Ya kele mbote mingi mpe kyese mingi ti bampangi kuzinga kintwadi na bumosi!” (Nkunga 133:1) Kana beto ke na bumosi, ya ke samu na bangolo yina mosi na mosi na kati ya beto ke salá samu na kubumba yawu.

1. Wapi mambu ya ngitukulu ke salamá na kati ya dikanda ya Yehova?

Kana nge me kwenda na lukutakanu na bwala ya nkaka, ya lenda vanda ti nge ke na zabá ve ndinga yina ba ke na zonzaka. Kasi nge ke tala ti ba ke yamba nge na faso ya mbote mpe na luzolo nyonso, kaka mutindu ya ke salamá na kimvuka ya nge. Samu na yinki ya ke salamá mutindu yayi? Samu ti na yinza nyonso beto ke sadilá mikanda mosi samu na kulongoka Biblia. Beto ke salá mpe bangolo samu na kulakisa luzolo beto na beto. Ni na yawu, ata kisika yina beto ke vandá, beto nyonso “ke bokila nkumbu ya Yehova, samu na kusambila yandi na bumosi.”—Sofoni 3:9, note ya yisi.

2. Yinki nge lenda sala samu na kukulisa bumosi?

“Beno zolasana ya kulutila na ntima mosi.” (1 Piere 1:22) Wapi mutindu nge lenda sadila malongi yayi? Na kukanisá na bifu ya mbote ya bampangi kasi ya yimbi ve. Kulutisa ve kaka ntangu na bampangi yina ke faso nge, kasi sala bangolo samu na kulutisa ntangu na bampangi ya mutindu nyonso. Beto me lunga mpe kusala bangolo samu na kukatula makanisi ya yimbi yina bantu ke vandá na yawu na yina me tadila bantu ya bampusu to bandinga ya nkaka.—Tanga 1 Piere 2:17. a

3. Yinki kusala kana nge ke na wisaná ve na mpangi mukristo?

Beto ke na bumosi, kasi beto ke mpe bantu ya masumu. Ntangu ya nkaka beto ke dasuká to ke nyongisá bampangi. Ni na yawu Biblia ke lombá na beto na “kulanda . . . kulemvokila bampangi na ntima ya mvimba,” mpe ya me bwela: “Mutindu Yehova lemvokilaka beno na ntima ya mvimba, beno fwana sala mpe mutindu mosi.” (Tanga Bakolose 3:13, nwt-MK.) Ntangu nyonso beto ke salá Yehova mpasi na ntima, kasi yandi ke lemvokilaka beto. Ni na yawu yandi zola ti beto lemvokila mpe bampangi. Kana nge me zaba ti nge me nyongisa mpangi, baka mukanu ya kukwenda yidika bamambu.—Tanga Matayi 5:23, 24. b

 SOSA KUZABA MBOTE-MBOTE

4. Kusoola ve bantu ya kuzola

Beto me lunga kuzola bampangi ya beto nyonso. Kasi ya lenda vanda mpasi samu na beto na kuzola bampangi yina ke ve mutindu mosi na beto. Yinki lenda sadisa beto? Tanga Bisalu 10:34, 35, mpe na manima beto zonzila byuvu yayi:

• Yehova ke ndimá ti bantu ya mitindu nyonso sadila yandi. Wapi mutindu dikanisi yayi zolá nata nge na kutadila bantu yina ke ve mutindu mosi na nge mpe yina me katuka ve kisika mosi na nge?

• Kisika yina nge ke vandá, wapi mutindu ya makanisi to nzonzolo ya yimbi bantu ke na yawu na yina me tadila bantu ya bampusu to bandinga ya nkaka? Samu na yinki nge fwana kulosa yawu?

Tanga 2 Bakorinto 6:11-13, mpe na manima beto zonzila kyuvu yayi:

• Yinki nge lenda sala samu na kukuma pene-pene ya bampangi ya bakala na ya kento yina me katuka bisika ya nkaka?

5. Lemvokila na ntima mosi mpe sala kizunu

Yehova ke lemvokilá beto na ntima mosi ata ti yandi ke vingilá ve beto lemvokila yandi. Tanga Nkunga 86:5, mpe na manima beto zonzila byuvu yayi:

• Wapi yina ke bunene ya lemvo ya Yehova?

• Samu na yinki nge ke sepelá na kifu ya yandi ya kulemvokila?

• Wapi bamambu lenda sala ti nge wisana dyaka ve na bampangi?

Wapi mutindu beto lenda landa kifwani ya Yehova mpe kubumba bumosi ya beto na bampangi? Tanga Bingana 19:11, mpe na manima beto zonzila kyuvu yayi:

• Kana mpangi me lwalisa nge ntima, yinki nge lenda sala samu na kubongisa bamambu?

 Bantangu ya nkaka beto ke nyongisá bampangi. Ntangu ya ke salamá, yinki beto me fwana kusala? Tala VIDEO, mpe na manima beto zonzila kyuvu yina ke landa.

• Na video, yinki mpangi ya kento yayi salá samu na kuyidika bamambu?

 NA BUNKUFI

Nge lenda sala ti bumosi vanda na kati ya kimvuka na kulemvokilá mpe na kuzolá bampangi ya nge nyonso.

Mambu ya kusimba

• Yinki nge lenda sala samu na kununga makanisi ya yimbi na yina me tadila bantu yina ke ve mutindu mosi na nge?

• Yinki nge lenda sala kana nge ke na wisaná ve na mpangi mosi na kati ya kimvuka?

• Samu na yinki nge ke na nsatu ya kulanda kifwani ya Yehova na yina me tadila kulemvokila bampangi?