Ata ti nge ke zolá mingi Yehova mpe ke salá bangolo samu na kusala ve mambu yina ke sala yandi mpasi, ntangu ya nkaka nge lenda sala disumu. Kasi ya ke na masumu yina me lutila nene na ya nkaka. (1 Bakorinto 6:9, 10) Kana ya me kumina nge na kusala disumu ya nene, zaba ti Yehova me bika ve kuzola nge. Yandi ke na nsatu ya kulemvokila nge mpe kusadisa nge.

1. Yinki beto me fwana kusala samu Yehova lemvokila beto?

Ba yina ke zolá Yehova ke vandá na manyongi mingi kana ya me kumina bawu na kusala disumu ya nene. Kasi ba ke kuzwá kizunu na mambu yina Yehova zonzá na dikanda ya yandi: “Ata masumu ya beno kele mbwaki mutindu menga, ya ke kuma mpembe mutindu mvula ya mpembe [neige].” (Izaya 1:18) Kana beto balula ntima, Yehova ke lemvokila beto. Kasi yinki zola zonza kubalula ntima? Ya zola zonza kunyonga na ntima nyonso mambu yina beto salá, kuvutukila dyaka ve yimbi yina, mpe kubondila Yehova samu yandi lemvokila beto. Na manima, beto ke sala bangolo samu na kusoba makanisi mpe ndyatulu ya yimbi yina me nata beto na kusumuka. Beto ke sala mpe nyonso samu na kulanda malongi ya Yehova na luzingu ya beto.—Tanga Izaya 55:6, 7.

2. Wapi mutindu Yehova ke sadilá bakuluntu samu na kusadisa beto kana beto me sala disumu?

Kana beto me sala disumu ya nene, Yehova me lomba na beto na “kubokila bakuluntu ya dibuundu.” (Tanga Zaki 5:14, 15.) Bakuluntu yayi ke zolá mingi Yehova mpe ke zolá ba yina ke sadilaka yandi. Ba zaba mutindu ya kusadisa beto na kuvutula kindiku ya mbote na Yehova.—Bagalate 6:1.

Wapi mutindu bakuluntu ke sadisá beto kana beto me sala disumu ya nene? Bakuluntu zole to tatu ke sadila malongi ya Biblia, samu na kulakisa beto na yinki mambu yina beto me sala ke yimbi. Ba ke pesa mpe beto malongi yina ke sadisa beto na kuvutukila dyaka ve disumu yina beto salaka. Samu ti beto ke dyaka ve ngolo na kimpeve, ba ke lomba na beto na kusala dyaka ve bima ya nkaka na kati ya kimvuka tii ntangu beto ke beluka na kimpeve. Kana muntu me sala disumu ya nene mpe me balula ve ntima, bakuluntu ke basisa yandi na kimvuka samu yandi nata ve bampangi ya nkaka na kusala mambu ya yimbi mutindu yandi.

 SOSA KUZABA MBOTE-MBOTE

3. Kuzonza pwelele masumu ke sadisa beto na kuvutula kindiku ya mbote na Yehova

Masumu nyonso yina beto ke salá, ke lwalisá ntima ya Yehova, na yawu beto me fwana kuzonzila yandi yawu nyonso. Tanga Nkunga 32:1-5, mpe na manima beto zonzila kyuvu yayi:

• Samu na yinki ya ke mbote samu na beto na kuzonza masumu ya beto nyonso na Yehova?

 4. Kubasisa muntu na kimvuka ke sadisá muntu yina me sumuka mpe ya ke bumbá kimvuka

Kana muntu me sala disumu ya nene mpe me manga kulanda malongi ya Yehova, yandi lenda vanda dyaka ve na kati ya kimvuka. Yandi ke dyaka ve mosi ya bisadi ya Yehova. Na yawu beto ke vanda dyaka ve kintwadi na yandi mpe ke solola dyaka ata fioti ve na yandi. Tanga 1 Bakorinto 5:6, 11 na 2 Yoane 9-11, mpe na manima beto zonzila kyuvu yayi:

• Mutindu levure ke vimbisá pâte ya dimpa, samu na yinki kuvanda na muntu yina me sumuka mpe me manga kubalula ntima lenda bebisa kimvuka?

 NA BUNKUFI

Kana beto me sala disumu ya nene mpe beto me nyonga na ntima nyonso mambu yina beto me sala, mpe me sala bangolo na kuvutukila dyaka ve yawu, Yehova ke lemvokila beto.

Mambu ya kusimba

• Samu na yinki ya ke mbote samu na beto na kuzonzila masumu ya beto nyonso na Yehova?

• Yinki beto fwana kusala samu Yehova lemvokila masumu ya beto?

• Kana beto me sala disumu ya nene, samu na yinki beto me fwana kuzonza na bakuluntu?