Bakristo ya tsyeleka ke salá bangolo samu ata kima to ata muntu nata bawu na kubebisa kindiku ya bawu na Yehova. Ntembe kele ve, ni mutindu yina mpe nge ke kanisaka. Kukangama ya nge ke mfunu mingi na meso ya yandi. (Tanga 1 Bansangu 28:9.) Wapi bamambu lenda sala ti ya vanda mpasi samu na nge na kuvanda ya kukangama kaka na Yehova, mpe wapi mutindu nge lenda nunga yawu?

1. Wapi mutindu bantu ya nkaka lenda sosa kubwisa kiminu ya beto na Yehova?

Bantu ya nkaka lenda sosa kukanga beto nzila na kusadila Yehova. Bantu yango ke banani? Ya lenda vanda bantu yina vandá Bambangi ya Yehova na ntama, kasi me bika kusadila Yehova mpe ke na zonzá mambu ya luvunu na yina me tadila dibuundu ya Yehova samu na kubwisa kiminu ya beto. Ba ke bokilá bawu, bantu yina me balula Yehova na dibuundu ya yandi mukongo (apostats). Bamfumu ya mabuundu ya nkaka ke zonzá mambu ya luvunu na yina me tadila beto, samu na kunata bantu ya nkaka yina ke salá ve keba, na kubika matsyeleka. Kusolola na bawu, kutanga babuku to bima yina ba ke tulá na internet, kukota na ba sites internet ya bawu to kutala bavideo yina ba ke salaka, ke tula luzingu ya beto na mpasi mpe ke bwisa kiminu ya beto. Samu na ba yina ke sosá kunata bampangi ntama na Yehova, Yesu zonzá: “Beno bika bawu! Bawu kele bampofo [bantu yina ke na meso ya kufwa] yina ke na kunata bampangi ya bawu bampofo. Kana mpofo ke na kunata mpofo ya nkaka, bawu nyonso zole ke kubwa na dibulu.”—Matayi 15:14.

Kasi yinki beto ke sala kana muntu yina beto zaba me baka mukanu ya kuvanda dyaka ve Mbangi ya Yehova? Ya lenda sala beto mpasi mingi na ntima ntangu muntu yina beto ke zolá me bika Yehova. Muntu yango lenda sosa kunata beto na kusoola kana beto ke vanda ya kukangama na Yehova to na yandi. Na yawu, beto me fwana kuvanda kaka ya kukangama na Yehova kulutila bima nyonso. (Matayi 10:37) Ya zola zonza ti, beto ke tumama kaka na mambu yina Yehova ke zonzá na beto, na kulutisa ve ntangu na bantu ya mutindu yina.—Tanga 1 Bakorinto 5:11.

2. Wapi mutindu mikanu ya beto lenda lakisa kana beto ke ya kukangama na Yehova to ve?

Luzolo ya beto na Yehova ke sala ti beto manga mambu nyonso yina lenda nata beto na kusala kintwadi na mabuundu ya luvunu. Ya vanda kisalu ya beto, bimvuka ya nkaka yina beto ke kotá to mambu ya nkaka yina beto ke salá, zolá nata ve beto na kukota na bamambu ya mabuundu ya luvunu. Yehova me kebisa beto: “Bantu ya dikanda ya munu! Beno basika na [Babilone ya nene].”—Luzabusu 18:2, 4.

 SOSA KUZABA MBOTE-MBOTE

3. Keba na bantu yina ke longá mambu ya luvunu

Yinki beto me fwana kusala kana beto me kuwa mambu ya yimbi na yina me tadila dibuundu ya Yehova? Tanga Bingana 14:15, mpe na manima beto zonzila kyuvu yayi:

• Samu na yinki beto zolá sala keba na kundima ve mambu nyonso yina beto ke kuwaka?

Tanga 2 Yoane 10, mpe na manima beto zonzila byuvu yayi:

• Wapi mutindu beto me fwana kubakila bantu yina me balula Yehova na dibuundu ya yandi mukongo?

• Ata ti beto ke sololá ve na bantu yina, samu na yinki kutanga babuku, kutala bavideo to kukota na site internet ya bawu, lenda nata beto na kuwa bawu?

• Nge me kanisa ti ya ke pesa Yehova kilengi kana beto kuwa mambu ya luvunu yina bantu ke zonzá samu na yandi to na dibuundu ya yandi?

4. Vanda ya kukangama kana mpangi mosi me sala disumu

Kana beto me kuwa ti mpangi mosi na kati ya kimvuka me sala disumu ya nene, yinki beto fwana kusala? Tala nsiku mosi yina Nzambi pesá na Izraele ya ntama. Tanga Balevi 5:1.

Mutindu verse yayi me zonza yawu, kana beto me kuwa ti muntu me sala disumu ya nene, beto fwana kuzonzila yawu na bakuluntu. Kasi tekila beto sala yawu, ya ke vanda mbote na kuzonza na mpangi yina me sala disumu na kukwenda tala bakuluntu yandi mosi, samu na kuzonzila bawu disumu yina yandi me sala. Kana yandi me sala ve yawu, ni beto me fwana kukwenda tala bakuluntu samu na kulakisa kukangama ya beto na Yehova. Wapi mutindu kusala faso yina ke na lakisá luzolo ya kukwikama samu na . . .

• Yehova Nzambi ya beto?

• muntu yina me sala disumu?

• bampangi ya nkaka na kimvuka?

 5. Vanda ntama na Babilone ya nene

 NA BUNKUFI

Samu na kuvanda kaka ya kukangama na Yehova, beto me fwana kuvanda ntama na ba yina nyonso ke ve ya kukangama na yandi. Beto me fwana mpe kubasika mpe kuvanda ntama na mabuundu ya luvunu.

Mambu ya kusimba

• Samu na yinki beto me fwana ve kutala, kutanga to kuwa mambu yina ke zonzá bantu yina balulá Yehova na dibuundu ya yandi mukongo?

• Wapi mutindu beto me fwana kubakila bantu yina ke dyaka ve Bambangi ya Yehova?

• Wapi mutindu beto lenda tumama na musiku ya kuvanda ntama na mabuundu ya luvunu?