Bubu yayi to na bilumbu yina ke kwiza, bakristo nyonso ke kutana na bankwamusu mpe ba ke nyokola bawu. Kasi, ya me fwana kwandi kupesa beto boma?

1. Wapi mutindu beto me zaba ti ba ke talisa beto mpasi?

Biblia ke zonzá pwelele ti: “Bantu nyonso yina ke zola kuzinga kintwadi na Yesu-Klisto na kuvanda ya kukwikama na Nzambi, ke tala mpasi mingi.” (2 Timote 3:12) Ba nyokolá Yesu ntangu yandi vandá awa na ntoto samu yandi vanda kotá ve na mambu ya yinza ya Satana. Beto mpe ke kotá ve na mambu ya yinza, na yawu ya ke pamusá ve beto ntangu bamfumu ya yinza to mabuundu ke nyokolá beto.—Yoane 15:18, 19.

2. Wapi mutindu beto lenda yidama tekila bankwamusu kuma?

Samu na kuyidama na bankwamusu, beto me lunga kukumisa ngolo kiminu ya beto na Yehova kubanda bubu yayi. Ni na yawu, beto zolá baka ntangu ya kusambilá mpe ya kutangá Biblia bilumbu nyonso. Beto me lunga mpe kuvanda na balukutakanu nyonso. Bamambu nyonso yayi ke pesa nge ngolo ya kununga bankwamusu na bukindi nyonso, ata ti ya ke na katuká na bantu ya dikanda ya nge. Ni na yawu ntumwa Polo, yina vanda kutaná na bankwamusu ntangu nyonso, soniká: “[Yehova] kele kisadisi ya munu, mu ke vanda ve na boma ya kima.”—Baebre 13:6.

Kima ya nkaka yina ke sala ti beto vanda na bukindi na mantwala ya bankwamusu ni kisalu ya kusamuná ntangu nyonso. Kisalu ya kusamuna ke sadisa beto na kukumisa ngolo kiminu ya beto na Yehova mpe na kununga boma ya bantu. (Bingana 29:25) Kana nge kulisa bukindi ya nge na kisalu ya kusamuna kubanda bubu yayi, ya ke sala ti nge bika ve ata fioti kusamuna ata ntangu bamfumu ya bwala ke nimina kisalu ya beto ya kusamuna.—1 Batesalonika 2:2.

3. Wapi bambote beto ke kuzwa kana beto kanga ntima na mantwala ya bankwamusu?

Ntangu beto ke kangá ntima na mantwala ya bankwamusu to ntangu ba ke nyokolá beto, ata ti ya ke pesá ve beto kilengi, kiminu ya beto ke kumá dyaka ngolo. Beto ke kumá pene-pene na Yehova samu ti, beto ke talá mutindu yandi ke sadisá beto na luzingu ya beto ntangu beto ke vandá ya kulemba. (Tanga Zaki 1:2-4.) Ntangu beto ke kutaná na bankwamusu to ba ke nyokolá beto, ya ke salá Yehova mpasi, kasi ntangu beto ke kangá ntima, ya ke pesaka yandi kilengi. Biblia ke zonzá: “Kana nge ke na kuvibidila [. . .] samu na mambu ya mbote yina nge me sala, ya kele mbote na ntwala ya Nzambi.” (1 Piere 2:20) Yehova ke pesa na ba yina nyonso ke vanda kaka ya kukangama na yandi luzingu ya ntangu nyonso na yinza ya malu-malu. Ata muntu na yinza yango ke kwamisa to ke nyokola dyaka bawu.—Matayi 24:13.

 SOSA KUZABA MBOTE-MBOTE

4. Nge lenda kanga ntima na mantwala ya bankwamusu ya dikanda

Yesu zabá mbote-mbote ti, bantu ya nkaka ya dikanda ya beto lenda vanda ve na kilengi kana beto me baka mukanu ya kusadila Yehova. Tanga Matayi 10:34-36, mpe na manima beto zonzila kyuvu yayi:

• Yinki lenda salama ntangu muntu mosi ya dikanda me baka mukanu ya kusadila Yehova?

5. Kubika ve kusadila Yehova ata ba ke na talisá nge mpasi

 6. Yehova ke sadisa nge na kukanga ntima

 NA BUNKUFI

Yehova ke talá kilengi na bangolo yina beto ke salá samu na kusadila yandi ata ti beto ke na kati ya bankwamusu. Na lubakusu ya yandi, beto ke lenda kukanga ntima na kilengi nyonso!

Mambu ya kusimba

• Wapi mutindu beto me zaba ti ba ke talisa beto mpasi?

• Yinki nge lenda sala bubu yayi samu na kuvanda ya kuyidama ntangu bankwamusu ke kwiza?

• Yinki ke sadisa nge na kundima ti ata bankwamusu nge ke lenda kuvanda kaka ya kukangama na Yehova?