Samu maladi ya yimbi ya Coronavirus ke na kuzwá mingi bantu ya kukula, bampangi ya beto ya kukula ke na landá bamambu yina baguvernema me zonza, na yina me tadila sante, mpe kuvanda na bayinzo. Kasi beto me zimbana ve bawu, mpe ba me bika ve kisalu ya predikasion. Ba ke na sadilá bametode ya malu-malu samu na kulanda balukutakanu, mpe bareunion ya predikasion.

Na Rome (Italie), mpangi mosi ya kento, yina ke na bamvula 94, yina kuzwá bateme na 1952, vandá lenda dyaka ve kubasika avant maladi ya yimbi yayi. Yandi vandá landa balukutakanu na nzila ya JW Stream, mpe yandi lutisá bantangu mingi yina yandi vandá landa dyaka ve balukutakanu ya kimvuka ya yandi. Kasi banda kilumbu bakunlutu ya kimvuka ya yandi baká dyaka desizion ya kusala balukutakanu na nzila ya videoconference, yandi mase talá bampangi ya kimvuka ya yandi.

Na Spanish Fork, na Utah (États-Unis), mpangi Stephanie Aitken, yina ke na makutu ya kufwa, ke vandá na yinzo ya mababa, kisika yina bantu ke kotá ve kidi-kidi. Kuluntu mosi na kento ya yandi kwizá tala Stephanie, samu na kusadisa yandi na kutula aplikasion ya videoconference, ba sololá na yandi na ndinga ya mababa na manima ya porte ya yinzo yina yandi vandá. Ntangu mpangi ya beto lendá kutula aplikasion yango na telephone to tablete ya yandi. Mpangi Stephanie kangak’ yawu ngolo na maboko ya yandi. Yandi vandá na kilengi mingi, samu ya zolá banda kusadisa yandi na kulanda balukutakanu, mpe kutalana na bampangi ya nkaka na videoconference.

Kutala faso bampangi ya beto na yinza nyonso ke na sadilá teknologi, samu na kukontinye kuzwa madya ya kimpeve mpe kupreche na ntangu ya mpasi yayi, ke na natá beto na kukanisa na promese yina Yehova salá samu na dikanda ya yandi, promese yina me tadila kusadila mbote “[lait] ya makanda.” (Izaya 60:16) Beto ke na kiminu ti, Yehova ke kontinye kukuma yina ke mbote samu na bisadi ya yandi na ntangu ya mpasi.