Memorial ya 2020 me luta na faso mosi yina nabunu ya salama ntete na disolo ya Batemwe ya Yehova. Ya me vanda mbala ya ntete yina beto me sadila tele mpe radio na bisika mingi ya Afrike mpe na bandinga mingi.

Ya me sadisa baproklamatere kuluta 407 000 mpe na bantu yina ke longoká Biblia, yina beto me zaba ve nombre. Ata beto me zaba ve nombre ya bantu nyonso yina me kuwa mpe me landa programe yango, beto me zaba ti bantu kuluta 150 million me vanda na ngolo ya kulanda yawu.

Bantu mingi na yinza nyonso landá programe ya Memorial na videoconference samu na maladi ya Coronavirus, kasi na Afrike baproklamatere mingi ke vandá na bisika yina internet na credit ya telefone ke vandá ntalu. Mingi na kati ya bawu lendá ve kulanda yawu na nzila ya videoconference to na kubaka yawu na internet. Samu na yawu, Kimvuka ya bantwadisi pesá nzila na bafiliale ya nkaka samu ba solola na bachaine ya radio mpe ya tele ya babwala ya bawu. Ni yawu salá ti programe ya Memorial luta na nzila ya radio, mpe na tele kaka na prix ya fioti.

Avant kilumbu ya Memorial, bafiliale 11 (Angola, Benin, Cameroun, Côte d’Ivoire, République Démocratique du Congo, Ghana, Malawi, Mozambique, Sénégal, Zambie, mpe Zimbabwe) sololá na bachaine ya radio mpe ya tele. Ni yawu salá ti ba lenda kulutisa programe ya Memorial na bisika kuluta 36 na kati ya babwala 16 ya Afrike.

Angola

Bachaine 6 ndimá kulutisa programe ya Memorial na bandinga 6: Ibinda, Kikongo, Kimbundu, Nyaneka, Portugais, mpe Umbundu. Ya lutá na bisika yina bantu ke zonzá mingi bandinga yayi.

République Démocratique du Congo

Pangi mosi ya kento yina ke longoká Biblia na beto, salá programe ya kulanda yandi mosi diskur ya Memorial na yinzo ya bawu samu famiye ya yandi ke zolá ve batemwe ya Yehova. Ntangu yandi vandá yidama, papa ya yandi vandá na salon mpe bokilak’ yandi na kuzonza na yandi ti “programe me banda” Mpe ntangu yandi basiká na salon, yandi kwizá tala ti famiye nyonso vandá deja na mantwala ya tele. Bantu 10 ya famiye ya yandi landá diskur ya Memorial.

Na bwala mosi yina ke pene-pene na bwala ya Luena, muntu mosi zonzá: “Bapastere ya beto me sala ata kima, kasi beno, beno ke na continye kusambila Nzambi ya beno na ntangu ya maladi ya Coronavirus yayi. Mba beto ke kwiza sambila na beno!”

Ghana

Chaine mosi ya tele ndimá kulutisa Memorial na ndinga ya Twi. Ya lutisá publisite na kuzonzila na bantu na kulanda diskur na tele. Mpe ya lutisá dyaka bavideo Samu na yinki Yesu kufwaka? Samu na yinki Nzambi me bika nzila na yimbi mpe mpasi ? Mpe na video ya nzimbu, Le monde nouveau mpe Juste à notre porte.

Sénégal

Mpangi ya beto mosi ya kento me zonza: “Ba vandá zonzila Yehova na tele mpe na radio. Ya vandá mambu yina nabunu mu tala. Beto ke na vrai kilengi samu na Nzambi ya beto, Yehova!”

Mpangi ya nkaka ya kento zonzá: “Ntangu mu kuwá ti diskur ya Memorial ke luta na tele, mu zonzá: “ya ke nete kompagne ya ba-invitasion ya Memorial na ntangu ya Coronavirus.” Na mbangu nyonso mu bokilá ba yina ke longoká Biblia na munu, mpe bantu yina mu zaba samu na kupesa bawu programe ya tele. Bantu 9 yina ke longoká Biblia na munu, mpe bantu ya dikanda ya bawu landá diskur na radio mpe na tele. Muntu mosi ya famiye ya munu yina landá programe na tele, yufulá munu si beto lenda zonzila dyaka malongi yango. Mu ndimá na kilengi nyonso.”

Decizion ya kulutisa programe ya Memorial na tele mpe na radio me lakisa ti “Yehova ke lembaná ata kima mosi ve.”—Matayi 19:26.