Lukutakanu ya kupesa badiplome ya 148^e klase ya lekole Biblike ya Galaad, me luta na faso ya mbote, kasi kaka kima mosi me chanje: Na kati ya sale, ya me vanda ve na bantu yina me landa lukutakanu yango. Bantu nyonso landá programe na nzila ya video (livestream). Na kati ya mupepe ya maladi ya yimbi yayi, programe ya 148^e klase ya Galaad, me vanda ekzample ya nsuka ya faso organizasion ya Yehova ke landá bachanjema.

Programe yango lutá na kilumbu ya 14 Mars 2020, na centre ya enseignement ya Batemwe ya Yehova na Patterson, New York. Mpangi Stephen Lett, muntu ntwadisá lukutakanu yango. Nombre ya ba yina me sala lekole yango me vanda 55. *

Basemaine yina me luta, maladi ya Coronavirus mwanganá na yinza nyonso, mpe ba vandá zonzila yawu mingi na jurnal. Faso basangu ya malu-malu na jw.org me lakisa, siege mondial ya Batemwe ya Yehova landilá mambu yango mbote-mbote, mpe vandá twadisa bimvuka na kulanda misiku yina ba-otorite ke na pesá.

Mosi ya misiku ya yango, vandá ni kunimina bantu mingi na kuvukana kisika mosi. Samu na rezon yayi mpe ya nkaka, Kimvuka ya bantwadisi zonzá na bampangi ti, ba ke bokila ve bantu ya nkaka na kulanda programe ya kupesa badiplome ya lekole ya Galaad. Ba zonzá dyaka ti, ata muntu ke landa programe yango na kati ya sale ya Patterson. Famiye ya Bethel mpe ba-eleve ya Galaad pesá ekzample ya mbote na yina me tadila kulanda misiku.—Yoane 13:34, 35.

Na yina, ba yina nyonso ba-eleve mpe famiye ya Bethel bokilá, landá programe yango na nzila ya video. Na yinza nyonso, bampangi kuluta 10.000 landá programe yayi na ba kamarade, mpe bantu ya famiye ya ba-eleve.

Kimvuka ya bantwadisi zola ti, beto kontinye kutula balukutakanu ya beto na plase ya ntete, mpe bamambu nyonso ya kimpeve ata maladi ya yimbi ya Coronavirus. Samu na yawu, ntama mingi ve Kimvuka ya bantwadisi me pesa beto ba-instruksion na nzila ya bafilial ya yinza nyonso, samu ba zaba faso ya kusala balukutakanu. Na babwala ya nkaka, bampangi ya beto ke na vukaná na bagrupe ya fioti, mpe ba ya nkaka ke na landá balukutakanu na nzila ya videoconference. Beto ke na kiminu ti, bampangi na yinza nyonso ke kontinye na kuzwa madya ya kimpeve na nzila ya bimvuka ya bawu.

Ya ke na talaná pwelele ti, ata kima lenda kanga Yehova nzila ya kusadisa organizasion ya yandi samu kiminu ya beto lemba ve na mantwala ya bamambu ya mpasi.—Nkunga 18:29.