Siege mondial ya Batemwe ya Yehova ke na landá mbote-mbote bamambu yina me tadila maladi ya yimbi yina ba ke na bokilá Coronavirus. Beto zaba ti Biblia ke zonzá na bantangu ya mansukina, bamaladi ya yimbi ke vanda. (Luke 21:11) Ntangu maladi ya yimbi ke basiká, beto ke lakisá ti beto ke na mayela, ntangu beto ke salá nyonso samu na kuvuukisá luzingu ya beto mpe ya bampangi.—Bingana 22:3.

Ba ya nkaka lendá yufula wa’ faso bampangi ya beto yina ke na babwala yina Coronavirus kele, ke na salá? Maladi yango me chanje bamambu mingi na bafiliale mpe na bimvuka mingi na Italie, Japon, Corée ya Sud, mpe na babwala ya nkaka. Bafiliale ya nkaka, me nimina bavizite. Na bisika ya nkaka, bamfumu ya bwala me nimina bantu na kuvukana na bagrupe, ya zola zonza ti balukutakanu ya beto ya nene ke salama dyaka ve malu-malu yayi na babwala yango. Dyaka, bimvuka mingi me chanje baprograme ya balukutakanu, mpe ya kisalu ya predikation. Ata faso yina bampangi ya beto ke na kontinyeke kupesa bampangi ya nkaka ngolo na kimpeve.—Yude 20, 21.

Na mantwala ya bamambu yayi, bampangi ya beto me tala ti, ya ke mbote beto landa bakonseye yina ke na yisi. Bakonseye yango lenda vanda mbote mingi samu na nge mpe samu na famiye ya nge, si maladi ya yimbi me basika na kisika yina nge kele.

• Kuvanda ve na boma. Beto me zaba ti, kulanda ba-information ke kifu ya mbote samu ya ke sadisa beto na kuzaba faso ya kubumba banzutu ya beto, kasi ya ke lomba na beto na kutala bamambu na faso ya mbote. Mpe kubaka ntangu ya kutala bamambu mbote-mbote samu beto bika kukuma na boma.—Bingana 14:15; Izaya 30:15.

• Landa bamambu mpe misiku yina bamfumu to baguvernema me lomba na kusala. Na babwala mingi, baguvernema ke na pesá bakonseye mpe misiku samu na sante ya beto. Ya ke mbote beto zaba yawu mpe beto sadila yawu.—Baroma 13:1.

• Vanda propre. Ya ke mbote na kuvanda na kifu ya kusukulá maboko, na maza mpe savon to na mangaga yina ke fwá bamicrobe. Beto zolá sukula mpe bisika nyonso yina beto ke simbá mingi, ya vanda na yinzo ya beto, to na basalle du Royaume. Dyaka bantu ya mayela me tala ti, kifu ya kupesá bampangi mbote na maboko, ke na sadisá maladi ya yimbi yayi na kumwangana. Na yina, organizasion ya OMS yina ke talá bamambu ya maladi, me pesa bakonseye mingi na bantu nyonso, samu na maladi ya Coronavirus.

• Lakisa luzolo na bampangi. Beto zaba ti ya ke mbote na kukwenda na balukutakanu, to na kisalu ya predikasion, kasi, si nge ke na belá, ya ke mbote nge vanda na yinzo. Si beto sala yawu, beto ke bumba sante ya bampangi ya beto bakristo, mpe ke lakisa ti beto ke zolá bawu.—Matayi 22:39.

• Landa bamambu ya malu-malu yina ba me zonzila samu na balukutakanu mpe kisalu ya predikasion. Bafiliale yina ke na teritware yina maladi ya Coronavirus kele, ya lenda vanda mbote na bawu na kunimina na mwa ntangu fioti balukutakanu, kisalu ya predikasion to bamambu ya nkaka ya organizasion ya Yehova. Ni desizion yayi ba me baka samu na babwala yina maladi ya Coronavirus kele. Faso ya me salama na Italie, Japon, mpe Corée ya Sud. Na babwala yango, bakuluntu ke na salá nyonso samu baproklamater landa balukutakanu na telefone to na nzila ya bavideo. Mpe samu na kisalu ya predikasion, baproklamater lenda sadila telefone, bamesaje, internet, to baletre.

Na yisi nge ke kuzwa mikanda yina ke na pesá bakonseye ya mbote samu na kuzaba faso ya kubumba banzutu ya beto na mantwala ya bamaladi.

• “Protégez-vous de maladies” na Réveillez-vous! No. 6 2016, p. 4-6

• “Des moyens d’améloirer votre santé” na Réveillez-vous! ya Juin 2015, p. 2-7

• “Une meilleur santé c’est possible! Leçon 4—Protégez votre santé” na Réveillez-vous ya mars 2011, p. 7