Italie ke mosi ya babwala yina maladi ya coronavirus ke na fwá bantu mingi. Na nzila ya Kimvuka ya bantwadisi, filiale ya Italie ke na pesá diboko mpe ngolo na kimpeve na bampangi ya beto ya kento na ya bakala

Bakomite tatu ya sekur. Ke na lungisá, bansatu ya bampangi yina ke vandá na Nord, na Centre, mpe na Sud ya bwala. Bakomite yayi ke landá na meso, bansatu ya baproklamatere, na nzila ya bantwadisi ya sirkonskripsion, mpe bantwadisi sirkonskripsion ke zwá bansangu na nzila ya bakunlutu ya bimvuka.

Na nyonso yina bakomite ya sekur ke na salá, bakunlutu ke na sadisá mpe baproklamatere samu ba kontinye kuvanda ngolo na kimpeve. Mpangi Villiam Boselli, yina ke ntwadisi ya sirkonskripsion na bwala ya Milan, mosi ya babwala ya ntete yina kuzwá maladi ya yimbi ya Coronavirus, me zonza: “Ata bampangi ke ve na basiká na bayinzo ya bawu, bawu nyonso ke na zwá bansangu ya bampangi na nzila ya videoconference. Mpe balukutakanu yina ke na lutá na nzila ya videoconference, ke mosi ya bima yina beto ke na sadilá samu na kupesa bampangi ngolo, na nzila ya bakomonter. Bampangi ya beto ya kukula mpe ke na zwá bambote na balukutakanu yayi. Samu na munu, bumosi ya bimvuka ke na kumá dyaka ngolo ya kulutila!”

Dyaka, bantu mingi yina ke ve batemwe landá balukutakanu na bafamiye yina ke batemwe. Mpangi mosi me zonza: “Bakala ya munu vandá zolá ve kukwiza na balukutakanu, kasi bubu-yayi ni balukutakanu me kwiza na yinzo ya beto [...] Mpe beno yufula munu yinki? Yandi me zola yawu mingi!”

Bampangi ya beto ya kento na ya bakala ke na simbá ba-okazion nyonso samu na kuzonzila mambu ya Biblia. Na kifwani: Ntangu mpangi ya beto ya kento vandá kwenda bikila mpangi mosi ya kukula foteye ya bantu ya maladi, bapolicer tatu kangak’ yandi. Mpangi ya beto zonzá na bawu ti, yandi vandá kwenda sadisa mpangi mosi ya kukula, yina vandá na bezoin ya foteye ya bantu ya maladi, mpe yandi lakisá bawu laissez-passer, na manima yandi pesá na mosi na mosi ya bawu ba jurnale yina ke zonzá: “Yinki nge ke kanisaka samu na bilumbu yina ke kwiza?” Bapolicer dimak’ yawu. Mpe ntangu yandi vandá vutuka na yinzo, yandi kutaná dyaka na bawu, kasi ya mbala yayi, ya vandá samu na kuvutula yandi matondo. Mpe ba yufulá mpangi ya beto bakesion mingi, na kivuvu yina Biblia ke zonzá, ba bokilá mpe bapolicier zole ya nkaka samu na kwiza kuwa. Mpangi ya beto vandá na kilengi ya kulakisa bawu site ya beto ya internet jw.org. Mosi ya bapolicier zonzá: “Matondo madame, nge me pesa beto ngolo mingi”.

Mpangi Boselli me zonza: “Mosi ya baresponsabilete ya munu, ni kupesa bampangi ngolo, kasi ntangu mu ke talá faso ba ke nwaná samu na kubumba kimpeve ya bawu, ni munu muntu ke zwá ngolo. Luzolo ya bawu samu na Yehova ke ngolo, mpe me luta luzolo yina ba ke na yawu samu na bima ya nkaka, na ntangu mu ke talak’ yawu, ya ke basisá munu maza ya meso”

Ya vrai, ata na mantwala ya bamambu ya mpasi, bampangi ya beto ya kento na ya bakala ke kaka ngolo na kimpeve, mpe ke ve na biká bampasi yina maladi ya yimbi yayi me nata, lembisa kiminu ya bawu.’—1 Batesalonika 3:2, 3.