Na kilumbu ya 23 Juillet 2020, na kati ya lukutakanu ya Organisation pour la séurité et la coopération en Europe (OSCE) *, Etats-Unis na babwala 30 ya Europe lakisá ti ba ke na sepelá ve na faso yina Russie ke na tortureke mpe ke na kwamisá bampangi ya beto.

M^me Lane Darnell Bahl yina ke Conseillère politique ya mission américaine ya OSCE, zonzá na lukutakanu yina ti: “États-Unis na babwala ya nkaka yina vandá na lukutakanu yango kondaneke mpe ke na kontinye kukondane guvernema ya Russie. Ya ke samu na bansangu yina lakisá faso ba-otorite ya bwala ya Russie botolá bayinzo ya Batemwe ya Yehova, kangá ba ya nkaka ata ba salá ata kima, talisá bawu mpasi mpe tulá bawu na boloko. Ba ya nkaka samu ba lutisa bamvula 6 na boloko.”

Bantwadisi vandá na boma mingi samu na bansangu ya tama mingi ve, yina vandá zonza ti ba-otorite ya bwala ya Russie fuyeke bayinzo kuluta 100 ya Batemwe ya Yehova na region ya Voronej. M^me Bahl bwelá: “Faso ba ke na kwamisá bantu ya dibuundu yayi me sala yimbi na ata muntu, ke kima mosi yina ke na natá muntu nyonso na kudasuka.”

M^me Nicola Murray, nketo yina ke na zulu ya ba-député ya délégation britannique (UK), zonzá mpe ti, samu “nombre ya bayinzo yina ba fuyeke vandá mingi mpe ya salamá na mbala mosi, lakisá nete ya vandá kompagne yina ba salá samu na kukwamisa Batemwe ya Yehova.” Yandi bwelá: “Ba-otorite ya Russie salá ba-enkete mpe natá Batemwe ya Yehova ya nkaka na tribunal, samu ba vandá sala ntangu nyonso bisalu ya dibundu ya bawu.”

M^me Bahl lakisá mpe ti ba-otorite ya Voronej vandá ve na rezon ya kuzonza ti Batemwe ya Yehova yina ke na boloko salá yina ba ke bokilá “techniques de complot” Na kati ya bateknik yango, ke na mikanda na forma ya audio, organizasion ya kimvuka ya fioti ya bantu, mpe ba videoconference samu na kulanda balukutakanu. Yandi zonzá ti mambu yina ba-otorite ya Russie salá, vandá “mambu ya nsoni mpe ya vandá ve na sens.” Yandi zonzá mpe mambu yayi: “Mu ke sadilá mpe ‘techniques de complot’ bilumbu nyonso.” Yandi zonzá dyaka ti bantu ya délégation russe yina landá lukutakanu ya OSCE depuis bisika ba vandá, vandá mpe “coupable samu ba sadilá mpe bateknik yayi.”

Na déclaration mosi, babwala 27 ya Union européenne zonzá: “Be kuwá mambu yina délégation russe zonzá bambala mingi na mantwala ya yina ba ke bokilá conseil permanent, ti Batemwe ya Yehova lenda sambila Nzambi ya bawu na kati ya liberte nyonso bubu yayi tii na bilumbu ya mantwala, mpe ti Fédération ya Russie ke protejeke liberte ya mabuundu. Kasi, beto ke na kontinyeke kutanga barapor mingi yina ke na zonzá ti bamilitere ke na fuyeke bayinzo ya Batemwe ya Yehova, ke na tulá bawu na boloko, mpe ke na natá na bawu na batribunale. Ya ke na kwelaná ata fioti ve na mambu yina délégation russe zonzá.”

Délégation européenne zonzá mpe: “Bantu nyonso, na Batemwe ya Yehova na kati, me lunga kusadila ba-droit ya bawu na kati ya kizunu nyonso, ata droit ya liberte ya mabuundu, ya liberte ya kuvukana mpe ya liberte ya balukutakanu, mpe ya liberte ya kuzonza, sans kusala diference, ni yina ke zonzá Constitution ya Fédération ya Russie, badesizion yina Russie baká na mantwala ya OSCE, mpe ba-obligation ya Russie na yina me tadila yina ba ke bokila lois internationales.”

M^me Murray sukisá déclaration britannique na kulombá na Russie na kubika kukwamisa Batemwe ya Yehova.

M^me Bahl lombá na bwala ya Russie: 1) na kubika nyonso yina ba ke na salá samu na kunata Batemwe ya Yehova na tribunale, 2) na kuvutula na Batemwe ya Yehova siege ya bawu ya Russie yina ba baká, mpe 3) na kubasisa na mbala mosi Batemwe ya Yehova nyonso yina ke na boloko.

Yayi ke ve mbala ya ntete yina ba-organizasion ya yinza nyonso me basisa pwelele mambu ya yimbi yina Russie ke na salá na bampangi ya beto ya nketo na ya bakala. Ba kebisá Russie. Yinza nyonso zaba ti Russie ke na talisá bampangi ya beto mpasi mingi. Kasi ya kulutila nyonso, beto zaba na ntima nyonso ti, Yehova zaba mbote bamambu ya mpasi yina bampangi ya beto ya nketo na ya bakala ya bwala ya Russie ke na kutaná na yawu. (Nkunga 37:18) Ntembe ve, Tata ya beto ya mazulu ke sakumuna kiminu ya bawu, kuraje ya bawu, mpe faso ya bawu ya kukanga ntima na bamambu ya mpasi yayi.—Nkunga 37:5, 28, 34.