BYUVU YINA BANTWENYA KE YUFULAKA
Kuzabana samu na makwela—Kitini 3: Beto me bonga kwandi kubika?
Ya me sala mwa ntangu yina beno ke na zabanaka samu na makwela. Kasi nge me kuma na mwa maketi-keti. Nge ke na sosaka kuzaba kana nge me bonga kubika to ve? Disolo yayi ke sadisa nge na kubaka mukanu.
Na disolo yayi
Kana nge ke na maketi-keti
Na manima ya kulutisa mwa ntangu mingi na kuzabana samu na makwela, ntwenya ya bakala mpe ya kento lenda tala ti bawu ke ve ya kubonga ata ti ba vanda kanisa ve mutindu yina na ntangu ba bandaka. Na kifwani:
Mosi ke zolaka kukwenda na la mer, kasi ya nkaka ke zolaka kutambula na bisika yina ke mwa ntama.
Mosi ke ve na mpasi na kusolola na bampangi, kasi ya nkaka ke swi.
Mosi ke na luvunu, kasi ya nkaka ke zolaka kuzonza matsyeleka.
Bamambu tatu yayi beto me tala, ke ve faso mosi. Ya ntete ke na zonzilaka na bansatu yina ke na kwelanaka ve, ya zole na kimuntu yina ke ve faso mosi na ya mpangi, mpe ya tatu na bifu yina ke na kwelanaka ve.
Kanisa na mambu yayi: Na bamambu tatu yayi, wapi yina nge ke na talaka ti ya ke vanda mpasi samu na nge, kana beno kwelana beno zole? Wapi yina nge ke na talaka ti ya lenda luta ya yawu?
Kento na bakala lenda vanda na makwela ya mbote, ata ti ba ke ve na bansatu mpe kimuntu mosi. Kuvanda ya kubonga, me sosa ve kuzonza ti ba ke kuma faso mosi. Bakento mpe babakala ya nkaka ke longokaka kusepela na bansatu mpe kimuntu ya bampangi. a
Kasi, ya ke mfunu ti muntu yina nge ke kwela vanda na bifu mosi na nge, ya zola zonza malongi yina nge ke kwikilaka na yina me tadila Nzambi, mpe faso ya nge ya kutadila mambu ya yimbi na ya mbote. Kana ya ke ve mutindu yina, ya ke lakisa ti beno ke ve ya kubonga.
Na kifwani, na yina me tadila mambu ya dibuundu, buku mosi (Fighting for Your Marriage) ke zonzaka: “Makwela yina kento na bakala ke ve dibuundu mosi lenda kufwa na mbangu.”
Dilongi ya Biblia: “Beno vukana ve na bayina ke kwikilaka Nzambi ve. Ya tsyelika, mambu ya kudedama lenda kuvukana ve na mambu ya yimbi.”—2 Bakorinto 6:14, Ngwisani ya malu-malu.
Baka mukanu
Biblia ke zonzaka ti “ba yina ke kwela ke vwanda na bankwamusu na luzingu ya bawu.” (1 Bakorinto 7:28, Ngwisani ya malu-malu) Na yawu, kupamuka ve kana beno ke na kutanaka na mwa mindondo ntangu beno ke na zabanaka samu na makwela.
Mwa mindondo ya fioti-fioti me sosa ve kuzonza ti makwela ya beno ke simba ve. Kyuvu ni ya kuzaba kana beno ke yidikaka kwandi yawu na kizunu nyonso. Beno ke vanda na nsatu ya kusadila mutindu yina kana beno kwelana.
Dilongi ya Biblia: “Beno lakisa ntima ya mbote beno na beno, beno vanda na mawa samu na bantu ya nkaka, beno lemvokila beno na beno na ntima mosi.”—Baefeze 4:32.
Kasi, kuswana ya mingi-mingi mpe ya ngolo lenda lakisa ti beno ke ve ya kubonga beno zole. Kana ni faso yina, ya ke mbote ti nge zaba yawu na ntangu yayi, kasi na mantwala ve!
Kuswana ya mingi-mingi mpe ya ngolo lenda lakisa ti beno ke ve ya kubonga beno zole
Mambu ya kusimba: Kana nge ke na maketi-keti ya ngolo samu na muntu yina nge ke na zabanaka na yandi samu na makwela, kulutisa ve yawu kaka faso yina!
Dilongi ya Biblia: ‘Muntu ya mayela ke talaka mambu ya yimbi mpe ke bumbanaka, kasi bantu yina me kondwa mayela ke kwendaka kaka na mantwala mpe ba ke kutanaka na bampasi.’—Bingana 22:3.
Kana nge me baka mukanu ya kubika
Kubaka mukanu ya kubika ke salaka ntima mpasi. Kasi, kana mosi na beno, to beno nyonso zole ke na maketi-keti ya ngolo na yina me tadila kuzabana ya beno samu na makwela, ya ke vanda mbote mingi beno bika.
Wapi mutindu nge lenda sala samu na kubika? Kuzonzila ve yandi yawu na message to na email. Sosa ntangu mpe kisika ya mbote samu na kusolola na yawu beno zole.
Dilongi ya Biblia: ‘Konso muntu zonzila mpangi ya yandi mastyeleka.’—Zakari 8:16.
Kana beno me bika, ya me sosa kwandi kuzonza ti nge kele ve ya kulunga samu na makwela? Ya ke ve faso yina. Kuzimbana ve ti, kuzabana samu na makwela ke sadisaka na kuzaba kana nge ke kwelana na muntu yina to ve. Ata ti ya me simba ve, ntangu yina beno me lutisa lenda sadisa nge na kubenda bileso mingi.
Yufula: ‘Yinki mu me longoka na yina me tadila kimuntu ya munu mosi? Ntangu yayi beto me lutisa beto zole me sadisa kwandi munu na kuzaba yinki mu me lunga kubongisa? Kana mu me zola dyaka kuzabana na muntu samu na makwela, yinki mu me lunga kubongisa?’
a Samu na kuzaba faso bamambu yayi lenda kwamisa bakala mpe kento yina ke ya kukwela, tala disolo “De l’aide pour les familles—Surmonter les différences” mpe “De l’aide pour les familles—Quand votre conjoint a des défauts qui vous agacent.”
