Ya vandá na ntangu mosi, Nzambi biká bakala vanda na bakento mingi. (Kubanda 4:19; 16:1-4; 29:18-29) Kasi ya vandá ve musiku ya Nzambi na kukwela bakento mingi. Yandi pesa Adami kaka kento mosi.

 Nzambi biká Yesu kristo na kuvutula dikanisi ya yandi ya ntete, yina ke bakala mosi vanda kaka na kento mosi. (Yoane 8:28) Ntangu ba yufulak’ yandi kyuvu na yina me tadila makwela, Yesu zonzá: “Na mbandukulu, Nzambi yidikaka bantu, bakala na kento. Ni yawu yina, Nzambi tubaka: ‘Bakala ke bika yinzo ya tata mpe mama ya yandi samu na kuzinga kintwadi na kento ya yandi, mpe bawu zole ke kuma kaka muntu mosi.’”—Matayi 19:4, 5.

 Na manima mpeve ya santu twadisá mosi ya bilandi ya Yesu na kusonika: “konso bakala fwana kuvwanda na kento ya yandi, mpe konso kento fwana kuvwanda na bakala ya yandi.” (1 Bakorinto 7:2) Biblia ke zonzá mpe ti na kati ya kimvuka, bakristo nyonso ya bakala yina ke ya kukwela mpe yina ke twadisá kimvuka me mbonga kuvanda “muntu yina ke ya kukwela kaka kento mosi.”—1 Timote 3:2, 12.