Biblia yawu mosi ke zonzá yinki nge me bonga kusala samu na kubakula yawu. Kisika ni kisika nge me katuka, mambu ya Nzambi yina ke na Biblia ‘kele ve mpasi mingi samu na nge, ya kele mpe ve ntama.’—Kulonga Misiku 30:11.

Bamambu yina lenda sadisa nge na kubakula Biblia

1.   Vanda na makanisi ya mbote. Ndima ti Biblia ke mambu ya Nzambi. Vanda ya kukuluka, samu Nzambi ke mangá bantu ya lulendo. (1 Batesalonika 2:13; Zaki 4:6) Kasi kundima ve bamambu meso ya kukangama. Nzambi zola nge sadila ‘mayela ya nge ya kuyindula.’—Baroma 12:1, 2.

2.   Sambila samu na kuzwa mayela. Na Bingana 3:5, Biblia ke zonzaka: ‘Kutula ve ntima na mayela ya nge mosi ya kubakula mambu.’ Kasi, ‘lomba na Nzambi’ mayela samu na kubakula Biblia.—Zaki 1:5.

3.   Longoka balumingu nyonso. Nge ke kuzwa bambote ya kulutila kana nge longoka Biblia balumingu nyonso, kasi ve mbala mosi to bambala zole na ngonda.—Yosua 1:8.

4.   Longoka mosi na mosi ya bamambu yina Biblia ke zonzaka. Kulongoka yinki Biblia ke zonzá samu na mosi na mosi ya bamambu yina ke na kati, ke sadisa nge na kuzaba mbote-mbote yinki Biblia ke longaka. Banda na bamambu yina beto lenda bokila “malongi ya ntete-ntete,” mpe na manima longoka malongi ya “bantu ya kuyela.” (Baebre 6:1, 2, nwt-MK) Nge ke tala ti nge lenda fwanisa dikanisi yina ke na verse mosi na dikanisi ya baverse ya nkaka. Mpe nge ke longoka ti bitini ya Biblia ke sadisá na kuzaba bitini ya nkaka, ata bitini yina ke ‘mpasi na kubakula.’—2 Piere 3:16.

5.   Ndima bantu ya nkaka sadisa nge. Biblia ke zonzá na beto na kundima lubakusu ya bantu ya nkaka samu na kuzaba Biblia. (Bisalu 8:30, 31) Bambangi ya Yehova ke longoká Biblia na bantu. Ba ke lombá ve mbongo samu na kusala yawu. Mutindu bakristo ya ntete, ba ke sadilá Biblia samu na kusadisa bantu ya nkaka na kuzaba mbote-mbote yinki Biblia ke longaka.—Bisalu 17:2, 3.

Bamambu yina nge ke ve na yawu nsatu

1.   Mayela ya mingi to lukolo ya yinda. Bantumwa 12 ya Yesu zabá mbote-mbote Biblia mpe ba vandá longá yawu, ata ti bantu ya nkaka vandá tala ti bantumwa vandá bantu “ya mpamba yina [vandaka] me longoka ve.”—Bisalu 4:13.

2.   Mbongo. Nge ke ve na nsatu ya kufuta mbongo samu na kuzaba yinki Biblia ke longaka. Yesu zonzá na bilandi ya yandi: “Ata kupesa mbongo, beno me kuzwa [. . .], beno pesa ata kulomba mbongo.”—Matayi 10:8.