Bakristo ke ndimá ti Yesu kufwá samu na masumu ya bantu nyonso. (1 Piere 3:18) Na yawu, samu na kuvuuka beto me lunga ve kundima kaka ti Yesu ke kivuukisi ya beto. Ata bambanzi ya yimbi zaba ti Yesu ke “Mwana ya Nzambi,” kasi ba ke vuuka ve, ba ke kufwa.—Luke 4:41; Yude 6.

•  Yinki mu lenda sala samu na kuvuuka?

•  Yinki beto lenda zonza na yina me tadila “lusambu ya muntu ya masumu”?

•  Wapi kisika “lusambu ya muntu ya masumu” katukaka?

•   Nge me lunga kukwikila ti Yesu pesá luzingu ya yandi mutindu munkayalu samu na masumu ya beto nyonso. (Bisalu 16:30, 31; 1 Yoane 2:2) Nge zolá ndima mpe ti Yesu vandá muntu mutindu beto mpe bamambu nyonso yina Biblia ke zonzá na nkumbu ya yandi ke ya tsyeleka.

•   Sosa kuzaba mbote mbote yina Biblia ke longaka. (2 Timote 3:15) Biblia ke zonzá ti ntumwa Polo na Silase zonzá na mukengi mosi ya boloko: “kwikila na mfumu Yesu, mpe nge ke kuzwa mpulusu.” Na manima, ba bandá kulonga “nsangu ya Mfumu” a na mukengi yango. (Bisalu 16:31, 32) Ya ke na lakisá ti samu mukengi kwikila na Yesu, yandi zolá zaba ntete mambu ya Nzambi. Yandi vandá na nsatu ya kubakula butsyeleka yina ke na kati ya Biblia.—1 Timote 2:3, 4.

•   Kubalula ntima. (Bisalu 3:19) Nge me lunga kubalula ntima, ya zola zonza kunyonga bamambu ya yimbi yina nge salá na ntama. Bantu ya nkaka ke zaba ti nge me balula ntima ntangu ba ke tala ti nge ke na salá dyaka ve bamambu yina Nzambi ke yiná mpe nge ke na salá ‘bisalu yina ke lakisa ti nge me balula ntima.’—Bisalu 26:20.

•   kuzwa mbotokolo. (Matayi 28:19) Yesu zonzá ti samu na kuvanda kilandi ya yandi beto me lunga kuzwa mbotokolo. Mukengi yina beto me zonzila kuzwá mbotokolo. (Bisalu 16:33) Mutindu mosi mpe, ntangu ntumwa Piere longá matsyeleka na bantu mingi na yina me tadila Yesu, ‘bantu yina ndimaka ndinga ya yandi na kiese nyonso bakaka mbotokolo.’—Bisalu 2:40, 41.

•   Tumama na misiku ya Yesu. (Baebre 5:9) Ba yina ke “tumamá na mambu nyonso” yina Yesu zonzá ke lakisá na luzingu ya bawu ti ba ke bilandi ya yandi. (Matayi 28:20) Ba ke ve ‘bantu yina ke kuwá kaka mambu ya Nzambi, kasi ba ke sadilá mpe yawu.’—Zaki 1:22.

•   Tatamana tii na nsuka. (Marke 13:13) Bilandi ya Yesu me lunga “kutatamana tii na nsuka” samu na kuvuuka. (Baebre 10:36) Na kifwani, ntangu ntumwa Polo kumá mukristo, yandi tatamaná na kuwa malongi ya Yesu mpe yandi vandá kaka ya kukangama na Nzambi. Ata ti yandi kutaná na bamambu ya mpasi, yandi tatamaná banda kilumbu yina yandi kumá mukristo tii na kilumbu ya lufwa ya yandi.—1 Bakorinto 9:27.

 Na mabuundu ya nkaka bantu ke salá balusambu yina ba ke bokilá “lusambu ya muntu ya masumu” mpe “lusambu samu na kuvuuka.” Na balusambu yango, ba ke ndimá ti ba ke bantu ya masumu mpe ba ke vutulá Yesu matondo na yina yandi kufwá samu na masumu ya bawu. Ba ke lombá mpe na Yesu na kukota na ba ntima ya bawu mpe na kusadisa bawu na luzingu. Kasi Biblia ke lombá ve na beto na kusala “lusambu ya muntu ya masumu.”

 Bantu ya nkaka ke kanisá ti na manima ya kusala “lusambu ya muntu ya masumu,” ba ke kuzwa luzingu ya ntangu nyonso. Kasi kusala kaka lusambu ke lungá ve samu na kuzwa luzingu ya ntangu nyonso. Samu ti beto ke bantu ya masumu, ntangu nyonso beto ke salá masumu. (1 Yoane 1:8) Ni na yawu Yesu lombá na beto na kusambila ntangu nyonso samu na kulomba mulemvo ya masumu ya beto. (Luke 11:2, 4) Dyaka bakristo ya nkaka yina zolá zinga ntangu nyonso ke zinga dyaka ve samu ba biká kusadila Nzambi.—Baebre 6:4-6; 2 Piere 2:20, 21.

Bantu ya mayela (historiens) ke pesá ve mvutu mosi na kyuvu yayi. Bantu ya nkaka ke zonzá ti “lusambu ya muntu ya masumu” bandá ntangu dibuundu ya protestant basikaka. Ba ya nkaka ke ndima ti ni bantu ya mabuundu yina zingá na bamvula 1700 na 1800 bandá kusala “lusambu ya muntu ya masumu.” Ata mutindu yina, Biblia ke lombá ve na beto na kusala lusambu yango, ya ke zonzá mpe ti ya ke ve mbote na kuvutukila mambu mosi bambala mingi.