Ve. Biblia ke zonzá pwelele ti beto me fwana kusambila kaka Nzambi, na nkumbu ya Yesu. Yesu zonzá na bilandi ya yandi: “Na yina, beno fwana kusambila mutindu yayi: Tata ya beto yina ke na mazulu! Bika nkumbu ya nge kuvanda ya [santu].” (Matayi 6:9) Yandi zonzá ata fioti ve na bilandi ya yandi na kusambila basantu, bambazi, kima to muntu ya nkaka yina ke ve Nzambi ya tsyeleka.

 Yesu zonzilá dyaka bawu: “Mu kele nzila, butsyelika, mpe luzingu. Muntu ve lenda kukuma na sika ya Tata, kana yandi lutila ve na munu.” (Yoane 14:6) Kaka ni na Yesu Nzambi pesá nzila ya kubondila samu na beto.—Baebre 7:25.

Yinki ya ke sala kana mu sambila Nzambi mpe basantu?

 Na kati ya Misiku Kumi yina Nzambi pesá, yandi zonzá: “Samu munu Yehova Nzambi ya nge, munu kele Nzambi yina ke lombaka ti ba kangama kaka na yandi.” (Kubasika 20:5) Nzambi me lomba ti nyonso yina beto ke salá samu na kusambila yandi, ya vanda balusambu ya beto, beto fwana zonzila yawu kaka na yandi mosi.—Izaya 48:11.

 Kana beto sambila kima to muntu ya nkaka kasi Nzambi ve, beto ke sala yandi mpasi mingi na ntima, ata ya vanda basantu to bambazi. Na ntangu ya ntama, ntumwa Yoane sosá kusambila mbazi mosi, mbazi yango zonzá na yandi: “Kusala mutindu yina ve! Mu kele kisadi mutindu nge mpe mutindu bampangi ya nge yina kele ya kukwikama na kimbangi ya Yesu. Ni Nzambi nge fwana kusambila.”—Luzabusu 19:10.