Biblia ke lakisá ti Nzambi yidikaka ve Dyabulu. Yandi yidikaka mbazi mosi yina kumaka Dyabulu. Na yina me tadila Nzambi, Biblia ke zonzaka: ‘Kisalu ya yandi kele ya kulunga, samu banzila ya yandi nyonso kele lunungu. Nzambi ya kukwikama yina ke kondwaka ve lunungu ata fioti; yandi kele muntu ya lunungu mpe ya mbote.’ (Kulonga Misiku 32:3-5) Na yawu, Satana Dyabulu vandaka ntete mbazi ya kulunga mpe ya lunungu. Yandi vandá na kati ya bana ya Nzambi.

 Na Yoane 8:44, Yesu zonzá ti Dyabulu ‘kangamaka ve ngolo na butsyeleka.’ Ya ke na lakisá pwelele ti ya ke na ntangu yina Satana vandá muntu ya butsyeleka mpe ya lunungu.

 Kasi, mutindu bambazi mpe bantu nyonso, Nzambi pesaka mpe na mbazi yina kumaka Satana makoki ya kusoola kusala mambu ya mbote to ya yimbi. Yandi soolá kubalula Nzambi mapapa mpe natá kento na bakala ya ntete na kusala mutindu yandi. Ni na yawu, yandi mosi salá ti yandi kuma Satana, yina zola zonza “Mbeni.”—Kubanda 3:1-5; Luzabusu 12:9.