Hein, yandi ke waka. Biblia mpe masolo ya bantu yina kuzwá mvutu na balusambu ya bawu ke lakisá ti Nzambi ke kuwá balusambu. Biblia ke zonzá: ‘[Nzambi] ke lungisaka bansatu ya bantu yina ke waka yandi boma; Yandi ke waka kudila ya bawu samu na kulomba lusalusu, mpe yandi ke vuukisaka bawu.’ (Nkunga 145:19) Kasi samu Nzambi kuwa lusambu ya nge, nge me bonga kusambila na faso ya mbote.

Bima yina ke mfunu na Nzambi

•   Sambila kaka Nzambi yandi mosi, kusambila ve Yesu, Maria, basantu, bambanzi, to biteki. Kaka ni Yehova Nzambi ke ‘Muntu yina ke waka lusambu.’—Nkunga 65:2.

•   Lusambu ya nge zolá kwelana na luzolo ya Nzambi, to misiku ya yandi, yina ke na kati ya Biblia.—1 Yoane 5:14.

•   Kusambila na nkumbu ya Yesu ke lakisa ti nge na ndimá lutumu ya yandi. Yesu zonzá “Muntu ve lenda kukuma na sika ya Tata, kana yandi lutila ve na munu”.—Yoane 14:6.

•   Sambila na kiminu, lomba na Nzambi yandi pesa nge kiminu ya nene kana nge ke ve na yawu.—Matayi 21:22; Luke 17:5.

•   Vanda ya kukuluka mpe sambila na ntima mosi. Biblia ke zonzá: ‘Ata Yehova kele na zulu, yandi ke talaka muntu ya kukuluka.’—Nkunga 138:6.

•   Tatamana na lusambu. Yesu zonzá: “Beno lomba, mpe ba ke pesa beno.”—Luke 11:9.

Bima yina ke ve mfunu na Nzambi

•   Mpusu to bwala ya nge. “Nzambi ke talaka bantu nyonso mutindu mosi, Ni yawu yina, na konso yinsi, muntu yina ke zitisaka Nzambi mpe ke salaka mambu ya kudedama ke yangidikaka Nzambi.”—Bisalu 10:34, 35.

•   Faso ya kuvandila to faso nge lenda vanda. Nge lenda sambila Nzambi ya kuvanda, ya kuyekama, ya kufukama, to ya kutelama.—1 Bansangu 17:16; Nehemi 8:6; Danyele 6:10; Marke 11:25.

•   Sambila na yinsi ya ntima to basisa ndinga. Nzambi ke kuwá mpe ke pesá mvutu ata ti nge na sambilá na yinsi ya ntima mpe bantu ke na zabá ve.—Nehemi 2:1-6.

•   Zonzila bamambu yina ke na kwamisá nge to yina ke kaka na ntima ya nge. Nzambi me lomba na nge na ‘kupesa manyongo nyonso ya nge na sika ya Yandi, samu ti yandi ke sadisaka nge.’—1 Piere 5:7.