Yesu vuukisaka bantu ya kukwikama ntangu yandi pesaka luzingu ya yandi samu na beto. (Matayi 20:28) Ni na yawu Biblia ke bokilaka Yesu ‘Muvuukisi ya yinza.’ (1 Yoane 4:14) Biblia ke zonzaka dyaka: “Kaka ni yandi mosi lenda kuvuukisa beto, samu ti na yinza ya muvimba, Nzambi pesaka ve muntu ya nkaka na bantu samu na kuvuukisa beto.”—Bisalu 4:12.

 Yesu ‘mekaka lufwa samu na bantu nyonso’ yina ke kwikilaka na yandi. (Baebre 2:9; Yoane 3:16) Na manima, “Nzambi vumbulaka yandi na lufwa,” mpe Yesu vutukaka na mazulu na nzutu ya kimpeve. (Bisalu 3:15) Na zulu, Yesu lenda “vuukisa ya tsyeleka bantu yina ke pusanaka pene-pene na Nzambi na nzila ya yandi, samu yandi ke ntangu nyonso na luzingu samu na kubondila samu na bawu.”—Baebre 7:25.

Samu na yinki beto ke na nsatu Yesu bondila samu na beto?

 Beto nyonso ke bantu ya masumu. (Baroma 3:23) Disumu ke kangaka beto nzila ya kuwisana na Nzambi, mpe ya ke nataka na lufwa. (Baroma 6:23) Kasi Yesu kele “nzonzi” samu na ba yina ke kwikilaka na munkayulu yina yandi pesaka. (1 Yoane 2:1) Yandi ke bondilaka samu na bawu, samu Nzambi kuwa balusambu ya bawu mpe lemvokila masumu ya bawu na nzila ya munkayulu ya lufwa ya Yesu. (Matayi 1:21; Baroma 8:34) Nzambi ke ndimaka mambu yina Yesu ke lombak’ yandi samu ya ke wisanaka na luzolo ya yandi. Nzambi filisaka Yesu samu na ‘kuvuukisa bantu.’​—Yoane 3:17.

Kukwikila kaka na Yesu me lunga kwandi samu na kuvuuka?

 Ve. Beto me fwana kukwikila na Yesu samu na kuvuuka, kasi ya kele na mambu ya nkaka yina beto me fwana kusala. (Bisalu 16:30, 31) Biblia ke zonzaka: “Mutindu nzutu kele ya kufwa kana mwela kele ve, mutindu mosi mpe, kiminu kele ya kufwa kana bisalu kele ve.” (Zaki 2:26) Samu ne kuvuuka beto me fwana:

•   Kulongoka mambu yina me tadila Yesu, mpe Yehova Tata ya yandi.—Yoane 17:3.

•   Kukwikila na bawu.—Yoane 12:44; 14:1.

•   Kulakisa kiminu ya beto na kuzitisaka misiku ya bawu. (Luke 6:46; 1 Yoane 2:14) Yesu longaka ti ya ke ve ni bantu nyonso yina ke bokilak’ yandi “Mfumu” ke vuuka, kasi kaka ba yina ke “salaka  mambu yina ke zolaka Tata ya [yandi] yina ke na mazulu.”—Matayi 7:21.

•   Kubika ve kulakisa kiminu ya beto ata ntangu beto ke kutanaka na bampasi. Yesu lakisak’ yawu pwelele ntangu yandi zonzaka: “Muntu yina ke kanga ntima tii na nsuka ke vuuka.”​—Matayi 24:13, nwt.