Kimfumu ya Nzambi ke katula baluyalu nyonso ya bantu mpe ke yala ntoto nyonso. (Danyele 2:44; Luzabusu 16:14) Tala mwa bamambu yina kimfumu ya Nzambi ke sala:

•   Kukatula bantu yina ke salá bamambu ya yimbi, ba yina ke kanisá kaka na bawu mosi mpe ke talisá bampangi mpasi. ‘Kasi bantu ya yimbi, ba ke katula bawu na ntoto.’—Bingana 2:22.

•   Kumanisa ya bamvita nyonso. ‘[Nzambi] ke sukisa bamvita na ntoto ya muvimba.’—Nkunga 46:9.

•   Kunata kilengi, kizunu mpe lukengolo na ntoto nyonso. ‘Ba ke vanda, konso muntu na yisi ya yinti ya yandi ya vinu mpe na yisi ya yinti ya yandi ya bafige, ata muntu mosi ve ke pesa bawu boma .’—Mika 4:4, Mbalula ya Nsi-Ntoto ya Mpa.

•   Kukumisa ntoto paradiso. ‘Ntoto ya kuyuma mpe bwala ya kuyuma ke vanda na kiese; mpe ntoto ya zelo na zelo ke yangalala mpe ke basisa bafololo mutindu safrani.’—Izaya 35:1, Mbalula ya Nsi-Ntoto ya Mpa.

•   Kupesa na muntu nyonso kisalu yina yandi ke sepela na yawu. ‘Bantu yina munu me soola ke wa kiese ya tsieleka samu na kisalu ya maboko ya bawu, ba ke sala ve kisalu ya ngolo ya mpamba.’—Izaya 65:21-23.

•   Kukatula bimbevo. ‘Ata muntu mosi ve yina ke zingaka na yinsi ke tuba ti: “Mu ke na belaka.”’—Izaya 33:24.

•   Bantu ke nuna dyaka ve. ‘Bika ti musuni ya yandi kuma ya malu-malu kuluta na buntwenya ya yandi; Bika ti yandi vutuka na bilumbu ya ngolo ya butwenya ya yandi.’—Yobi 33:25.

•   Kuvutula na luzingu bantu ya kufwa. ‘Bantu nyonso na bandyamu ke kuwa ndinga ya [Yesu] mpe ke vumbuka na lufwa.’—Yoane 5:28, 29.