Sa Adam ma i Eve kera’a to’o ṉela, ma ka kwatea ṉwae ki ka oro saena fanoa nini i ano. Leleka go’o ti angel ne’e aburoṉo ana sa God ka ado fani sa Saetan.

Angel ne’eri ki kira rokis ania noni’iru di’ia ṉwae ki, kira ka kosomai ma kira ka kore kini saena faonoa nini i ano. ‘Afe kira ki alua ṉela ṉasiṉasia liu ki.

Ṉwae ne’e sasia ru ta’a liu ki oro liu na’a saena fanoa nini i ano. Baebol fata uri: “Falafala kira ki, manatada, ru kira sasi’i ki ta’a liu na’a. Manatada leka go’o sulia ta’aṉa’a.”

Sa Noah nia’a ṉwae saga. Sa Jehova saea fuana sa Noah nia ba’a fa’afuṉua fanoa i ano ania tai kafo doe fuana ka fa’asuia ṉwae ta’a ki.

Sa God saea fuana sa Noah ka sauṉani ta’i faka ne’e kira saea ania ark, go’o ka ṉalia tua’a nia, fainia animal oro matamata ki loṉo.

Sa Noah fa’abasua ṉwae ki ania kafo doe ne’eri ka ba’a dao, bore’ana noa’a ta ṉwae kasi roṉoa go’o. Ti ai oinoṉa ania, ti ai ka aila’a ania nia’a.

Kaisai sa Noah sauṉani faka ne’eri ka sui, nia ṉalia animal ki saena.