A B D E F G H I J K L M N O P R S T U V Y Z

A

• Akaya.

  MoMatjangwa goRugereka goSikriste, kwa tamba komukunda ogu gwa kere mepangero lyoVaroma koMbindakano zaGereka. Kolinte kwa kere sitata sosinene somoAkaya.​—Yir 18:12.

• Alpha ntani Omega.

  Alpha kuna kara ndanda zokuhova ano Omega kuna kara ndanda zokuhulilira monoalfabeti doRugereka. Ado kwa di ruganesa kumwe yikando yitatu mEhororo ngositumbwisiso saKarunga. Momatjangwa ogo, nonkango odo kutanta asi “gokuhova ntani gokuhulilira” ntani “etameko nouhura.”​—Eho 1:8; 21:6; 22:13.

• Amen.

  Kutanta asi “yimo” ndi “yi kare ngorooro.” Nkango ozo kwa tunda konkango zoRuhebeli ʼa·manʹ ezi azi tanta asi “kukara mulimburukwi ndi gokuhuguvara.” “Amen” ngava zi uyunga mokukwatesa ko mugano, ekanderero ndi nonkango. Azo kwa zi ruganesa mEhororo mokutamba kwaJesus.​—De 27:26; 1Hs 16:36; Rom 1:25; Eho 3:14.

• Areyopagi.

  Ndundu zonde ezi za kara moAtena koUtokero waAcropolis. Alyo hena kwa kere edina lyosigongi somasimbi esi ngasi ruganene yigongi kondundu ozo. Paurusa kwa mu twere Vaepikuliya noVasitoya koAreyopagi yipo a ka faturure eyi ga pura.​—Yir 17:19.

• Aselgeia.​—

  Tara NKARESO ZOKUNYATA.

• Asiya.

  MoMatjangwa goRugereka goSikriste kwa tamba kedina lyomukunda ogu gwa kere mepangero lyaRoma, omu mwa hamenene Utokero wosirongo esi vana kutumbura naina asi Turkey ntani noyirudi yimwe ngwendi Samosi naPatimosa. Efeso kwa kere nkurusitata zaAsiya.​—Yir 20:16; Eho 1:4.

• Ava ava kwatesa ko Herodesa.​—

  Tara HERODESA, AVA AVA KWATESA KO.

B

• Bara.

  Kuna kara karunga goVakanani ogu va pulire asi yige ga sita eguru ntani yige a rokesa mvhura nokugava ruvharo. Yikarunga yapeke nayo ngava yi tumbura asi “Bara.” MoRuhebeli Bara kutanta asi “muhona ndi hekuru.”​—1Vh 18:21; Rom 11:4.

• Belisebubu.

  Edina limwe lyaSatana, mupangeli gonompepo donondona. Ayo kumoneka asi alyo kwa ligusa kedina Bara-Sebubu, sikarunga Bara esi ngava karere Vafilisiti koEkironi.​—2Vh 1:3; Mat 12:24.

• Bukegango.

  Kuna kara magango gomare goyipapa ndi papyrus, (goyipepa yonombu) aga va tjenge koruha rumwe. Yikando yoyinzi, ago ngava ga dingire koyitji. Matjangwa ngava ga tjanga ntani ngava ga tjangwilire ponobukegango. Nobuke odo, yido ngava ruganesa vantu posiruwo apa va tjenge Bibeli.​—Ruk 4:17-20; 2Ti 4:13.

D

• Dekapolisi.

  Kuna kara edina eli va rukire mbunga zoyitata murongo yomoGereka (alyo kwa tunda konkango zoRugereka deʹka, ezi azi tanta asi “murongo” ntani poʹlis, ezi azi tanta asi “sitata”). Alyo kuna kara hena edina lyomukunda ogu gwa kere koUpumezuva wEfuta lyaGalireya nomukuro gwaJorodana, omu ya kere sinzi soyitata oyo. Moyitata oyo yimo ngava ruganene unene nongesefa ntani kwa zulire mo nompo doSigereka. Jesus ga pitire momukunda ogo, nye kwato umbangi ou wa likida asi Jesus kwa zire moyitata oyo.​—Mat 4:25; Maru 5:20.

• Drachma.

  MoMatjangwa goRugereka goSikriste kwa tamba kosimaliwa sosisiliveli soVagereka, esi sa hulire po 3,4 g.​—Mat 17:24.

E

• Edenali.

  Aso kuna kara simaliwa sosisiliveli soVaroma esi sa hulire po 3,85 g ntani apo kwa fanekere po efano lyahompa gwaRoma koruha rumwe. Aso simaliwa esi ngava futu murugani mezuva ntani yiso ngava futu Vajuda ‘ngomutero’ koVaroma.​—Mat 22:17; Ruk 20:24.

• Ediva lyomundiro.

  Alyo kuna kara evango lyopasifanekeso omu mwa kara “mundiro ogu agu rokota unene.” Alyo kwa li fanekesa hena ‘konomfa dauvali.’ Vantu ava ava dili kulitezurura, Muzonaguli, nomfa ntani noMayendo (ndi Hadesi) ngava yi zugumina mediva olyo. Mokumona asi yininke ngwendi sisitwa sopampepo, nomfa ntani  Hadesi, eyi ayi dili kuzonauka po komundiro ngava yi zugumina mo, eyi kulikida asi ediva eli kuna kara lyopasifanekeso. Evango eli kapi ava hepekere mo vantu narunye, nye kwa tamba kezonauko lyanarunye.​—Eho 19:20; 20:14, 15; 21:8.

• Egwanekero.

  Alyo kuna kara etumbwidiro ndi elizuvhasano lyopokatji kaKarunga novantu ndi pokatji kovantu vavali ava vana tokora kurugana yuma ndi va nyokere po kurugana yuma yongandi. Poyiruwo yimwe, muntu gumwe tupu yige ga hepere kusikisa mo etumbwidiro olyo, nye poyiruwo yimwe, vantu navenye vavali va hepere kusikisa mo etumbwidiro olyo. Kugusa ko magwanekero aga ga tulisire po Karunga kumwe novantu, Bibeli kwa tumbura hena magwanekero aga va tulisire po vantu, marudi nonomuhoko ndi nombunga dovantu. Magwanekero aga ga tulire po Karunga kumwe naAbirahamu naNdafita nomuhoko goVaisraeli (egwanekero lyoVeta) ntani noVaisraeli vaKarunga (egwanekero lyepe) kuna kara gamwe gomagwanekero aga ga kundama vantu wovanzi.​—Gen 9:11; 15:18; 21:27; Ex 24:7; 2Hs 21:7; Ruk 22:29; Yir 3:25; 2Ko 3:6; Heb 8:6.

• Ehamba lyomukagu.

  Kuna kara uvera womukagu ou au lihana usimbu kovantu wovanzi nokudipaga vantu.​—Ruk 21:11.

• Eharango.

  Kuna kara evango eli lya kundurukidire nkongoronzugo ntani nevango eli lya kere ponze zontembeli eli va kundurukidire nekuma. Nzambo zeswakerero ngava zi zambere posizambero esi sa kere meharango lyonkongoronzugo ntani nemeharango lyontembeli. Bibeli kwa tumbura hena maharango gomomambo ntani gonombara dovahompa.​—Ex 8:13; 27:9; 1Vh 7:12; Mat 26:3; Maru 15:16; Eho 11:2.

• Ekaropo.

  MoMatjangwa gamwe goRugereka goSikriste, nkango ozo kwa tamba kosiruwo esi nga moneka Jesus Kristusa, kutunda apa va mu tura a kare Hompa, dogoro pomazuva gouhura wouzuni. Kristusa kapi nga wiza tupu nokutengura usimbu, nye age nga kara siruwo sosire.​—Mat 24:3.

• Ekehe.

  Kuna kara ekehe lyewa eli lya kere monkongoronzugo nomontembeli. Alyo kwa li tetere pokatji konzugo zokupongoka nezi zokupongokerera ntani apo kwa honzerere po mafano govakerubi.​—Ex 26:31; 2Hs 3:14; Mat 27:51; Heb 9:3.

• Ekero lyere.

  Kwa tunda konkango zoRugereka aʹbys·sos ezi azi tanta asi “konhi-nhi” ndi “kwato uhura.” Azo kwa zi ruganesa moMatjangwa goRugereka goSikriste mokutamba kevango ndi koukaro wokufana ngwendi dorongo. Azo kuvhura kutamba keyendo ntani kwayimwe hena.​—Ruk 8:31; Rom 10:7; Eho 20:3.

• Ekuho; Kukuhwa.

  Nkangorugano ezi kutanta asi “kudivida” konhi zomema. Jesus kwa tente asi varongwa vendi navenye va hepa kuvakuhwa. Matjangwa kwa uyunga hena kuhamena ekuho eli nga rugana Johanesa, ekuho lyompepo zokupongoka, kukuhwa nomundiro ntani nagamwe hena.​—Mat 3:11, 16; 28:19; Joh 3:23; 1Pe 3:21.

• Emanya lyemekovhu.

  Kuna kara emanya eli ava tura mohuke zetungo, apa lya ligwanekera ekuma. Alyo kuna kara emanya lyomulyo eli ali vatere ekuma li likwate kumwe. Emanya lyemekovhu lyetateko, kwa kere emanya lyononkondo eli ngava dikisa matungo gomanene nekuma eli ngali kundurukida sitata. Nkango ozo kwa zi ruganesa mokufanekesa omu va sitire uzuni ntani Bibeli kwa tumbura Jesus asi yige “emanya lyemekovhu lyetateko” lyombungakriste ezi va fanekesa konzugo zopampepo.​—Efe 2:20; Job 38:6.

• Emumanya.

  Kuna kara emanya lyokuliudinga eli ngava tura peguru lyekwawo, yipo va kweye mbuto zi kare usura. Emanya eli ngava tura konhi kwa kere nosininke pokatji oku ngali lidingi emanya eli ngava tura keguru. Posiruwo esi va tjenge Bibeli, momambo gomanzi kwa kere mo mamanya gokukweyesa aga ngava ruganesa vakadi. Mokumona asi nkenye ezuva vantu ngava ruganesa mamanya ogo yipo va gwane nondya, eyi yiyo Veta zaMosesa za nyokeserere vantu mokugusa mamanya govakwawo nsene vana kara nomakongo. Mamanya gomanene gokulifana, ngaga yi mbirumuna yimuna.​—De 24:6; Maru 9:42.

• Episarome.

  Kuna kara rusumo oru ngava dimbi mokuhamberera Karunga. Vantu ngava dimbi mapisarome mokukarera Karunga, kukwatera mo apa ngava karere Jehova Karunga montembeli koJerusarema.​—Ruk 20:42; Yir 13:33; Jak 5:13.

• Erenga.

  MoRugereka kutanta asi mugara ogu va tuka. Sinzi sovagara owo ngava rugana ngovakareli mombara zahompa ano  vamwe ngava pakere mbili hompakadi noyihora yahompa. Nkango ozo kwa zi ruganesa hena kovagara ava va dilire kutuka, nye ava nawo ngava rugana yirugana yokulisiga-siga mombara zahompa. Azo kwa zi ruganesa hena moBibeli mokutamba kwava va lininka vene va kare marenga morwa Uhompa waKarunga. Awo kulidina vene yipo va liture mo unene mosirugana saKarunga.​—Mat 19:12; Est 2:15; Yir 8:27.

• Esabata.

  Kwa tunda konkango zoRuhebeli ezi azi tanta asi “kupwizumuka ndi kuhageka.” Alyo kuna kara ezuva lyauntambali kuliza nosivike soVajuda (alyo ngali tameke moUtano kongurova nokuhaga moMapeu kongurova). Yipito yimwe eyi ngava dana momvhura, kukwatera mo mvhura zau-7 nezi zau-50, nayo ngava yi tumbura asi masabata. Mezuva lyEsabata, vantu kapi ngava rugana, kugusa ko vapristeli ava ngava rugana monkongoronzugo. Monomvhura dEsabata, vantu kapi ngava limi ntani Vahebeli kapi ngava sininike vakwawo va fute makongo gawo. MoVeta zaMosesa, yininke eyi va silikire mEsabata, kapi ya kere udigu kuyilimburukwa. Nye vampitisili womaukarelikarunga ngava gweda ko noveta, eyi yiyo ya ninkisire vantu womomazuva gaJesus yi va digopere mokulimburukwa noveta dEsabata.​—Ex 20:8; Lev 25:4; Ruk 13:14-16; Kor 2:16.

• Eufurata.

  Kuna kara mukuro gomulyo ntani gomure ogu gwa kara koMbindakano zaAsiya ntani ago kuna kara gumwe gonomukuro mbali dononene moMesopotamiya. Ago kwa gu tumbura sikando sokuhova mwaGenesis 2:14 ngagumwe gonomukuro ne edi da kere moEdeni. Muzogo gosirongo soVaisraeli kwa hagerere pomukuro ogo.​—Gen 15:18; Eho 9:14; 16:12.

• Evhumbuko.

  Kwa tamba kokupindura koufe. Nkango zomoRugereka a·naʹsta·sis ezi va ruganesa, kutanta asi “kuzerura ndi kukatuka.” MoBibeli kwa tumbura mo mavhumbuko ntane, kukwatera mo evhumbuko lyaJesus eli ga rugene Jehova Karunga. Nampili ngomu Eliya naElisa naJesus naPeturusa ntani Paurusa va pindwire vantu koufe, awo kwa rugene yitetu oyo kupitira mononkondo daKarunga. Evhumbuko ‘lyovahungami nava va dira kuhungama’ eli ngali ka horokera pevhu, kwa kara nomulyo kositambo saKarunga. (Yir 24:15) Bibeli kwa tumbura hena kuhamena evhumbuko lyemeguru, eli ava tumbura asi “evhumbuko lyokuhova,” lyovamumbya vaJesus wovagwavekwa.​—Fil 3:11; Eho 20: 5, 6; Joh 5:28, 29; 11:25.

• Ezuva lyEfironkenda.

  Alyo kwa kere ezuva lyomulyo po ntani lyokupongoka koVaisraeli, alyo kulitumbura hena asi Yom Kippur (kwa tunda konkango zoRuhebeli yohm hak·kip·pu·rimʹ, “ezuva lyokukudumika”), eli ngali kara momazuva 10 mokwedi kwaEtanimu. MoMatjangwa goRuhebeli kulitumbura asi Ezuva lyEfironkenda. Mupristeli gomunene nga hwilire rumwe momvhura monzugo zokupongokerera ezi za kere monkongoronzugo mezuva eli, yipo a ka gave honde zonzambo zononzo dendi nedi doVarevhi ntani novantu vapeke. Nonzambo odo kwa fanekesa nzambo zaJesus ezi za ya gusa po nonzo dovantu navenye pwarumwe tupu. Eyi kwa gava mpito kovantu, yipo va kare nelikwatakano naJehova. Mezuva eli vantu ngava pongo nokudilira ntani alyo kwa kere esabata, yipo nye vantu kapi va va pulisilire va rugane.​—Lev 23:27, 28; Yir 27:9; Kor 1:20; Heb 9:12.

• Ezuva lyokuliwapaikira.

  Alyo kwa kere ezuva eli ngava liwapaikire Vajuda Esabata, komeho ezuva lyEsabata li tameke. Ezuva olyo ngali haga moUtano kongurova, ano ezuva lyEsabata ngali tameke ngurova zoozo. Vajuda ngava tameke kuvarura ezuva lyepe kongurova ntani ezuva olyo kwa hege kongurova zezuva lyokukwama ko.​—Maru 15:42; Ruk 23:54.

• Ezuva lyoMpanguro.

  Kuna kara ezuva ndi siruwo apa Karunga nga pangura nombunga ndi nomuhoko ndi vantu. Aso nampo kuna kara siruwo apa ngava zonagura po vantu ava ngava tokwera konomfa, ndi apa vamwe ngava va parura nokuvapa mpito yipo ngava paruke narunye. Jesus Kristusa novapositoli vendi kwa tumbwire kuhamena “Ezuva lyoMpanguro” lyokomeho omu ngamu hamena vantu ava vana kuparuka ntani nava va fa nare.​—Mat 12:36.

F

• Farawo.

  Kuna kara edina eli ngava zigidisa vahompa womoEgipite. MoBibeli kwa tumbura mo tupu Vafarawo vatano komadina (Awo kuna kara Sisaka, So, Tirehaka, Neko ntani Hofura). Vafarawo wokuhupa ko  kapi va va tumbura komadina, kukwatera mo Vafarawo ava ngava ruganene kumwe naAbirahamu, Mosesa ntani naJosefa.​—Ex 15:4; Rom 9:17.

• Fungu-fungu.

  Kuna kara tumanyagona ndi tutji otu ngava ruganesa mokutura po matokoro. Ato ngava tu tura posikehe ndi mosipako nokutukutjunga. Ano emanya eli ngali gu po ndi eli ngava gusa po yilyo ngava horowora. Yikando yoyinzi vantu ngava howo kukanderera ntani vana kuyirugana.​—Mat 27:35; Yir 1:26.

G

• Gehena.

  Kuna kara edina lyomuramba gwaHinomu moRugereka, ogu gwa kere koMbindakano zaJerusarema. (Jer 7:31) Bibeli kwa pumbire asi momuramba ogo yimo ngava zugumina yimpu. (Jer 7:32; 19:6) Kapi pwa kara umbangi ou au likida asi yikorama ndi vantu ngava va zugumine moGehena yipo va va hwike awo simpe vazuni ndi va va hepeke. Yipo nye evega olyo kapi lya fanekesa evega eli ali dili kumoneka omu vantu ava va hepeke narunye momundiro. Nye Jesus novarongwa vendi kwa ruganesere nkango Gehena mokufanekesa etengeko lyanarunye ndi “nomfa dauvali,” edi da tamba kezonauko lyanarunye.​—Eho 20:14; Mat 5:22; 10:28.

H

• Hadesi.

  Kuna kara nkango ezi za lifana nonkango zoRuhebeli “Seyoli.” Azo kwa zi toroka asi “Mayendo” (kwa zi nenepeka), mokutamba koukaro wovafe.​—Tara MAYENDO.

• Harumagedoni.

  Kwa tunda konkango zoRuhebeli Har Meghid·dohnʹ ezi azi tanta asi “Ndundu zaMegido.” Nkango ozo kwa zi ruganesa mokutamba koyita “eyi ngayi horoka mezuva lyenene lyaKarunga Munankondo nadinye” apa “vahompa vepevhu nalinye” ngava lipongaika va rwise Jehova. (Eho 16:14, 16; 19:11-21)​—Tara UDIGU WOUNENE.

• Heremesi.

  Kuna kara karunga ogu ngava karere Vagereka ntani age kwa kere munwaZeusi. Vantu kwa tumbwire Paurusa asi Heremesi apa ga kere moLisitira, morwa awo kwa pulire asi Heremesi nga uyungire po vakarunga wopeke ntani age kwa kere karunga ogu ga divire kuuyunga nawa.​—Yir 14:12.

• Herodesa.

  Kuna kara edina lyepata eli ngali pangere Vajuda. Awo kwa gwene nonkondo dawo kepangero lyoVaroma. Gokuhova kuna kara Herodesa gomunene, age kwa divikwire morwa kwa tungwilire ntembeli moJerusarema ntani yige ga geve mpangera asi vanona va va dipage morwa age kwa here kudipaga Jesus. (Mat 2:16; Ruk 1:5) Vana vaHerodesa gomunene kwa kere Herodesa Arukerausi naHerodesa Antipasi. Awo kwa va tulire va kare vapangeli wonomukunda dimwe edi ngava pangere oguhwe. (Mat 2:22) Antipasi yige mupangeli ogu va tumbura asi “hompa,” posiruwo sonomvhura ntatu noharufa edi ga zuvhisire Jesus dogoro posiruwo esi va tumbura moYirugana egaununo 12. (Maru 6:14-17; Ruk 3:1, 19, 20; 13:31, 32; 23:6-15; Yir 4:27; 13:1) Konyima, mutekurwa Herodesa gomunene gedina Herodesa Agilipa gokuhova, yige ga kweme ko moupangeli ntani age kwa mu dipagere muengeli gwaKarunga konyima zokupangera karuwogona. (Yir 12:1-6, 18-23) MunwaHerodesa Agilipa gokuhova, gedina Herodesa Agilipa gwauvali, yige ga kweme ko moupangeli. Age kwa pangerere dogoro posiruwo apa Vajuda va rwanesere epangero lyoVaroma.​—Yir 23:35; 25:13, 22-27; 26:1, 2, 19-32.

• Herodesa, ava ava kwatesa ko.

  Kuvatumbura hena asi wonkwaHerodesa. Awo kuna kara vantu ava ngava kwatesa ko epata lyaHerodesa eli ngali pangere konhi zepangero lyoVaroma. Vasadukayi vamwe nampo ngava kwatesa ko Herodesa. Vantu ava kwa lipakerere kumwe noVafalisayi yipo va rwanese Jesus.​—Maru 3:6.

• Hisopo.

  Kuna kara simeno esi sa kara nonomutayi ntani nomahako gomawa. Aso ngava si ruganesa yipo va sampese ko honde ndi mema poyilika yekuhuro. Nonkango doRugereka noRuhebeli edi va ruganesa moBibeli kuvhura kutamba koyimeno yokulisiga-siga. Simeno ‘sohisopo’ esi va tumbura mwaJohanesa 19:29 nampo kwa tamba kosimeno sosire unene, esi va zwekere kaninke aka va tulire vhinyu zoururu ezi ga makerere Jesus.​—Ex 12:22; Ps 51:7, NW.

• Hondedi.

  Muntu ogu a ligwanekere panyama nomuntu ga hana asi mulikwali gwendi, unene po yipo va mu fute yimaliwa.  (Nkango zoRugereka porʹne, ezi azi tanta asi “hondedi” kwa tunda konkango ezi azi tanta asi “kurandesa.”) Nkango ozo kuziruganesa unene kovakadi, nampili ngomu moBibeli va tumbura mo vagara ava va kere nohondedi. Veta zaMosesa kwa silikire yirugana yonohondedi ntani yimaliwa eyi ngava futu nohondedi, kapi va yi pulisilire mokuyireta montembeli zaJehova. Nye nomuhoko dapeke kwa kere nonohondedi ponontembeli dawo yipo va gwane ko yimaliwa. (De 23:17, 18; 1Vh 14:24) Bibeli kwa ruganesa hena nkango ozo pasifanekeso, mokutamba kovantu ndi konomuhoko ndi komapangero, aga aga karere yikarunga yoyimpempa nokulininkisa asi awo kuna kukarera Karunga. Pasihonena, ukarelikarunga ou wa divikwa asi “Babironi zonene,” kwa u tumbura mEhororo asi awo hondedi, morwa awo kuruganena kumwe novapangeli womouzuni ou yipo va gwane nonkondo nemona.​—Eho 17:1-5; 18:3; 1Hs 5:25.

I

• Ililikumu.

  Kuna kara mukunda goVaroma ogu gwa kere koMuzogo gwaGereka. Paurusa kwa zuvhisilire dogoro koIlilikumu, nye Bibeli kapi za likida nsene asi Paurusa ga zuvhisilire momukunda ogo ndi kwa ka sikire ko tupu.​—Rom 15:19.

• Israeli.

  Kuna kara edina eli ga rukire Karunga Jakopo. Konyima alyo ngava li zigidisa ruvharo rwendi narunye. Ruvharo rovana vaJakopo 12, ngava ru zigida asi Vaisraeli ndi muhoko gwaIsraeli. Mazimo murongo gomouhompa wokoMuzogo, ou wa ligaunukire nouhompa wokoMbindakano, nago ngava ga tumbura asi Israeli. Konyima, Vakriste wovagwavekwa nawo ngava va tumbura asi “Vaisraeli vaKarunga.”​—Gar 6:16; Gen 32:28; Yir 4:10; Rom 9:6.

J

• Jakopo.

  Kuna kara munwaIsaka naRepeka. Konyima Karunga kwa ya mu rukire asi Israeli ntani age kwa ya kere esimbi lyorudi roVaisraeli (ava ava tumbura hena asi Vajuda). Age kwa kere guhya govana 12, omu ga tundilira marudi 12 gomuhoko goVaisraeli. Edina lyendi kwa twikilire kulizigidisa muhoko goVaisraeli.​—Gen 32:28; Mat 22:32.

• Jehova.

  Bibeli zEtoroko lyouzuni woupe lyoMatjangwa goRugereka goSikriste, kwa ruganesa edina Jehova yikando 241 moMatjangwa goRugereka goSikriste. Etokoro lyokuruganesa edina lyaKarunga moBibeli kwa wiza po morwa maumbangi aga gana kukwama ko:1. MoMatjangwa goRuhebeli aga ngava ruganesa mosiruwo saJesus novapositoli vendi, kwa monekere mo nondanda ne (ado kuna kara nondanda ne doRuhebeli יהוה, edi da karera po edina lyaKarunga) momatjangwa nagenye.2. Momazuva gaJesus novapositoli vendi, nondanda ne odo kwa monekere hena momatoroko goRugereka, aga va torokere koRuhebeli.3. Matjangwa goRugereka goSikriste kutanta asi Jesus nga ruganesa edina lyaKarunga ntani age kwa li divisire kwava wopeke.—Johanesa 17:6, 11, 12, 26.4. Mokumona asi Matjangwa goRugereka goSikriste nago kwa ga retesa po mpepo zokupongoka ngwendi Matjangwa goRuhebeli, nsene edina lyaJehova li dira kumoneka moMatjangwa goRugereka goSikriste, ayo kapi nayi liza.5. Esupipiko lyedina lyaKarunga kwa moneka moMatjangwa goRugereka goSikriste.—Ehororo 19:1, 3, 4, 6.6. Matjango ganare goVajuda kulikida asi Vakriste woVajuda ngava ruganesa edina lyaKarunga apa ngava tjanga.7. Valirongi vamwe woBibeli kwa tanta asi ayo kumoneka asi edina lyaKarunga kwa monekere moMatjangwa goRugereka goSikriste, aga va temwininine koMatjangwa goRuhebeli.8. Matoroko goBibeli gokupitakana pomaraka efere, kwa moneka mo edina lyaKarunga moMatjangwa goRugereka goSikriste.Yipo nye, pwa kara konda zeyi twa hepera kutengwidira edina lyaKarunga, Jehova moMatjangwa goRugereka goSikriste. Eyi yiyo va rugana vatoroki woBibeli zEtoroko lyouzuni woupe. Awo kwa fumadeka unene edina lyaKarunga ntani awo kwa tjira kugusa mo yininke eyi ya monekere moMatjangwa gokuhova.—Ehororo 22:18, 19.

• Juda.

  Kuna kara munwaJakopo gwaune, ogu ga retere Reya. Komeho Jakopo a fe, age kwa pumbire asi hompa gononkondo nga tunda mezimo lyaJuda ntani age nga pangera narunye. Jesus kwa ya mu hampurukilire moruvharo rwaJuda. Edina eli, kwa li  ruganesere hena mokutamba korudi ntani konyima mokutamba kouhompa ou va rukire Juda.​—Gen 29:35; 49:10; Heb 7:14.

K

• Kakunzu.

  Kwa tamba kosininke omu ngava patere vantu yipo va va tengeke. Yininke yimwe oyo, ngava patere mo tupu maguru, ano yimwe ngava patere mo maguru nomawoko nonsingo nokuninkisa rutu ru dire kuligumagura.​—Jer 20:2; Yir 16:24.

• Karukara.

  Kuna kara sininke somakoso gavali esi ngadi koko nonkambe. Aso ngava si ruganesa ngougendero ntani nomoyita.​—Ex 14:23; Vap 4:13; Yir 8:28; Eho 9:9.

• Kayisa.

  Edina lyoSiroma eli ngava ruku vahompa woVaroma. Augusitusi, Tibeliusi naKeraudiusi kwa va tumbura komadina gawo moBibeli. Nampili ngomu va dira kumutumbura Nero, nye nage ngava mu tumbura asi Kayisa. Azo kwa zi ruganesa hena moMatjangwa goRugereka goSikriste mokutamba kepangero lyoVaroma.​—Maru 12:17; Yir 25:12.

• Kristusa.

  Kuna kara situmbwisiso saJesus. Nkango ozo kwa tunda konkango zoRugereka Khri·stosʹ ezi za lifana nonkango zoRuhebeli ezi azi tanta asi “Mesiyasa” ndi “Mugwavekwa.”​—Mat 1:16; Joh 1:41.

• Kudilira.

  Kudira kulya nondya siruwo songandi. Vaisraeli ngava dilire mEzuva lyEfironkenda ndi nsene kuna kuligwanekera nomaudigu ntani apa ngava hepa evatero lyokutunda kwaKarunga. Vajuda kwa tulisire po yikando yine yokudilira momvhura mokudiworoka yininke yoyidona eyi ya va horokerere. Nye Vakriste naina kapi va hepa kudilira.​—Esra 8:21; Jes 58:6; Mat 4:2; 9:14; Ruk 18:12; Yir 13:2, 3; 27:9.

• Kufinga.

  Kuna kara kutantera sininke ndi muntu asi ngayi mu horokera yininke yoyidona komeho. Nye azo kapi azi tanta asi kuhandukira muntu ndi kumuswaura. Muntu ogu ava fingi kumutantera moyitarameho asi komeho ngayi ka mu horokera yininke yoyidona. Ano nsene Karunga ana kuyirugana ndi muntu ogu a tumu Karunga, ayo narunye kusika mo ngwendi moomu vana yi pumbu.​—Gen 12:3; Num 22:12; Maru 11:21; Yir 23:12; Rom 12:14; Gar 3:10.

• Kufumadeka Karunga.

  Kukarera ndi kufumadeka Jehova Karunga nokulimburukwa koupangeli wendi.​—1Ti 4:8; 2Ti 3:12.

• Kugeragura.

  MoMatjangwa goRugereka goSikriste, kwa tamba kokutoona ndi kusopora nongoreka ezi va mangerera yininke youtwe.​—Joh 19:1.

• Kugwaveka.

  Kwa tunda konkango zoRuhebeli ezi azi tanta asi “kukwita yininke yomema.” Vantu ntani yininke ngava yi kwita magadi mokuyipongwera kosirugana sokulikarera. MoMatjangwa goRugereka goSikriste, nkango ozo kwa zi ruganesa hena mokutamba kokupoomwena mpepo zokupongoka vantu ava va kara nehuguvaro lyokukaparukira meguru.​—Ex 28:41; 1Sa 16:13; Ruk 4:18; Yir 10:38; 2Ko 1:21.

• Kuhondera.

  Kuligwanekera panyama nomuntu ga hana asi mulikwali goge.​—Ex 20:14; Mat 5:27; 19:9.

• Kuhondera.​—

  Tara RUHONDA.

• Kuhwaga; Rupare.

  Kuhwaga kuna kara kuhangura mbuto korungu; rupare kuna kara evango eli ngava hwagere. Vantu ngava hwaga mbuto nomawoko pokuruganesa nompumo, ano nsene yinzi vana kuhwaga, awo ngava ruganesa yininke yapeke, ngwendi yireyi yokuhwagesa ndi yapeke, eyi ngayi koko yimuna. Yireyi ngava yi purututa pombuto ezi za kere porupare, oru ngava dikire yikando yoyinzi keguru, oku azi gendere mpepo ntani alyo kwa kere evango lyokuliudinga.​—Lev 26:5; Jes 41:15; Mat 3:12.

• Kukambeka mawoko.

  Muntu ngava mu kambeke mawoko yipo va mu pe situmbukira sokulikarera, va mu tungike, va mu verure ndi va mu pe uhwi wompepo zokupongoka.​—Num 27:18; Yir 19:6; 1Ti 5:22.

• Kukuhura.

  MoBibeli nkango ezi kapi tupu za tamba koyininke eyi yina zere, nye hena kwa tamba komuntu ogu ana kara ga hana sipo ndi kavadi ndi nkenye eyi nayi mu ninkisa a kare nonkareso zokunyata. MoVeta zaMosesa, azo kwa tamba kokulikuhura pampo.​—Lev 10:10; Ps 51:7; Mat 8:2; 1Ko 6:11.

• Kulitezurura.

  MoBibeli azo kwa tamba kokurundurura magazaro nokulivera kuhamena mparukiso zoge zanare, yininke yoyidona eyi wa rugana ndi eyi wa dira kurugana. Muntu ogu a litezurura kutundilira komutjima, kurundurura mparukiso zendi.​—Mat 3:8; Yir 3:19; 2Pe 3:9.

• Kunyata ndi kudira kukuhuka.

  Kuvhura kutamba komuntu ogu ana nyata parutu ndi  ogu ana teza nompango daKarunga. MoBibeli nkango ezi kwa tamba yikando yoyinzi koyininke yoyidona, ndi yokunyata kuliza noveta zaMosesa. (Lev 5:2; 13:45; Mat 10:1; Yir 10:14; Efe 5:5)​—Tara KUKUHURA.

• Kwedi kokupe.

  Alyo kuna kara ezuva lyokuhova lyankenye kwedi kuliza nokalindeli koVajuda. Mezuva olyo vantu ngava pongo kumwe, yipo va dane sipito nokugava nonzambo dokulikarera. Konyima zosiruwo, ezuva olyo kwa ya kere mulyo unene ntani vantu kapi ngava rugana mezuva olyo.​—Num 10:10; 2Hs 8:13; Kor 2:16.

L

• Lepton.

  Kuna kara simaliwa songoporo sosinunu po esi ngava ruganesa Vajuda, posiruwo soMatjangwa goRugereka goSikriste. Lepton, payinzi kuzitumbura asi Lepta.​—Maru 12:42; Ruk 21:2, ftns.

M

• Magango goyipapa.

  Kuna kara sipapa sonzwi, sikombo ndi sitana, eyi ngava ruganesa yipo va tjange po. Yipapa oyo ngayi kara siruwo kupitakana papyrus (yipepa yonombu) ntani ngava yi ruganesa ngonobukegango doBibeli. Magango goyipapa aga Paurusa ga pulire Timoteusa a mu twarere kwa kere mo Matjangwa goRuhebeli gamwe. Nobukegango dimwe edi va gwana mEfuta lyoKufa kwa di tjenge pomagango goyipapa.​—2Ti 4:13.

• Makedoniya.

  Kuna kara mukunda ogu gwa kara komuzogo gwaGereka, ago kwa divikwire apa ga pangerere Arekisandeli goMunene. Nye konyima, Varoma kwa ya fundire mukunda ogo. Apa Paurusa ga zire koEuropa sikando sokuhova, mukunda gwaMakedoniya kwa kere mepangero lyoVaroma. Paurusa kwa zire momukunda ogo yikando yitatu.​—Yir 16:9.

• Malirankali.

  Kwa tamba kokulikida ruguwo morwa nomfa ndi udigu wongandi ou una horoka. Posiruwo apa va tjenge Bibeli, vantu ngava lili siruwo sosire. Kugusa ko kulira, vantu ava va kere mononkali ngava dwara yikoverero yokulikarera, kulitura enoto ponomutwe, kutaura yikoverero yawo ntani nokulitoona pononturo. Vamwe ngava zigida hena vantu ava ngava lili, yipo va ka lire ponomfa.​—Est 4:3; Mat 11:17; Maru 5:38; Joh 11:33; Eho 21:4.

• Mana.

  Kuna kara nondya edi ngava li Vaisraeli apa va kere momburundu nomvhura 40. Azo kwa tundire kwaJehova ntani ngazi moneka pasitetu konhi zeme nkenye ngurangura, kugusa ko mezuva lyEsabata. Apa Vaisraeli va hovere kuzimona, awo kwa lipulire asi: “Yisinke yene eyi no?” MoRuhebeli asi “man huʼ?” (Ex 16:13-15, 35) Jesus nage kwa ruganesere mana pasifanekeso.​—Joh 6:49, 50.

• Manganganga gokututumikidisa.

  Kuna kara manganganga aga aga tundu korudi rositji esi ava tumbura asi Boswellia. Apa ngava ga hwike, ako nga ku tundu edumba lyewa. Ago ngava ga ruganesa ponkongoronzugo ntani nopontembeli. Ago ngava ga gava kumwe nonzambo zonombuto ntani kwa ga tulire mwankenye mukweyo gonomboroto donzambo edi da kere monzungo zokupongoka.​—Ex 30:34-36; Lev 2:1; 24:7; Mat 2:11.

• Matjangwa.

  Kuna kara Nonkango dokutunda kwaKarunga edi va tjanga. Nkango ezi kwa moneka tupu moMatjangwa goRugereka goSikriste.​—Ruk 24:27; 2Ti 3:16.

• Mayendo.

  Nsene kuna zi tjanga zonunu, azo kwa tamba keyendo, nye nsene kuna zi tjanga zonene, azo kwa tamba koukaro wovafe. Azo kwa lifana nonkango zoRuhebeli “Seyoli” ntani nezi zoRugereka “Hadesi.” Bibeli kwa faturura asi azo kwa tamba pasifanekeso koukaro ndi evango omu vantu ava hageke kurugana yininke ndi va dive eyi yina kuhoroka.​—Gen 47:30; Mud 9:10; Mat 27:61; Yir 2:31.

• Mazuva gopouhura.

  Nonkango odo ntani nononkango ngwendi “apa ngasi sika mo siruwo,” kwa di ruganesa momauporofete gomoBibeli mokutamba kosiruwo apa ngayi haga po yininke eyi va pumba. (Hes 38:16; Dan 10:14; Yir 2:17) Siruwo esi kuvhura kugusa nomvhura dononzi ndi dononsesu kuliza nouporofete. Nonkango edi kwa di ruganesa moBibeli mokutamba “mazuva gopouhura” gouzuni ou, goposiruwo sekaropo lyaJesus.​—2Ti 3:1; Jak 5:3; 2Pe 3:3.

• Mbando zosikesa.

  Kuna kara mbando ezi za kere kosikesa segwanekero, apa nga sampere mupristeli gomunene honde zonzambo zononzo mEzuva lyEfironkenda. Nkango ozo kwa tunda konkango zoRuhebeli ezi azi tanta asi “kukudumika (nzo)”  ndi “kugusa po (nzo).” Mbando ozo kwa zi rugene nongorodo zene-zene, ntani kononkenkera dazo kwa rotererere ko vakerubi vavali. Poyiruwo yimwe azo kuzitumbura tupu asi “mbando.”​—Ex 25:17-22; 1Hs 28:11; Heb 9:5.

• Mbeli.

  Kwa tamba unene po komuna gomugara, ogu mugara a howo kureta. Posiruwo sanare, mbeli kwa mu tere asi mulyo mepata ntani yige nga gendesa embo nsene oguhwe vana dogoroka. Jesus kuna kara mbeli zaJehova, mbeli goyisitwa nayinye ntani yige va hova kupindura koufe.​—Gen 25:33; Ex 11:5; Kor 1:15; Eho 1:5.

• Mbudi zongwa.

  MoMatjangwa goRugereka goSikriste kwa tamba kombudi zongwa zokuhamena Uhompa waKarunga, ezi ngazi ka tu parura nsene tu likida epuro mwaJesus Kristusa.​—Ruk 4:18, 43; Yir 5:42; Eho 14:6.

• Mbungakriste.

  Kwa tamba kovantu vana pongo va rugane yuma. MoMatjangwa goRuhebeli, azo kwa tamba komuhoko goVaisraeli. Ano moMatjangwa goRugereka goSikriste, azo kwa tamba kotumbunga toVakriste, nye rorunzi azo kutamba konombungakriste.​—1Vh 8:22; Yir 9:31; Rom 16:5.

• Mbungururu zongurangura.​—

  Tara NTUNGURU.

• Mesiyasa.

  Kwa tunda konkango zoRuhebeli ezi azi tanta asi “mugwavekwa” ndi “ogu va gwaveka.” Nkango “Kristusa” kwa tunda konkango zoRugereka ezi azi tanta asi mugwavekwa.​—Dan 9:25; Joh 1:41.

• Mfuto zepangero.

  MoMatjangwa goRugereka goSikriste kwa tamba koyimaliwa eyi va pangerere vantu va fute kepangero.​—Neh 5:4; Rom 13:7.

• Mina.

  Kuliza noMatjangwa goRugereka goSikriste mina zimwe kwa hulire poyimaliwa yosisiliveli eyi ngava tumbura asi drachma yokusika 100. Azo nga zi vihi 340 g.​—Ruk 19:13.

• Mira.

  Kuna kara manganganga gedumba lyewa aga aga tundu koyitji yomega ndi yinhwa yorudi oru ava tumbura asi Commiphora. Mira ngava zi ruganesa komakehe nonombete yipo yi nuke nawa, ntani ngava zi tura momagadi gokulikwita. Azo ngava zi vhongo novhinyu yipo zi kare zononkondo. Ngava zi ruganesa hena mokuwapaika simpu komeho va si vhumbike.​—Ex 30:23; Yis 7:17; Maru 15:23; Joh 19:39.

• Moroko.

  Kuna kara sikarunga soVaamoni; nampo kwa lifana naMalikamu, Milikomu ntani Moreki.​—Yir 7:43.

• Mosesa, Veta za.

  Kuna kara Veta ezi Jehova ga pere Vaisraeli kupitira mwaMosesa, apa va kere momburundu zaSinayi momvhura 1513 B.C.E. Nobuke ntano dokuhova domoBibeli yikando yoyinzi kuditumbura asi Veta.​—Mat 5:17; Ruk 24:44.

• Mpepo.

  Nkango zoRuhebeli ruʹach nezi zoRugereka pneuʹma ezi va toroka asi “mpepo,” kutanta yininke yokulisiga-siga. Yininke oyo nayinye kapi ava yi mono vantu ntani ayo kwa kara nononkondo. Nkango ozo zoRuhebeli nezi zoRugereka kwa di ruganesa mokutamba (1) kompepo ezi azi pepe, (2) nonkondo deparu edi da kara moyinamwenyo yepevhu, (3) yininke eyi a yi ninkisa muntu a uyunge ndi a rugane yuma monkedi zongandi, (4) marongo gokutunda koyininke eyi ayi dili kumoneka, (5) yisitwa yopampepo ntani (6) nonkondo daKarunga ndi mpepo zokupongoka.​—Ex 35:21; Ps 104:29; Mat 12:43; Ruk 11:13.

• Mpepo zokupongoka.

  Ado kuna kara nonkondo daKarunga edi adi dili kumoneka, edi a ruganesa mokusikisa mo sitambo sendi. Azo kwa pongoka morwa kwa tunda kwaJehova ogu ga zera ntani ga hungama kupitakana nkenye esi. Ntani azo kwa pongoka morwa Karunga kuziruganesa mokusikisa mo eyi ya pongoka.​—Ruk 1:35; Yir 1:8.

• Mpumbi.

  Muntu ogu a tanta asi age kuvhura kupumba eyi ngayi horoka komeho. Vapristeli ava ngava rugana youmpure, nonganga, vakonentu ntani navamwe kwa va tumbura moBibeli asi vapumbi.​—Lev 19:31; De 18:11; Yir 16:16.

• Mpunda.

  Kuna kara sipako esi va rugene kosipapa sosikorama, ngwendi sosikombo ndi sonzwi ntani amo ngava simbire mo vhinyu. Vhinyu ngava zi tura monompunda donompe, morwa apa ngazi haha, azo ngazi ninkisa sipako oso si fure morwa ako ngaku tundu mpepo (carbon dioxide). Nompunda donompe ngadi nanunuka, nye dononkurunkuru ngadi tauka morwa mpepo ozo.​—Jos 9:4; Mat 9:17.

•  Mpure.

  Kuna kara muntu ogu a ruganesa nonkondo dokutunda konompepo donondona.​—Yir 13:6.

• Mudona.

  Kwa tamba kwaSatana Muzonaguli, ogu a rwanesa Karunga nonompango dendi douhungami.​—Mat 6:13; 1Jo 5:19.

• Muengeli gomunene.

  Kwa tamba “komupitisili govaengeli.” Mokumona asi moBibeli kapi va ruganesa nkango ozo payinzi, eyi kulikida asi muengeli gomunene gumwe tupu ga kara po. Bibeli kulikida asi muengeli ogo edina lyendi, Mikayera.​—Dan 12:1; Juda 9; Eho 12:7.

• Muetiyopiya.

  Kuna kara muntu ogu ga tunda koEtiyopiya, sirongo esi sa kere koMbindakano zaEgipite. Aso kwa kwaterere mo Mbindakano zosirongo saEgipite ntani noharufa zosirongo saSudan sanaina.​—Yir 8:27.

• Mugano.

  Kuna kara etumbwidiro eli ava gava vantu kwaKarunga, yipo va rugane yuma yongandi, va gave uhwi wongandi, va lihameke mosirugana songandi ndi va nyokere po yininke yongandi eyi ya dira kukara epuko. Mugano kuna kara hena nonkango edi a uyunga muntu mokulikida asi eyi ana kuuyunga kuna kara usili, ndi etumbiwidiro eli a tura po muntu mokurugana yuma ndi mokudira kurugana yuma. Yikando yoyinzi vantu kugana komuntu ogu ga zeruka, unene po kwaKarunga. Jehova kwa pamekere egwanekero lyendi naAbirahamu nomugano.​—Mat 5:33; Gen 14:22; Heb 6:16, 17.

• Mugavi geparu.

  Kwa tunda konkango zoRugereka ezi azi tanta asi “mupitisili.” Azo kwa zi ruganesa mokutamba kositumbukira esi ga kara naso Jesus Kristusa sokuzowora vantu wovalimburukwi kononzo nokuvaninka va ka gwane mwenyo gwanarunye.​—Yir 3:15; 5:31; Heb 2:10; 12:2.

• Mugwanekedesi.

  Kuna kara muntu ogu a vatere vantu vavali yipo va tulise po mbili. Matjangwa kulikida asi Mosesa yige mugwanekedesi gegwanekero lyoVeta, ano Jesus yige mugwanekedesi gegwanekero lyepe.​—Gar 3:19; 1Ti 2:5; Heb 12:24.

• Muhongi gerova.

  Muntu ogu a rugana yininke yerova ngwendi yikayiga, yiyaha ntani noyipako yimwe hena. MoRuhebeli nkango ozo kutanta asi “musiti.” Nonkondo edi ga kara nado muhongi gerova, yikando yoyinzi kwa di fanekesa kononkondo edi ga kara nado Jehova kovantu nokonomuhoko.​—Jes 64:8; Rom 9:21.

• Mujuda.

  Nkango ezi ngava ruganesa komuntu ndi korudi roVajuda konyima zapa wa hege po uhompa womazimo murongo goVaisraeli. (2Vh 16:6) Vaisraeli womarudi gokulisiga-siga ava va ka tundire kounkwate koBabironi, ngava va zigida asi Vajuda. (Esra 4:12) Konyima, azo kwa zi ruganesere mokulikida elisigo eli lya kere pokatji koVaisraeli novantu wokonomuhoko dapeke. (Est 3:6) Mupositoli Paurusa nage kwa ruganesere nkango ezi mokulikida asi Vakriste kapi va hepa kulitondorora.​—Rom 2:28, 29; Gar 3:28.

• Mukara gwaSaromo.

  Azo kwa tamba komukara ogu gwa kere koUpumezuva weharango lyontembeli zomomazuva gaJesus. Vantu kwa yi pulire asi, mukara ogo yigo gwelike gwa hupire ko kontembeli ezi ga dikire Saromo. Jesus kwa gendere momukara ogo ‘posiruwo sokufu’ ntani Vakriste wokuhova yimo ngava pongere yipo va rugane ukareli.​—Joh 10:22, 23; Yir 5:12.

• Mukriste.

  Kuna kara edina eli ga gava Karunga kovarongwa vaJesus Kristusa.​—Yir 11:26; 26:28.

• Mukuronambunga ndi mukurona.

  Kwa tamba komugara gomukondi, nye moMatjangwa kwa zi ruganesa mokutamba komuntu ogu ga kara nositumbukira momukunda ndi mosirongo. Nkango ozo kwa zi ruganesa hena mobuke zEhororo koyinamwenyo yemeguru. Nkango zoRugereka pre·sbyʹte·ros kwa zi toroka asi “mukuronambunga” apa azi tamba kogu a pitisire mombungakriste.​—Ex 4:29; Yis 31:23; 1Ti 5:17; Eho 4:4.

• Mukwafimbunga.

  Kwa tunda konkango zoRugereka di·aʹko·nos, va toroka yikando yoyinzi asi “mukareli.” “Mukwafimbunga” kuna kara muntu ogu a vatere vakuronambunga mombungakriste. Age ga hepa kusikisa mo yihepwa eyi ya kara moBibeli komeho zokumutura a kare mukwafimbunga.​—1Ti 3:8-10, 12.

• Mulirongi gomatjangwa.

  Kuna kara muntu ogu nga tjangurura Matjangwa goRuhebeli. Apa ga wizire Jesus pevhu, azo kwa tembe hena kovagara ava va lirongere Veta. Awo ngava rwanesa Jesus.​—Esra 7:6, NW, ftn.; Maru 12:38, 39; 14:1.

•  Mumanguruki ndi ogu va mangurura.

  Posiruwo sepangero lyoVaroma, “mumanguruki” kwa kere muntu ogu ga kere munamvharerwa gomoRoma. Nye ‘ogu va mangurura’ kuna kara muntu ogu ngava mangurura moupika. Muntu ogu ngava mangurura moyitarameho ngava mu pe unamvharerwa woSiroma nye kapi ngava mu horowora a kare mupitisili. Nye ogu ngava dili kumangurura moyitarameho nga manguruka koupika, nye age kapi nga gwana unamvharerwa.​—1Ko 7:22.

• Munasareta.

  Edina eli ngava zigidisa Jesus, morwa age kwa kulilire modoropa zaNasareta. Nkango ozo nampo kwa lifana nonkango zoRuhebeli “mutayi gomupe” ezi va ruganesa mwaJesaya 11:1. Konyima zosiruwo, varongwa vaJesus nawo kwa ya va zigidire asi Vanasareta.​—Mat 2:23; Yir 24:5.

• Munomeni.

  Kuna kara muntu ogu a takamesa vantu ndi emona kosiponga, unene po masiku ntani age kurondora vantu nsene siponga sina siki. Vanomeni ngava kara komakuma gositata ntani komaruhungu, yipo va tarere vantu ava vana kara koure, komeho va hedere pepi. Vakwayita nawo kwa kere novanomeni.​—Mat 27:65; 28:4.

• MunwaMuntu.

  Nkango ozo kwa moneka moMavangeli yikando yokusika koyiha 80. Azo kwa tamba kwaJesus Kristusa ntani azo kulikida asi age kwa ya kere muntu apa va ya mu hampurukire pevhu ntani kapi ga kere sisitwa sopampepo esi sa kere norutu ropanyama. Nkango ozo kulikida hena asi Jesus nga sikisa mo uporofete ou wa kara mwaNdaniyera 7:13, 14. MoMatjangwa goRuhebeli nkango ezi kwa zi ruganesere hena kwaHesekiyeli naNdaniyera mokulikida asi awo kwa lisigire nogu ga va pere mbudi.​—Hes 3:17; Dan 8:17; Mat 19:28; 20:28.

• MunwaNdafita.

  Nonkango edi kwa di ruganesa kwaJesus yikando yoyinzi, morwa age kwa kere gomoruvharo rwaNdafita ntani yige ga ya pingire egwanekero lyoUhompa eli ga tulisire po Karunga kumwe naNdafita.​—Mat 12:23; 21:9.

• Mupangeli gomomukunda goVaroma.

  Kuna kara mupangeli gomomukunda goVaroma ogu ga kere mepangero lyovapanguli woVaroma. Age kwa kere nononkondo dokupangera vakwayita nokutura po matokoro. Ntani age yige ga kere po nononkondo momukunda, nampili ngomu ga kere mepangero lyovapanguli woVaroma.​—Yir 13:7; 18:12.

• Mupitisili ndi mutareli.

  Kuna kara muntu ogu va pa situmbukira sokutarera nokutakamesa mbungakriste. Azo kwa zi toroka konkango zoRugereka e·piʹsko·pos ezi azi tanta asi kutakamesa nokupopera yuma. Nonkango “mukuronambunga” (pre·sbyʹte·ros) ntani “mutareli” kwa tamba kositumbukira sokulifana mombungakriste. Nkango “mukuronambunga” kulikida asi muntu ogu ava horowora kwa kara noyikara yosikurona, ano nkango “mutareli” kulikida yitumbukira eyi ya hamena mo mosirugana oso.​—Yir 20:28; 1Ti 3:2-7; 1Pe 5:2.

• Mupositoli.

  Azo kutanta asi “ogu va tuma,” ntani azo kwa zi ruganesa kwaJesus ntani navamwe ava va tumine mokukavatera wopeke. Yikando yoyinzi azo kwa zi ruganesa mokutamba kovarongwa 12 ava ga horowere Jesus va karere po vakwawo.​—Maru 3:14; Yir 14:14.

• Mupristeli.

  Kuna kara muntu ogu nga uyungire po Karunga, pokuronga vantu kuhamena Karunga ntani nonoveta dendi. Vapristeli ngava karere po hena vantu komeho zaKarunga, pokugava nonzambo ntani nokulikwambera kwaKarunga. Komeho va tulise po Veta zaMosesa, nkenye nturagumbo kwa kere mupristeli gepata lyendi. Kuliza noVeta zaMosesa, vapristeli kwa kere vagara vemepata lyaArona, ogu ga tundire morudi rwaRevhi. Vagara wokuhupa ko womorudi rwaRevhi, ngava vatere vapristeli. Kutunda apa va tulisire po egwanekero lyepe, Vaisraeli wopampepo kwa ya kere muhoko govapristeli, ano Jesus Kristusa yige Mupristeli gwawo goMunene.​—Ex 28:41; Heb 9:24; Eho 5:10.

• Mupristeli gomunene.

  Kuliza noVeta zaMosesa, age kuna kara mupristeli ogu nga uyungire po vantu komeho zaKarunga ntani age nga pitisire vapristeli vakwawo. Gelike va pulisilire mokuhwilira mevango lyokupongokerera eli lya kere monkongoronzugo ntani nomontembeli. Age nga hwilire tupu monzugo zokupongokerera mEzuva lyEfironkenda. Nkango “mupristeli gomunene” kwa zi ruganesa hena kwaJesus. (Lev 16:2, 17; 21:10; Mat 26:3; Heb 4:14) MoMatjangwa goRugereka goSikriste azo  kwa tamba kovapristeli womulyo po mokatji kovapristeli navenye, kukwatera mo nava va kere nare vapristeli wovanene novapitisili wonombunga 24 dovapristeli.​—2Hs 26:20; Esra 7:5; Mat 2:4; Maru 8:31.

• Murarero gwaHompa.

  Kuna kara murarero ogu ava rugana nomboroto zokudira yihaheso ntani novhinyu, eyi ya fanekesa rutu nohonde zaKristusa; kwa tamba kediworoko lyonomfa daJesus. Mokumona asi Vakriste kwa va pangera va diworoke Murarero ogu, eyi yiyo ava gu tumbwire hena asi “ediworoko.”​—1Ko 11:20, 23-26.

• Muzangu gokuhova.

  Kuna kara muzangu ogu ava howo kuzangura ndi nkenye eyi ayi howo. Jehova kwa pangerere Vaisraeli va mu pe muzangu gwawo gokuhova, yi kare asi yimuna ndi vantu ndi nondya edi ngava zangura mevhu. Vaisraeli ngava gava muzangu gwawo gokuhova kwaKarunga poSipito soNomboroto da hana Yihaheso ntani poPentekoste. Nkango “muzangu gokuhova” kwa zi ruganesa hena pasifanekeso pokutamba kwaKristusa novarongwa vendi wovagwavekwa.​—1Ko 15:23; Num 15:21; Yis 3:9; Eho 14:4.

• Muzonaguli.

  Alyo kuna kara edina lyaSatana eli atu gwana moMatjangwa goRugereka eli ali tanta asi “ogu a rundire vakwawo.” Satana kwa mu ruka edina olyo morwa yige ga hovere kutanta yimpempa kuhamena Jehova nononkango dendi ntani nedina lyendi lyokupongoka.​—Mat 4:1; Joh 8:44; Eho 12:9.

• Mwenyo.

  Kuna kara nkango ezi va toroka konkango zoRuhebeli ezi asi neʹphesh ntani zoRugereka asi psy·kheʹ. Konyima zokukonakona omu va ruganesa nonkango edi moBibeli, ayo kumoneka asi ado kwa tamba (1) kovantu, (2) koyikorama, ndi (3) keparu eli va kara nalyo vantu ndi lyoyikorama. (Gen 1:20; 2:7; Num 31:28; 1Pe 3:20; ntani ftns.) Mokulisiga nomu ava ruganesa nkango “mwenyo” momaukarelikarunga, Bibeli kulikida asi nkango neʹphesh ntani psy·kheʹ, kwa tamba koyisitwa yepevhu yopanyama, eyi atu mono ntani eyi ayi dili kuparuka narunye. Metoroko eli, nonkango edi mbali kwa di toroka yikando yoyinzi kuliza neyi dina kutanta, pokuruganesa nonkago ngwendi “eparu,” “sisitwa,” “muntu,” “eparu lyomuntu nalinye,” ndi pokuruganesa nkwatelinkangodina (pasihonena, kwa ruganesa nkango “nyame” mevango lyokuninka asi “mwenyo gwange”). Yikando yoyinzi, nonkango dokonhi kufaturura eyi zina kutanta nkango “mwenyo.” Apa nkango “mwenyo” ava zi ruganesa mosireswa ndi kononkango dokonhi, twa hepa kuzikwata egano kuliza nefatururo olyo. Nsene kuna kurugana sininke nomwenyo nagunye, ayo kutanta asi kuna kuyirugana nomutjima nagunye ndi neparu lyoge nalinye. (De 6:5; Mat 22:37) MoMatjangwa gamwe, nonkango odo kwa di ruganesa mokutamba keharo eli sa kara nalyo sisitwa. Ado kuvhura hena kutamba komuntu gokufa ndi kosimpu.​—Num 6:6; Yis 23:2; Jes 56:11; Hag 2:13.

N

• Narudisi.

  Kuna kara magadi gondiro gomageha aga ava gusa kositji sonarudisi (Nardostachys jatamansi). Mokumona asi ago kwa kere magadi gondiro, ago ngava ga vhongo nomagadi gapeke gombiliha ntani poyiruwo yimwe vantu kapi ngava rugana magadi gonarudisi zene-zene. Nye Marukusa naJohanesa kwa tente asi magadi aga va kwitire Jesus kwa kere “gonarudisi zene-zene.”​—Maru 14:3; Joh 12:3.

• Ndjoko.

  Kuna kara sitji esi ngava kambeke pomapepe gomuntu, ntani ako ngava mangerere ko nomurongero. Azo kwa tamba hena kondjoko ezi ava kutire yimuna eyi va deura (unene po nongombe) yipo yi koke sireyi ndi yapeke. Mokumona asi nondjoko ngava di ruganesa mokukoka yininke youdigu, azo kwa zi ruganesa pasifanekeso mokutamba koupika ndi kukara mepangero lyomuntu ntani kokuhepa. Kukugusa ndjoko ndi kuziteza kwa fanekesere kumangurura moupika ndi momahepeko.​—Lev 26:13; Mat 11:29, 30.

• Ngundi.

  Kuna kara sininke sokuvyukilira, esi asi kwaterere yuma ndi nkenye eyi ya fana ngwendi sininke oso. Saromo kwa ruganesere nongundi apa ga dikire ntembeli ntani nombara. Azo kwa zi ruganesa moBibeli mokufanekesa eyi ya kwata yuma yongandi (1Ti 3:15) ndi situmbukira sokukarerera (Eho 3:12) moMatjangwa goRugereka goSikriste.​—Vap 16:29; 1Vh 7:21.

• Nisani.

  Alyo kuna kara edina eli va rukire kwedi kwaAbibu konyima zapa Vaisraeli va ka tundire kounkwate waBabironi. Ako kuna kara kwedi kokuhova kuliza nokalindeli  koVajuda ntani kwedi kwauntambali kosiruwo sokulima. Kwedi oko ngaku tameke mokatji kaNsinano nokuhaga mokatji kaKudumogona. (Neh 2:1) Vajuda ngava dana silika soPaska mokwedi kwaNisani momazuva 14, ntani Jesus kwa tulisire po Murarero gwaHompa mezuva olyo. (Ruk 22:15, 19, 20) Age kwa mu pamparere kositji mezuva lyokulifana.​—Ruk 23:44-46.

• Nkareso zokunyata.

  Kwa tunda konkango zoRugereka a·selʹgei·a, azo kwa tamba koyirugana yoyidona unene eyi ayi lirwanesa nonoveta daKarunga ntani ayo kulikida nkareso zokudira kufumadeka upangeli nonoveta. Nye nkango ozo kapi za tamba koyirugana yoyidona yoyinunu.​—Gar 5:19; 2Pe 2:7.

• Nkenda zonene.

  Kwa tunda konkango zoRugereka ezi za tamba koyininke yoyiwa. Yikando yoyinzi nkango ozo kwa tamba kouhwi wouwa ndi konkareso zougavi. Apa ava zi ruganesa konkenda zaKarunga zonene, azo kutamba kouhwi ou a gava Karunga mawoko-woko, ga hana kundindira yuma komuntu. Yipo nye azo kulikida ugavi ou ga kara nawo Karunga wounene, neharo lyendi lyenene nonkenda ezi ga kara nazo kovantu. Nkango ozo zoRugereka kwa zi toroka hena asi “uhwi wouwa.” Nkenda ozo kuzilikida komuntu ga hana kurugana yuma, morwa ugavi wogu ana kuzilikida.​—2Ko 6:1; Efe 1:7.

• Nkore zaKristusa.

  Nkango zoRugereka kutanta yininke yivali. Azo kwa tamba kwava ava rwanesa Kristusa. Azo kuvhura kutamba hena kwaKristusa goyimpempa, ogu a lininkisa asi Kristusa. Nombunga novantu navenye ava ava tanta asi awo Kristusa ndi Mesiyasa ntani nava ava rwanesa Kristusa novarongwa vendi, kuvatumbura asi nonkore daKristusa.​—1Jo 2:22.

• Nombinga dokosizambero.

  Ayo kuna kara yininke yokufana ngwendi nombinga eyi ya kere komaruha gane goyizambero yimwe.​—Lev 8:15; 1Vh 2:28; Eho 9:13.

• Nomboroto donzambo.

  Kuna kara nomunhwi donomboroto 12 edi va tulire monomukweyo mbali, mwankenye mukweyo kwa tulire mo nomboroto ntazimwe. Ado kwa di tulire positafura esi sa kere monzugo zokupongoka monkongoronzugo ntani nomontembeli. Ado kuditumbura hena asi “nomboroto dokupongoka” ndi “nomboroto delikido.” Nkenye Esabata, nomboroto edi donzambo ngava di pinganesere po nonomboroto donompe. Vapristeli yiwo velike ngava li nomboroto edi ngava pinganesere po.​—2Hs 2:4; Ex 25:30; Lev 24:5-9; Mat 12:4; Heb 9:2.

• Nompepo donondona.

  Kuna kara yisitwa yopampepo yoyidona eyi ayi dili kumoneka ntani ayo kwa kara nononkondo dononene kupitakana vantu. Kuliza naGenesis 6:2, NW awo ngava va tumbura asi “vana vaKarunga” ntani mwaJuda 6 awo kwa va tumbura asi “vaengeli.” Awo kapi va va sita va kare vaengeli wovadona, nye awo kwa ya kara nonkore daKarunga morwa kapi va limburukwire Karunga momazuva gaNowa ntani awo kwa lipakerera naSatana va rwanese Jehova.​—De 32:17; Ruk 8:30; Yir 16:16; Jak 2:19.

• Ntembeli.

  Kwa tamba kevango lyoukareli, evango lyokupongoka. Nye yikando yoyinzi, azo kwa tamba konkongoronzugo ndi ketungo lyontembeli, eli lya kere moJerusarema. Ntembeli kwa pinganene po nkongoronzugo ezi ngava ruganene Vaisraeli ukareli. Ntembeli zokuhova kwa zi dikire Saromo ntani azo kwa zi zonagwire po Vababironi. Zauvali kwa zi dikire Serubabeli konyima zapa Vaisraeli va ka tundire kounkwate waBabironi, ntani konyima azo kwa ya zi tungwilire Herodesa goMunene. MoMatjangwa, ntembeli ngava zi tumbura asi “nzugo zaHOMPA.” (Esra 1:3; 6:14, 15; 1Hs 29:1; 2Hs 2:4; Mat 24:1) Nkango ozo kwa tamba hena kevango oku ga tunga Karunga, meguru.​—Ex 25:8, 9; 2Vh 10:25; 1Hs 28:10; Eho 11:19.

• Ntoko.

  Kuna kara evango oku ngava horeke simpu. Nkango ozo kwa zi toroka konkango zoRugereka mne·meiʹon, ezi azi tanta asi “kudiworoka,” eyi ayi likida asi muntu ogu a fu kumudiworoka.​—Joh 5:28, 29.

• Ntunguru.

  Kwa tamba ‘kombungururu zongurangura.’ Azo kuna kara mbungururu ezi azi hulilire kumoneka koUpumezuva komeho ezuva li pume, azo kulikida asi ezuva kuna kusa.​—Eho 22:16; 2Pe 1:19.

• Nzambo zeswakerero.

  Kuna kara nzambo zosikorama esi ngava hwike posizambero ngosigava kwaKarunga; kwato ruha rosikorama (ntwedu, nzwi zongara, sikungwe,  nkutji ndi mputukuwagona) oru ngava gusa ko ava ngava gava nzambo ozo.​—Ex 29:18; Lev 6:9; Maru 12:33; Heb 10:6.

• Nzambo.

  Kuna kara uhwi ou ava gava kwaKarunga mokulikida rupandu, nokutambura unzoni ntani nokutulisa po mbili naKarunga. Komeho Karunga a pangere vantu va gave nonzambo, kuliza noVeta zaMosesa, vantu ngava gava pwavene nonzambo dokulisiga-siga kwaKarunga, kukwatera mo nonzambo doyimuna, kutundilira kwaAbeli. Konyima zapa Jesus ga geve eparu lyendi ngonzambo zokusikilira mo, vantu kapi va hepere hena kugava nonzambo doyimuna. Nye Vakriste simpe kugava nonzambo dopampepo kwaKarunga.​—Gen 4:4; Heb 13:15, 16; 1Jo 4:10.

• Nzambo zononzo.

  Kuna kara nzambo ezi nga gava muntu, kononzo edi a tura morwa kudira kusikilira mo. Vantu ngava gava nonzambo doyimuna dokulisiga-siga, kutundilira kongombe dogoro konkutji, kuliza noukaro womuntu ogu ana tura nzo.​—Lev 4:27, 29; Heb 10:8.

• Nzambo zoyikunwa.

  Azo kuna kara nzambo zovhinyu ezi ngava tjire posizambero ntani azo ngava zi gava kumwe nononzambo dapeke dononzi. Paurusa kwa fanekesere eharo eli ga kere nalyo mokuruganena Vakriste vakwawo konzambo zoyikunwa.​—Num 15:5, 7; Fil 2:17.

• Nzira.

  Kuna kara nkango ezi va ruganesa moMatjangwa pasifanekeso mokutamba konkareso ndi koyirugana eyi a tambura Jehova ndi eyi a dili kutambura. Ava va ya kere varongwa vaJesus Kristusa ngava va zigida asi awo kwa hamenene ‘konzira.’ Eyi kutanta asi awo kwa pulire mwaJesus Kristusa ntani awo ngava kwama sihonena sendi.​—Yir 19:9.

• Nzugo zokupongoka.

  Kuna kara nzugo zokuhova ntani zonene po ezi za kere monkongoronzugo nomontembeli. Azo kwa lisigire nonzugo zomonda zokupongokerera. Nzugo zokupongoka zomonkongoronzugo, kwa kere mo uzweko wongorodo wonoramba, sizambero songorodo sokuhwikira nzambo zedumba lyewa, sitafura sonomboroto donzambo ntani noyiruganeso yongorodo. Ano nzugo zokupongoka zomontembeli kwa kere mo sizambero songorodo, mauzweko murongo gongorodo gonoramba ntani yitafura murongo yonomboroto donzambo.​—Ex 26:33; Heb 9:2.

• Nzugo zokupongokerera.

  Kuna kara nzugo ezi za kere monda zonkongoronzungo ntani nomontembeli, omu va tulire sikesa segwanekero. Azo ngava zi tumbura hena asi zokupongokerera po. Mosesa yige gelike va pulisilire mokuhwilira monzugo zokupongokerera ntani nomupristeli gomunene ogu nga hwilire mo tupu mEzuva lyEfironkenda.​—Ex 26:33; Lev 16:2, 17; 1Vh 6:16; Heb 9:3.

O

• Ogu ga ya kere Mujuda.

  Muntu ogu ga litezwilire. MoMatjangwa kwa tamba komuntu ogu ga ya kere Mujuda. Nsene mugara, age va hepere kumurugana yovamba.​—Mat 23:15; Yir 13:43.

P

• Paradisa.

  Kuna kara evango lyoufuuli ndi lyokufana ngwendi sikunino. Sikunino saEdeni esi ga pere Jehova valikwali wokuhova, kwa fene ngwendi evango olyo. Jesus kwa likidire asi evhu ngali kara paradisa, apa ga uyungisire gumwe govakorokotji ava va pamparere kositji kumwe nage. Nkango paradisa kwa zi ruganesa pasifanekeso mo-2 Vakolinte 12:4, ano mEhororo 2:7 azo kwa tamba koparadisa zemeguru.​—Rus 4:13; Ruk 23:43.

• Paska.

  Kuna kara silika esi ngava dana nkenye mvhura mokudiworoka omu Vaisraeli va va zowere moEgipite. Aso ngava si dana momazuva 14 gokwedi kwaAbibu (oku va ya rukire asi Nisani). Mezuva olyo vantu ngava dipaga nokudosa nzwigona (ndi sikombo), ano konyima azo ngava zi li kumwe noyikwahidi youruru ntani nomboroto zokudira yihaheso.​—Ex 12:27; Joh 6:4; 1Ko 5:7.

• Pentekoste.

  Kuna kara simwe soyipito yitatu, eyi vagara ngava danene koJerusarema ngamoomu ga yi va pangerere Jehova. Pentekoste kutanta asi “(ezuva) lyonomurongo ntano.” Azo kwa zi ruganesa moMatjangwa goRugereka goSikriste mokutamba kezuva lyosipito sonombuto ndi sipito soyivike, eyi va tumbura moMatjangwa goRuhebeli. Aso ngava si dana mezuva lyau-50, nsene o varura kutundilira momazuva 16 gokwedi kwaNisani.​—Ex 23:16; 34:22; Yir 2:1.

• Porneia.​—

  Tara RUHONDA.

 R

• Revhi; Murevhi.

  Kuna kara munwaJakopo naReya gwautatu; kwa tamba hena korudi oru va ya mu rukire. Movana vaRevhi vatatu yimo mwa tundire nombunga ntatu doVapristeli woVarevhi. Poyiruwo yimwe nkango “Varevhi” kutamba korudi narunye, nye yikando yoyinzi azo kapi azi tamba kepata lyaArona. Rudi rwaRevhi kapi va ru pere ruha moSirongo sEtumbwidiro, nye awo kwa va pere yitata 48, eyi ya kere mosirongo esi va pere marudi gapeke.​—De 10:8; 1Hs 6:1; Heb 7:11.

• Ruarameya.

  Eraka eli lya lifana neli lyoRuhebeli ntani kuruganesa noalfabeti edi da lifana nedi doRuhebeli. Pomuhowo alyo ngava li uyunga Vaarameya, nye konyima alyo ngava li ruganesa moyirongo eyi ngava pangere Vaasiliya noVababironi. Alyo ngava li ruganesa hena moyirongo eyi ngava pangere Vaperesiya. (Esra 4:7) Maruha gamwe gobuke zaEsira, Jeremiya ntani Ndaniyera kwa ga tjenge moRuarameya. Nonkango dimwe domoRuarameya kwa di ruganesa moMatjangwa goRugereka goSikriste.​—Esra 4:8–6:18; 7:12-26; Jer 10:11; Dan 2:4b–7:28; Maru 14:36; Yir 9:36.

• Rugereka ndi Mugereka.

  Kuna kara eraka eli ava uyunga vantu womoGereka; kwa tamba hena muntu ogu va retera moGereka ndi ekoro lyendi kwa tundilira koGereka. MoMatjangwa goRugereka goSikriste azo kwa tamba hena kovantu navenye ava va dilire kukara asi Vajuda ndi ava ngava kwama mpo zoSigereka nokuuyunga Rugereka.​—Jow 3:6; Joh 12:20.

• Ruhebeli ndi Muhebeli.

  Rudi oru va hovere kutumbwisa Abiramu (Abirahamu), yipo a lisige norudi roVaamoli. Konyima aro kwa ru ruganesa mokutamba koruvharo rwaAbirahamu oru rwa tundilire mwamutekurwendi Jakopo neraka eli ngava uyunga. Posiruwo saJesus, eraka lyoRuhebeli kwa kere mo nonkango doRuarameya ntani alyo yilyo eraka nga uyunga Kristusa novarongwa vendi.​—Gen 14:13; Ex 5:3; Yir 26:14.

• Ruhonda.

  Kwa tunda konkango zoRugereka por·nei′a, ezi za tamba kwankenye eligwanekero panyama lyokudira kuwapera. Azo kwa kwatera mo kuhondera, yirugana youhondedi, kuligwanekera panyama nomuntu ogu wa dira kukwara, kuligwanekera panyama nomugara ndi mukadi mukweni ntani kuligwanekera panyama noyimuna. Azo kwa zi ruganesa mEhororo kohondedi ndi “Babironi zonene,” mokulikida omu a ruganene kumwe novapangeli womouzuni ou yipo a gwane nonkondo nemona. (Eho 14:8; 17:2; 18:3; Mat 5:32; Yir 15:29; Gar 5:19)​—Tara HONDEDI.

• Rumbendo.

  Kuna kara sininke esi va rugana kosivera, esi ngava ruganesa mokugava marondoro ntani ngava si ruganesa komarusumo. Mazwi gorumbendo, yikando yoyinzi kwa fanekesa ediviso lyompanguro zaJehova ndi yihorokwa yimwe eyi a retesa po Karunga.​—1Ko 15:52; Eho 8:7–11:15.

• Rungu.

  Kuna kara yininke eyi ayi tundu komahangu apa ava ga hwaga ntani apa ava ga zere. Rungu kwa ru ruganesa mokufanekesa yininke yokudira mulyo.​—Ps 1:4; Mat 3:12.

• Ruu.

  Kuna kara nkango ezi ava ruganesa koyimeno eyi ayi mene komavango oku kwa kara mema gomanzi. Yikando yoyinzi azo kwa zi ruganesa moBibeli mokutamba kosimeno esi ava tumbura asi Arundo donax.​—Mat 27:29; Eho 11:1.

• Ruvinga.

  Kwa tamba konombinga doyikorama edi ngava ruganesa nare yipo va nwise ko, va pungwire mo magadi, inka noyininke yokuliwapekesa ntani ngava di ruganesa vantu ava ngava dimbi ndi mokugava erondoro. (1Sa 16:1, 13; 1Vh 1:39; Hes 9:2) Nkango “ruvinga” kwa zi ruganesa yikando yoyinzi mokufanekesa unankondo ntani nefundo.​—De 33:17; Mik 4:13; Ruk 1:69.

S

• Samaliya.

  Aso kwa kere nkurusitata ure wonomvhura 200. Aso kwa kere sitata souhompa womazimo murongo goVaisraeli, aga ga kere koMuzogo. Ntani alyo kwa kere hena edina lyomukunda omu sa kere sitata oso. Sitata oso kwa si dikilire hena pondundu zedina Samaliya. Momazuva gaJesus, Samaliya kwa kere mukunda goVaroma ogu gwa kere pokatji kaGalireya naJudeya. Yikando yoyinzi Jesus kapi nga zuvhisire momukunda ogo, nye poyiruwo yimwe age nga piti mo tupu nokuuyungisa womomukunda ogo. Peturusa kwa ruganesere nsapi zauvali zoUhompa apa Vasamaliya va gwene mpepo zokupongoka.​—1Vh 16:24; Joh 4:7; Yir 8:14.

•  Satana.

  Kwa tunda konkango zoRuhebeli ezi azi tanta asi “Murwanesi.” MoBibeli azo kwa tamba kwaSatana Muzonaguli, nkore zaKarunga zonene.​—Job 1:6; Mat 4:10; Eho 12:9.

• Sidiviso.

  Kuna kara sininke, sirugana ndi ukaro ou au likida yuma eyi yina kuhoroka ndi eyi ngayi horoka komeho.​—Mat 24:3; Eho 1:1.

• Sigongi somasimbi.

  Kwa tamba kompanguro zonene zomoJerusarema. Momazuva gaJesus, sigongi esi kwa hamenene mo vantu 71, kukwatera mo mupristeli gomunene ntani navamwe ava va kere nare vapristeli wovanene, vamwe womomapata govapristeli wovanene, masimbi, masimbi gomapata ntani nomasimbi gorudi ntani valirongi womatjangwa.​—Maru 15:1; Yir 5:34; 23:1, 6.

• Sihoramo saKarunga.

  Kuna kara sininke esi sa likwatakana nositambo saKarunga. Aso kapi ava si divisa dogoro ngasi sike mo siruwo esi ga tura po Karunga. Ntani aso kusihorora tupu kovantu ava ga horowora.​—Maru 4:11; Kor 1:26.

• Sikameno sovhinyu.

  Kuna kara makero gavali aga va tjokwerere momamanya, ekero limwe kwa kere keguru lyekwawo, ntani ago kwa ga gwanekedesere nomulihu gomununu. Ngomu mandjembere ngava ga lyatanga mekero eli lya kere keguru, mema aga ga tundire komandjembere kwa konkomokerere mekero eli lya kere konhi. Nkango ezi kwa zi ruganesa pasifanekeso mokutamba kompanguro zaKarunga.​—Eho 19:15.

• Sikarunga; kukarera mafano.

  Kuna kara efano ndi sininke esi asi moneka ndi asi dili kumoneka, esi ava ruganesa vantu moukareli. Kukarera mafano kwa tamba kokufumadeka ndi kuhara nokutongamena efano.​—Ps 115:4; Yir 17:16; 1Ko 10:14.

• Sikesa segwanekero.

  Kuna kara sikesa esi va rugene nositji somusu esi va kwitire ngorodo. Aso kwa kere mevango lyokupongokerera lyomonkongoronzugo, ano konyima kwa ya kere mevango lyokupongokerera montembeli ezi ga tungire Saromo. Aso kwa kere nombando zongorodo, ezi za kere novakerubi vavali ava va lipirukilire. Monda kwa kere mo yiperende yivali eyi va tjenge yipango murongo.​—De 31:26; 1Vh 6:19; Heb 9:4.

• Sikoverero sonsako.

  Kuna kara sikehe esi ngava ruganesa yipo va rugane nonsanko ndi nondjato, va simbire mo mbuto. Aso ngava si honzo pokuruganesa nohuki doyikombo yoyisovagani ntani yiso ngava dwara nsene kuna kara moruguwo.​—Gen 37:34; Ruk 10:13.

• Siliya; Vaasiliya.

  MoMatjangwa goRugereka goSikriste, Siliya kwa tamba komukunda goVaroma omu sa kere sitata saAntiyokiya. Ago kwa lifana nomukunda gwaSiliya (ogu ava tumbura hena asi Amuramu) ogu va tumbura moMatjangwa goRuhebeli, nye kwa lisigira tupu konomururani. Mupangeli gomukunda gwaSiliya nga pangere hena Palestine mudima.​—Ruk 2:2; Yir 18:18; Gar 1:21.

• Simbonde.

  Kuna kara nompasi-mpasi dokulisiga-siga edi adi diruka motumbunga. Kuliza noVeta zaMosesa, vantu ngava di li ntani kapi va di tere asi da nyata. Nompasi-mpasi edi, ngadi li nkenye eyi ya kere monzira zado nokuzonagura unene yininke ntani ado ngadi hepeke vantu.​—Ex 10:14; Mat 3:4.

• Sinagoge.

  Nkango ezi kutanta asi “kureta kumwe ndi kuponga,” nye momatjangwa gomanzi azo kwa tamba ketungo ndi kevango oku ngava pongere Vajuda yipo va rese Matjangwa, va va ronge, va zuvhise ntani nokukanderera. Momazuva gaJesus, nkenye doropa zomoIsraeli kwa kere mo sinagoge ntani moyitata yoyinene, kwa kere mo nosinagoge dokupitakana pwazimwe.​—Ruk 4:16; Yir 13:14, 15.

• Sipako semanya.

  Aso kuna kara sipako omu ngava simbire magadi gedumba lyewa. Aso kwa si ruganesere kemanya eli ava gwana pepi naAlabastron moEgipite. Ayo ngava yi rugana nonsingo zonunu yipo va vhure kupata ko, ga dire kutjika mo magadi. Emanya eli va ruganesere sipako oso, nalyo kwa li rukire edina lyosipako oso.​—Maru 14:3.

• Sipana.

  Kuna kara sininke esi va rugene kongorodo, ndi siliveli ndi ngoporo. Aso ngava si ruganesa konkongoronzugo ntani nokontembeli mokuhwika nzambo zedumba lyewa ntani nokusimbira po makara aga ngava gusa posizambero ntani nenoto eli ngali tundu konoramba dokouzweko wongorodo. Aso ngava si tumbura hena asi  sipana somundiro.​—Ex 37:23; 2Hs 26:19; Heb 9:4.

• Sipateso ndi sinongweneso.

  Kuna kara sininke sokufana ngwendi sitamba, esi ngava ruganesa (unene po, perova ndi penongo) mokulikida mwenya sininke, umbangi ntani malizuvhasano. Aso ngasi vatere vantu yipo va dire kupaturura nombapira ndi yininke yimwe, ngwendi mavero ntani nontoko. Yipateso ndi yinongweneso yanare kwa yi rugene koyininke yononkondo (ngwendi mamanya, nombinga danzovhu ndi yitji) apa pwa kere nondanda edi va tjokora ndi yapeke. Aso kwa si ruganesa hena pasifanekeso mokulikida umbangi wosininke songandi ndi mwenya sininke ndi sininke esi va horeka ndi sehoramo.​—Joh 6:27; Efe 1:13; Eho 5:1; 9:4.

• Sipito sokupongora ntembeli.

  Aso kwa kere sipito esi ngava dana nkenye mvhura mokudiworoka ezereso lyontembeli. Azo kwa zi zeresere konyima zapa ga zi nyatekere Antiochus Epiphanes. Sipito oso ngasi tameke momazuva 25 gokwedi kwaKisirevhu ntani ngava si dana ure womazuva ntantatu.​—Joh 10:22.

• Sipito soNomboroto da hana Yihaheso.

  Aso kuna kara sipito sokuhova poyipito yitatu yomulyo eyi ngava dana Vaisraeli. Aso nga si tameke momazuva 15 gokwedi kwaNisani ntani ngasi twikire mazuva ntambali. Momazuva ogo vantu ngava li tupu nomboroto dokudira yihaheso mokudiworoka rugendo rwawo rokutunda koEgipite.​—Ex 23:15; Maru 14:1.

• Sipito soYikorogo.

  Kusitumbura hena asi Sipito soNomuzangu. Aso ngava si dana momazuva 15-21 mokwedi koVahebeli ava tumbura asi Etanimu. Vaisraeli ngava dana sipito esi konyima zokuzangura. Aso kwa kere siruwo soruhafo ntani awo ngava pandura Jehova kweyi ga tungikire muzangu gwawo. Posiruwo oso awo ngava tungu moyikorogo ndi momautara mokudiworoka rugendo rwawo rokutunda koEgipite. Esi kuna kara simwe soyipito yitatu eyi vagara ngava danene koJerusarema ngamoomu ga yi va pangerere Jehova.​—Lev 23:34; Esra 3:4; Joh 7:2.

• Sipundi sompanguro.

  Aso kuna kara sipundi sokufana ngwendi sitantara esi sa kara noyirondero, oku ava hingire vapangeli yipo va uyungise mbunga nokudivisa matokoro aga vana tura po. Nonkango ‘sipundi sompanguro saKarunga’ ntani ‘sipundi saKristusa sokupangwira,’ kwa fanekesa ewapaiko eli ga tulisa po Jehova mokupangura vantu.​—Rom 14:10; 2Ko 5:10; Joh 19:13.

• Sireti.

  Kuna kara evango eli lya kara kezenga lyaLibya, koMuzogo gwaAfrika. Alyo kwa li tjilire unene vanasikepa morwa ngali kara nkenye apa nonondundu devhu dosiponga edi ngaga diragura mankupi.​—Yir 27:17.

• Sisewe.

  Kuna kara nonkango dounongo ndi esimwititi lyesupi, eli ali rongo vantu yuma ndi ali tanta usili mononkango dononsesu. Yisewe yimwe yomoBibeli kwa yi tjanga morupe ronongano. Yikando yoyinzi, yisewe kuruganesa nombuuyungofano mokutanta usili. Yisewe yimwe ngava yi ruganesa mokusinda vantu nokupwagesa runyegenyo.​—Mud 12:9; 2Pe 2:22.

• Sitji.

  Kuna kara sitji sokuvyukilira oku ngava mangerere muntu. Monomuhoko dimwe, ako ngava dipagere ko vantu ndi ngava zenzeresa ko yimpu, mokurondora wopeke ndi va va fise nomuga. Vaasiliya ava va kere noukenya unene, ngava zenzeresa vantu ava ngava kwata moyita koyitji, eyi va va twire kutundilira komaguru dogoro konturo. Nye kuliza noveta zoVajuda, vantu ava ngava swaura Karunga ndi ava ngava karere yikarunga yoyimpempa, ngava va dipaga nomamanya ndi monkedi zapeke, ano konyima, yimpu yawo ngava yi mangerere koyitji mokurondora wopeke. (De 21:22, 23; 2Sa 21:6, 9) Varoma awo poyiruwo yimwe, ngava mangerere muntu ogu ana zono kositji, ntani age nga kara ko mazuva gongandi komeho a fe morwa kukora, enota, nzara ntani upyu wezuva. Nye poyiruwo yimwe, ngwendi apa va dipagere Jesus, awo ngava pampara mawoko nomaguru gomuntu ogu ana zono kositji. (Ruk 24:20; Joh 19:14-16; 20:25; Yir 2:23, 36) Nkango zoRugereka stau·rosʹ va toroka asi “sitji,” kwa tamba kositji sokuvyukilira ngwendi seesi va dipagerere Jesus. Kwato umbangi ou au likida asi nkango ozo zoRugereka kwa tamba kosikuruse, ngwendi seesi ngadi ruganesa nomuhoko dapeke momaukerelikarunga komeho  Kristusa a wize pevhu. Nkango ozo zoRugereka kuvhura kuzitoroka hena asi “sitji somahepeko” morwa Jesus nage kwa ruganesere nkango stau·rosʹ mokulikida asi varongwa vendi ngava va hepeka nokuvaswaura.​—Mat 16:24; Heb 12:2.

• Sitji somwenyo.

  Kuna kara sitji esi sa kere mosikunino saEdeni. Bibeli kapi za yi likida asi yiyimwa yokositji oso ngayi gava mwenyo, nye aso kwa fanekesere mwenyo gwanarunye, ogu nga gava Karunga kovantu ava nga pulisira va lye koyiyimwa yaso. Mobuke zEhororo, sitji oso kwa fanekesa ewapaiko eli ga tura po Karunga yipo vantu ngava ka gwane mwenyo.​—Gen 2:9; 3:22; Eho 2:7; 22:19.

• Sitji soururu.

  Kuna kara marudi goyitji youruru eyi ya kara nedumba lyewa lyononkondo. MEhororo 8:11, “sitji soururu” kwa tamba koyininke youruru ntani youhungu eyi ava tumbura asi absinthe.

• Sivera soutwe.

  Kuna kara sivera sosire sositwe esi ngava ruganesa vanandima mokuvyukisa yimuna. Sivera esi kwa si hetakanesa kononkango domuntu gounongo, edi adi ninkisa vapurakeni va kwame mapukururo. Nonkango “kusanga kosivera soutwe” kwa tunda kweyi ngasi rugana simuna esi ngasi nyoka kusivyukisa pokusanga kosivera nokuliremeka sene.​—Yir 26:14; Vap 3:31.

• Siyoni; Ndundu zaSiyoni.

  Kuna kara edina lyositata soVajebusi sedina Jebusi, esi sa kere kombindakano zaJerusarema. Konyima zapa ga si fundire Ndafita, age kwa dikilire mo mbara zendi ntani sitata oso ngava si tumbura asi “Sitata saNdafita.” (2Sa 5:7, 9) Siyoni kwa ya kere ndundu zokupongoka kwaJehova, apa Ndafita ga dirwire sikesa segwanekero si ze mositata oso. Konyima zosiruwo, Siyoni kwa tembe koNdundu zaMoliya, oku za kere ntembeli ntani poyiruwo yimwe edina olyo kwa tembe kositata saJerusarema mudima. Yikando yoyinzi azo kwa zi ruganesa pasifanekeso moMatjangwa goRugereka goSikriste.​—Ps 2:6; 1Pe 2:6; Eho 14:1.

• Sizambero.

  Sitantara esi va ruganesa kevhu, mamanya ntani noyitji eyi va rugana kumwe noyivera. Vantu ngava zambere po nonzambo noyitutumikidiso, yipo va karere Karunga. Monkondwa zokuhova zomonkongoronzugo ntani nomontembeli kwa kere mo “sizambero songorodo” sosinunu esi ngava hwikire yitutumikidiso. Aso kwa si rugene noyitji eyi va kwita ngorodo. “Sizambero songoporo” sosinene esi ngava zambere nonzambo, kwa kere ponze meharango. Yizambero ngava yi ruganesa hena mokukarera yikarunga yoyimpempa.​—Ex 39:38, 39; 1Vh 6:20; Mat 5:23, 24; Ruk 1:11; Yir 17:23.

• Sizoweseso.

  Kuna kara mfeto ezi ava futu mokuzowora yuma eyi va kwata, vana kutengeka, konzo ndi nampili kosirugana. Mfeto ezi kapi ngamu hamene nkenye apa yimaliwa. (Jes 43:3) Vantu ngava futu sizoweseso momaukaro gokulisiga-siga. Pasihonena, nkenye mumati gombeli ndi simuna sosigara sombeli kwa hamenene kwaJehova, yipo nye vantu va hepere kufuta sizoweseso nsene kapi vana hara yimuna yawo ndi vana vawo va ka ruganene Jehova eparu lyawo mudima. (Num 3:45, 46; 18:15, 16) Ntani nsene ngombe zougara zi dipaga muntu, mwenyazo ga hepere kufuta sizoweseso yipo va dire kumudipaga. (Ex 21:29, 30) Nye muntu ogu nga dipaga mukwawo mowina kapi ngava mu pulisire a fute sizoweseso. (Num 35:31) Ntani somulyo po, Bibeli kwa demenena kosizoweseso esi ga futire Kristusa, apa ga lizamberere a fe, yipo a zowore vantu kononzo nokonomfa.​—Ps 49:7, 8; Mat 20:28; Efe 1:7.

T

• Talent.

  Kuna kara simaliwa sosinene po soVahebeli ntani nosimeteso sawo sosinene po. Aso ngasi vihi 34,2 kg. Talent zoVagereka kwa kere nunu ntani azo ngazi vihi koyiha 20,4 kg.​—1Hs 22:14; Mat 18:24.

• Tatarusi.

  MoMatjangwa goRugereka goSikriste, nkango ezi kwa tamba koukaro wokufana ngwendi dorongo, omu va zuguminine vaengeli ava va dilire kulimburukwa momazuva gaNowa. Nkangorugano zoRugereka tar·ta·roʹo (ezi azi tanta asi “kuzugumina moTatarusi”) ezi za kara mwa-2 Peturusa 2:4, kapi azi likida asi vaengeli “ava va zonene” kwa va zuguminine moTatarusi ezi va pulire vantu wokonomuhoko dapeke (awo kwa pulire asi Tatarusi kuna kara dorongo zokonhi zomundema, omu va kara vakarunga wokudira nonkondo). Nye azo kulikida asi Karunga kwa va zugumine mo meguru nokuvagusa yitumbukira yawo  ntani age kwa va tura moukaro womundema, va dire kudiva sitambo saKarunga. Mundema ogo kulikida hena eyi ngayi va horokera. Matjangwa kulikida asi awo ngava va zonagura po kumwe nomupangeli gwawo, Satana Muzonaguli. Yipo nye, Tatarusi kuna kara ukaro weswau wovaengeli ava va rwanesere Karunga. Awo kapi wa lifana ‘nekero lyere unene’ eli va tumbura mEhororo 20:1-3.

U

• Udigu wounene.

  Nkango “udigu” moRugereka kwa tamba koruguwo ndi ruhepo oru aru tundu koukaro ou tuna kuligwanekera nawo. Jesus kwa uyungire kuhamena “udigu wounene” ou ngau wiza moJerusarema ntani nou ngau gwana vantu komeho, apa nga ‘wiza nouyerere.’ (Mat 24:21, 29-31) Paurusa kwa tente asi Karunga nga hungika pokureta udigu wounene kovantu “ava va dira kudiva Karunga ntani nava ava dili kulimburukwa kombudi zongwa” zokuhamena Jesus Kristusa. Ehororo egaununo 19 kulikida asi Jesus yige nga pitisira nombunga dovakwayita vemeguru yipo va rwise “sikasama ntani vahompa vepevhu novakwayita vawo.” (2Te 1:6-8; Eho 19:11-21) Bibeli kulikida asi “emukurumbunga” lyovantu ngali ka paruka poudigu owo. (Eho 7:9, 14)​—Tara HARUMAGEDONI.

• Uhompa waKarunga.

  Nonkango edi kudiruganesa mokutamba koupangeli waKarunga, ou a pitisire Munendi Jesus Kristusa.​—Mat 12:28; Ruk 4:43; 1Ko 15:50.

• Uhungami.

  MoMatjangwa, azo kwa tamba koyininke eyi a tara Karunga asi yiwa, kuliza nomutaro gwendi gokuhamena yininke yoyiwa neyi yoyidona.​—Gen 15:6; De 6:25; Sef 2:3; Mat 6:33.

• Uhura wouzuni.

  Kwa tamba kosiruwo esi ngasi twaredesa kouhura wouzuni ndi kehagero lyoyininke eyi a pangere Satana. Awo kwa tamekere posiruwo sekaropo lyaKristusa. Jesus nga pangera vaengeli va ‘hangure wovadona kovahungami,’ nokuvazonagura po. (Mat 13:40-42, 49) Varongwa vaJesus kwa here kudiva apa ngasi tameka siruwo ‘souhura’ wouzuni. (Mat 24:3) Komeho a tengure meguru, age kwa tumbwidilire varongwa vendi asi age nga kara nawo dogoro posiruwo oso.​—Mat 28:20.

• Umpure.

  Kuna kara epuliro eli asi, muntu apa a fu, mpepo zendi kutwikira kuparuka ntani azo kuuyungisa vantu kupitira momuntu (ndi sininke) unene po ogu zina kuruganesa. Nkango zoRugereka phar·ma·kiʹa, ezi va toroka asi “kuruganesa umpure” azo kutanta asi “yikwaepangwe.” Nkango ozo kwa likwatakana noumpure morwa posiruwo sanare vantu ngava ruganesa yikwaepangwe mokuzigida nompepo donondona yipo va lihameke moyininke yourodi.​—Gar 5:20; Eho 21:8.

• Upongoki ndi kupongoka.

  Kuna kara sikara esi ga kara naso Jehova ogu ga kuhuka ntani ogu ga pongoka mwankenye ukaro. (Ex 28:36; 1Sa 2:2; Joh 17:11) Apa nkango ozo ava zi ruganesa kovantu (Maru 6:20; Yir 3:21), yininke (Rom 7:12; 11:16; 2Ti 3:15), mavango (Mat 4:5; Yir 7:33; Heb 9:1) ntani noyirugana (Ex 36:4), moRugereka ntani nomoRuhebeli kwa tamba kosininke esi sa likarera ndi esi va pongwera Karunga gokupongoka ndi kupongwera sininke mosirugana saJehova. MoMatjangwa goRugereka goSikriste, nonkango upongoki ntani “kupongoka” kwa tamba kukuhuka pamukaro.​—2Ko 7:1; 1Pe 1:15, 16.

• Uporofete.

  Kuna kara mbudi zokutunda kwaKarunga, yi kare asi kuna kuzidivisa ndi kuna zi gwana kupitira memoneko. Uporofete kwa kwatera mo hena erongo lyokutunda kwaKarunga, nompangera ndi mpanguro zokutunda kwaKarunga, ndi kudivisa kuhamena eyi ngayi ka horoka komeho.​—Mat 13:14; 2Pe 1:20, 21.

• Uzuni.

  Poyiruwo yimwe, nkango “uzuni” kwa tamba konkango zoRugereka ko′smos ezi azi tamba (1) kovantu, (2) omu yininke yina kugenda mouzuni, ndi (3) kovantu ava va ligusa ko kwaKarunga. (Joh 3:16; 17:5; 1Jo 2:15-17) Azo kwa zi ruganesa hena mokutamba konkango zoRugereka ai·onʹ, ezi azi tanta asi “epupi.” Nsene kuna kuziruganesa mokutamba konkango ai·onʹ azo kutamba “omu yina kugenda yininke yomouzuni kuliza nepupi lyongandi.”​—Mat 24:3; Maru 4:19; Rom 12:2; 1Ko 10:11.

V

• Vaengeli.

  Kwa tunda konkango zoRuhebeli mal·ʼakhʹ ntani zoRugereka agʹge·los. Nonkango odo nadinye kutanta asi “wokutwara mbudi,” nye azo kwa zi toroka asi  ‘vaengeli’ nsene kuna tamba koyisitwa yopampepo. (Gen 16:7; 32:3; Jak 2:25; Eho 22:8) Vaengeli kuna kara yisitwa yononkondo yopampepo eyi ga sitire Karunga komeho a site vantu. Awo kwa va tumbura hena moBibeli asi “vana vaKarunga,” ntani “nombungururu.” (De 33:2, NW; Job 1:6; 38:7; Juda 14) Awo kapi vava sita nevhuliko lyokuvhura kulireta, nye awo kwa va sitire nkenye ogu gelike. Sivaro sawo kwa pitakana mamiliyona efere. (Dan 7:10) Bibeli kulikida asi awo kwa kara nomadina gawo ntani noyikara yokulisiga, nye nampili ngoso awo kunyoka kuvakarera ntani kapi va hara kulitumbura madina gawo. (Gen 32:29; Ruk 1:26; Eho 22:8, 9) Awo kwa va hangura ntani kwa va pa yitumbukira yokulisiga-siga, kukwatera mo kukara pepi nosipundi saJehova souhompa, kutwara nombudi, kuvatera vakareli vaJehova vepevhu, kutengeka vantu ntani kukwatesa ko sirugana sokuzuvhisa mbudi zongwa. (2Vh 19:35; Ps 34:7; Mat 4:11; Ruk 1:30, 31; Eho 5:11; 14:6) Komeho, awo ngava ka kwatesa ko Jesus mokurwa yita yaHarumagedoni.​—Eho 19:14, 15.

• Vaepikuliya.

  Kuna kara vantu ava ngava kwama marongo gomulirongi gedina Epicurus (341-​270 B.C.E.). Awo kwa pulire asi nkenye muntu ga hepa kukondjera kulihafesa mwene.​—Yir 17:18.

• Vafalisayi.

  Kuna kara kambunga kovantu ava va hamenene koukareli woVajuda posiruwo sovapositoli. Awo kapi va tundire moruvharo rovapristeli, nye awo ngava demenene unene koVeta ntani nonompo. (Mat 23:23) Awo kapi ngava kwatesa ko nompo doVagereka ntani awo kwa kere nononkondo dokupangera vantu, morwa awo kwa lirongere Veta nonompo. (Mat 23:2-6) Vafalisayi vamwe kwa hamenene mosigongi somasimbi. Yikando yoyinzi awo ngava rwanesa Jesus morwa veta zEsabata, nonompo ntani morwa nga kara kumwe novafutisi womutero novananzo. Vafalisayi vamwe kwa ya kere Vakriste, kukwatera mo Sauru, gokoTaruso.​—Mat 9:11; 12:14; Maru 7:5; Ruk 6:2; Yir 26:5.

• Vakalidi.

  Kuna kara vantu ava va tunga oku gwa hagera mukuro gwaTigilisi ntani naEufurata. Sitata saUru oku ga tundire Abirahamu kwa kere sitata somulyo koVakalidi.​—Yir 7:4.

• Vakerubi.

  Kuna kara vaengeli ava va zeruka ntani awo kwa kara noyitumbukira yokulikarera. Awo kwa lisiga noVaserafi.​—Gen 3:24; Ex 25:20; Jes 37:16; Heb 9:5.

• Vakonentu.

  Vantu ava ava lirongo kuhamena omu ali gendi ezuva, kwedi nonombungururu yipo va pumbe eyi ngayi horoka komeho.​—Mat 2:1.

• Vamba.

  Kwa tamba kuteta sipapa koyilyo yomugara. Abirahamu novana vendi kwa va pangerere va va rugane yovamba. Nye Vakriste kapi va hepa kuvarugana yovamba. Azo hena kwa zi ruganesa mokufanekesa yininke.​—Gen 17:10; 1Ko 7:19; Fil 3:3.

• Vamede.

  Aro kuna kara rudi oru rwa tundire mwaMadayi, munwaJafeta. Awo kwa tungire momuramba gwaIran ogu gwa divikwire asi sirongo saMedia. Vamede nawo kwa kere moJerusarema poPentekoste momvhura 33 C.E.​—Yir 2:9.

• Vanomeni vahompa gwaRoma.

  Kuna kara mbunga zovakwayita woVaroma ava ngava takamesa hompa gwaRoma. Awo kwa kere nononkondo dokukwatesa ko hompa ndi dokumugusa mo mouhompa.​—Fil 1:13.

• Vapangeli wositata.

  Moyitata eyi ngava pangere Varoma, vapangeli owo yiwo ngava karere po epangero. Awo ngava tulisa po mbili mositata nokugendesa yimaliwa nokupangura ava ngava teza po veta ntani ngava tengeke ava ngava dili kusikisa mo veta.​—Yir 16:20.

• Varwanesi.

  Nkango zoRugereka (a·po·sta·siʹa) kwa tunda konkangorugano ezi azi tanta asi “kusikamena ure.” Nkangodina ezi kutanta asi “kusiga, kuzumba ndi kurwanesa.” MoMatjangwa goRugereka goSikriste nkango “varwanesi” kwa zi ruganesa mokutamba kovantu ava ava sigi ukareli wousili.​—Yis 11:9; Yir 21:21; 2Te 2:3.

• Vasadukayi.

  Kuna kara kambunga kovantu ava va hamenene koukareli woVajuda. Awo kwa kere vantu womulyo wonongawo novapristeli ntani awo kwa kere nononkondo koyininke eyi ngayi horoka kontembeli. Awo kapi ngava kwama nompo doVafalisayi ntani nayimwe hena eyi va pulire Vafalisayi. Awo kapi va pulire mevhumbuko ntani kapi va pulire hena asi vaengeli yipo va kara. Awo ngava rwanesa Jesus.​—Mat 16:1; Yir 23:8.

•  Vasamaliya.

  Pomuhowo nkango ozo kwa tembe koVaisraeli womouhompa womazimo murongo aga ga kere koMuzogo. Nye konyima zapa sitata saSamaliya va ya si fundire Vaasiliya momvhura 740 B.C.E, azo kwa tembe hena kovantu womarudi gapeke ava va retere Vaasiliya mositata oso. Momazuva gaJesus, nkango Vasamaliya kapi za tembe korudi ndi kombungapolitika, nye azo kwa tembe kovantu ava va hamenene koukarelikarunga ou wa kere mositata saSikemu ntani moSamaliya. Vantu womoukarelikarunga owo, kwa pulire yininke yokulisiga neyi va pulire vantu ava va hamenene koukarelikarunga woVajuda.​—Joh 8:48.

• Vasitoya.

  Kuna kara sikora zoRugereka zovalirongi ava va pulire asi muntu goruhafo, googu a paruka kuliza nounsitwe. Awo kwa pulire asi muntu gonondunge, kapi a zuvhu kukora ndi a lihafese.​—Yir 17:18.

• Veta.

  Nsene kuna zi tjanga zonene, azo kutamba koVeta zaMosesa ndi konobuke ntano dokuhova domoBibeli. Ano nsene kuna zi tjanga zonunu, azo kuvhura kutamba kwankenye veta ezi za kara moVeta zaMosesa ndi konompango.​—Num 15:16; De 4:8; Mat 7:12; Gar 3:24.

Y

• Yigava yonkenda.

  Ayo kuna kara yigava eyi ngava gava mokuvatera muntu ogu ana hepa evatero. Ayo kapi va yi vyukilira kuyitumbura moMatjangwa goRuhebeli, nye Veta zaMosesa kwa geve mavyukiso koVaisraeli omu nava pakera mbili vahepwe.​—Mat 6:2.

• Yihaheso.

  Kuna kara yininke eyi ava tura poyininke eyi vana duwu ndi moyikunwa yipo yi hahe. Ayo kuvhura kuyigusa koyininke eyi va duva nare. Yihaheso kwa yi ruganesa moBibeli mokutamba kononzo ndi kezonauko. Kwa yi ruganesa hena mokutamba koyininke eyi ayi kuru mokahore-hore.​—Ex 12:20; Mat 13:33; Gar 5:9.

• Yingondwe; Munayingondwe.

  Kuna kara uvera wosiponga ou au kara kosipapa. Yingondwe eyi va tumbura moMatjangwa, kapi ya lifana noyingondwe yomomazuva getu, morwa posiruwo sanare ayo kapi tupu ngayi kara kovantu, nye ngayi kara koyidwara ntani nomononzugo. Muntu ogu a vere yingondwe kumutumbura asi munayingondwe.​—Lev 14:54; Ruk 5:12.

• Yirwiso.

  Kuna kara yidwara eyi ngava dwara vakwayita. Ayo kuna kara; ekoli, mbayikisa zosivera, liva ntani silikandwiso.​—1Sa 31:9; Efe 6:13-17.

• Yitetu.

  Kuna kara yirugana eyi ava dili kurugana vantu mononkondo davene, nye awo kuyirugana nevatero lyaKarunga ndi lyoyisitwa eyi ya kara nononkondo. Nonkango “yitetu” ntani “yidiviso” pamwe kwa di tjanga kumwe moBibeli.​—Mat 11:20; Yir 4:22; Heb 2:4.

• Yitutumikidiso yedumba lyewa.

  Kuna kara manganganga gedumba lyewa ntani magadi gobalisemu, aga ava hwike kumwe yipo ga gave edumba lyewa. Yitutumikidiso eyi ngava ruganesa ponkongoronzugo nomontembeli, ngava yi rugana pokuvhonga kumwe yininke yine. Ayo ngava yi hwike posizambero sokuhwikira nzambo zedumba lyewa ngurangura ntani ngurova ngava yi hwikire monzugo zokupongoka. Ano mEzuva lyEfironkenda ayo ngava yi hwikire monzugo zokupongokerera. Ayo kwa fanekesere makanderero govakareli vaKarunga wovalimburukwi. Vakriste kapi va hepere kuyiruganesa.​—Ex 30:34, 35; Lev 16:13; Eho 5:8.

• Yiumurongo.

  Yiumurongo ndi noperesenda 10, kuna kara yigava eyi ngava gava unene po moukareli. (Mara 3:10; De 26:12; Mat 23:23; Heb 7:5) Kuliza noVeta zaMosesa, vantu ngava gava yiumurongo yomuzangu ntani yiumurongo yoyimuna eyi yina kuligwederera koVarevhi, yipo va va vatere. Varevhi ngava gava yiumurongo poyiumurongo eyi va gwene koVapristeli womorudi rwaArona va va vatere. Vantu ngava gava yiumurongo yimwe hena. Vakriste kapi va hepa kugava yiumurongo.

Z

• Zeusi.

  Kuna kara karunga gononkondo po povakarunga ava ngava karere Vagereka. MoLisitira vantu kwa gazarere asi Baranabasa yige Zeusi. Vantu kwa gwana matjango pepi naLisitira aga aga tanta asi “vapristeli vaZeusi” ntani “Zeusi karunga gezuva.” Sikepa esi ga genderere Paurusa apa ga tundire posirudi saMalita, kwa kere po efano lyovana vaZeusi. Awo kuna kara Castor naPollux, ava va kere mapange.​—Yir 14:12; 28:11.