Bibeli kuna kara mbudi ezi ga tjangera Karunga vantu navenye. Twa hepa kuzilironga yipo tu dive Mutjangi gwazo. (Johanesa 17:3; 2 Timoteusa 3:16) Kupitira moBibeli, Jehova Karunga kwa horora sitambo sendi kovantu ntani neyi nga ka rugana kevhu.—Genesis 3:15; Ehororo 21:3, 4.

Kwato hena buke ezi za kundama vantu ngwendi Bibeli. Azo kututumangeda tu honene yikara yaJehova ngwendi eharo ntani nonkenda. Azo kugava ehuguvaro nokuvatera vantu va lididimikire maudigu gomanene. Azo hena kuhorora yininke yomouzuni eyi ya dira kuliza nompango zaKarunga.—Episarome 119:105; Vahebeli 4:12; 1 Johanesa 2:15-17.

Bibeli kwa hovere kuzitjanga moRuhebeli, moRuarameya ntani moRugereka, nye ngesi azo kwa zi toroka momaraka gokupitakana 3 000. Kutunda kwanare, azo yizo buke va toroka po momaraka gomanzi nokuzigavera unene. Ya ha tu tetukisa morwa uporofete womoBibeli kwa tanta asi : “Ano mbudi zongwa ezi zoUhompa yizo tanko ngava hova kuzuvhisa mouzuni mudima, zi kare umbangi konomuhoko nadinye ntani nye ngau wiza uhura.”—Mateusa 24:14.

Morwa ose twa dimburura mulyo gombudi zomoBibeli, ose kwa tokora kutoroka Bibeli kuliza nomu va hovere kuzitjanga ntani nokuruganesa eraka lyoureru kuresa nokukwata egano. Yirongwa yokoAppendix “Nompango edi va ruganesere metoroko lyoBibeli,” “Eyi ya kara metoroko eli,” ntani “Omu twa zi gwana Bibeli” kwa zogera kuhamena malitjindjo geraka aga twa rundurura metoroko eli.

Ava va hara Jehova Karunga ntani nokumukarera kwa hara etoroko lyouhunga ntani lyoureru kukwata egano. (1 Timoteusa 2:4) Eyi yiyo twa toroka etoroko eli moRukwangali pokuruganesa Bibeli zEtoroko lyouzuni woupe. Tuna si huguvara asi one ngomu gwanena mo uwa pokuresa Matjangwa aga gokupongoka ngomu muna kukondja mu ’papare Karunga yipo mu mu gwane.’—Yirugana 17:27.