Mbilive zokuhova zaJohanesa 2:1-29
2 Vana vange wokuhara, ame kuna kumutjangera yininke eyi, yipo mu dire kuzona. Nye nsene pweli ogu ana kuzona, twa kara nomukwafi ogu ga kara naGuhya, age yige Jesus Kristusa ogu a rugana youhunga.
2 Age nzambo zononzo detu ezi azi tu gwanekedesa kumwe naKarunga, nye kapisi zononzo detu delike, nye hena dovantu navenye womouzuni.
3 Ose kuyilikida asi twa mu diva, nsene tu twikira kusikisa mo yipango yendi.
4 Ogu a tanta asi “ame na mu diva,” nye kapi a sikisa mo yipango yendi, age munayimpempa ntani usili mutupu momuntu gwangoso.
5 Nye ogu a sikisa mo nonkango dendi, kuyilikida asi age sili ga hara Karunga, monkedi zangesi yimo atu diva asi ose kwa kara mouumwe nage.
6 Nye ogu a tanta asi, age kwa kara mouumwe kumwe nage, ga hepa kutwikira kugenda ngamoomu nga gendi age.
7 Vakwetu wokuhara, ame kapi nina kumutjangera sipango sosipe, nye sipango sosikuru-kuru esi mwa zuvha kutunda ketameko. Sipango sosikuru-kuru esi, yiso nkango ezi mwa zuvha.
8 Ntani hena, ame kuna kumutjangera sipango sosipe, esi ga kweme ntani esi none muna kukwama, morwa mundema kuna kupita ntani uzera wousili una tameke nare kuminikira.
9 Ogu a tanta asi age kwa kara mouzera, nye age kwa nyenga mukwawo, age simpe momundema ga kara.
10 Ogu ga hara mukwawo, kwa kara mouzera ntani kwato yokumupundukisa.
11 Nye ogu ga nyenga mukwawo, age momundema ana kara ntani kuna kugenda momundema, age kapi ana diva oku ana kuza, morwa mundema gwa twiza meho gendi.
12 Vana vange wokuhara, ame kuna kumutjangera morwa nonzo deni va di mu dongwenena po morwa edina lyendi.
13 Ame kuna kumutjangera one vaguhya, morwa mwa mu diva ogu ga kere po kutunda ketameko. Ame kuna kumutjangera one vadinkantu wovagara, morwa mwa funda po mudona. Vana vange wokuhara, ame kuna kumutjangera morwa one mwa diva Guhya.
14 Ame kuna kumutjangera one vaguhya, morwa mwa diva ogu ga kere po kutunda ketameko. Ame kuna kumutjangera one vadinkantu wovagara, morwa mwa kara nononkondo ntani nonkango daKarunga kwa kara mweni, one hena kwa funda mudona.
15 Walye omu hara uzuni ndi yininke eyi ya kara mouzuni. Nkenye ogu ga hara uzuni, eharo lyaGuhya mwendi mutupu.
16 Yeeyi nayinye eyi ya kara mouzuni, yi kare asi edowo lyorutu ndi edowo lyomeho ndi kulikangangera yiweka yoge, kapi ayi tundu kwaGuhya, nye ayo kutunda mouzuni.
17 Ntani hena, uzuni kuna kuhaga po kumwe nomadowo gawo, nye ogu a sikisa mo mpango zaKarunga, nga kara dogoro narunye.
18 Vana vange wokuhara, esi siruwo souhura, one mwa yi zuvha asi nonkore daKristusa ngadi wiza, nye sinzi sawo va moneka nare, eyi yiyo yina kutuninkisa tu dive asi esi yiso siruwo souhura.
19 Awo kwa ligusa ko kwetu, morwa kapi va hamena kwetu, ngano asi awo kwa hamenene kwetu, ngano kapi va ligusa ko kwetu. Nye awo kwa ligusa ko kwetu, yipo yi lihorore asi kapisi navenye va hamena kwetu.
20 One kwa mu gwaveka ogu ga pongoka ntani namuvenye mwa kara nediwo.
21 Ame kapi nina kumutjangera asi morwa kapi mwa diva usili, nye morwa one mwa u diva ntani morwa mousili kapi amu tundu yimpempa.
22 Yilye munayimpempa, nani kapisi googu a patana asi Jesus yige Kristusa? Muntu ogo yige nye nkore zaKristusa, age kupatana Guhya ntani Muna.
23 Ogu a patana Muna, kapi ga kara naGuhya. Nye ogu a tambura Muna, kwa kara naGuhya.
24 Nye one kwaterereni kweyi mwa zuvha kutunda ketameko. Yeeyi nsene mu kwaterera kweyi mwa zuvha kutunda ketameko, ngomu kara mouumwe noMuna ntani ngomu kara mouumwe naGuhya.
25 Ntani hena, age kwa tu tumbwidira mwenyo gwanarunye.
26 Ame kuna kumutjangera yininke eyi, morwa poveli vamwe ava vana hara kumupukisa.
27 Ano morwa one Karunga kwa mu gwaveka nompepo zendi, mpepo ozo kwa kara mweni ntani kapi mwa hepa gokumuronga, nye Karunga kuruganesa mpepo zendi, a mu ronge yininke nayinye ntani erongo olyo usili kapisi yimpempa. Yipo nye, kareni mouumwe nage moomu za mu ronga mpepo asi yimo nomu yi rugana.
28 Vana vange wokuhara, kareni nye mouumwe nage, yipo asi apa ngava ka mu horora ngatu ka kare nemanguruko lyokuuyunga ntani yipo ngatu dire kukara nonomuga nokutunda ko kwendi pekaropo* lyendi.
29 Nsene mwa diva asi age muhungami, one mwa diva hena asi, nkenye ogu a rugana youhunga, munendi.
