Mbilive zokuhova zaJohanesa 3:1-24
3 Gazadareni ko keharo lyenene eli ga tu likida Guhya, pokututumbura asi ose vana vendi.* Ano ose vana vendi. Eyi yiyo wa dilira kutudiva uzuni, morwa awo kapi wa mu diva.
2 Vakwetu wokuhara, ose ngesi tu vana vaKarunga, nye simpe kapi va yi tu horwera asi ngapi omu ngatu ka fana komeho. Nye ose twa yi diva asi apa nga ka lihorora mwene, ngatu mu fana, morwa ngatu mu mona moomu ga kara.
3 Nkenye ogu ga kara nehuguvaro eli twa gwana kwendi, kulikuhura mwene, morwa age kwa kuhuka.
4 Nkenye ogu a zono kuteza veta, yeeyi nzo kutanta asi kuteza veta.
5 One hena mwa yi diva asi, age kwa mu horwera yipo a ya guse po nonzo detu ntani age kwato nzo.
6 Nkenye ogu ga kara mouumwe nage kapi a zono, morwa ogu a zono, kapi ga mu mona ndi a mu dive.
7 Vana vange wokuhara, va ha mu pukisa, yeeyi ogu a rugana youhunga kwa hungama, moomu ga hungama age.
8 Ogu a zono kumupangera Muzonaguli, morwa Muzonaguli kwa zona kutunda ketameko,* eyi yiyo va horowera MunwaKarunga, yipo a ya zonagure po yirugana yoMuzonaguli.
9 Vana vaKarunga kapi ava zono, yeeyi mpepo zokupongoka* kwa kara mwawo ntani awo kapi ava zono, morwa awo vana vaKarunga.
10 Apa yipo ava va dimbwilire vana vaKarunga nava woMuzonaguli: Ogu a dili kurugana youhunga nogu ga dira kuhara mukwawo, kapi ga hamena kwaKarunga.
11 Ezi yizo mbudi mwa zuvha kutunda ketameko asi, twa hepa kulihara-hara,
12 kapisi tu kare ngwendi Kaini ogu ga hamenene koMudona, makura ta dipaga mumbyendi. Yisinke ga mu dipagerere nani? Morwa yirugana yendi kwa kere yoyidona, nye yamumbyendi kwa kere yoyiwa.
13 Vakwetu, ya ha mu tetukisa kweyi wa mu nyenga uzuni.
14 Twa yi diva asi ose kwa kere ngwendi tuna fu, nye ngesi tuna kara nomwenyo, morwa twa hara vapuli vakwetu. Ogu ga dira kuhara mukwawo, kukara ngorooro monomfa.
15 Nkenye ogu ga nyenga mukwawo, mudipagi ntani mwa yi diva asi kwato mudipagi ogu nga ka gwana mwenyo gwanarunye.
16 Ose twa diva kuhamena eharo, morwa Jesus Kristusa kwa tu fira, yipo nye nose twa hepa kufira vapuli vakwetu.
17 Nsene asi pweli ogu ga kara noyuma, nye a nyoke kulikida eharo kwamukwawo ogu ana kuhepa, ngapi nye omu na tanta asi ga hara Karunga?
18 Vana vange wokuhara, walye omu tanta tupu asi mwa hara vakweni, nye omu yi likide moyirugana yeni asi mwa va hara kutundilira komutjima.
19 Apa yipo natu yi divira asi ose kwa hamena kousili nokuyipura asi Karunga ga tu hara,
20 nampili nomutjima detu di tu pe usima, twa hepa kudiworoka asi Karunga ga pitakana nomutjima detu ntani ga diva yininke nayinye.
21 Vakwetu wokuhara, nsene nomutjima detu kapi dina kutupa usima, ose kuvhura kuuyunga naKarunga twa hana woma,
22 ntani nkenye eyi ngatu mu hundira ngatu yi gwana, morwa ose kuna kulimburukwa yipango yendi nokurugana eyi a yi mu hafesa.
23 Ano sipango sendi sesi asi, twa hepa kupura medina lyaMunendi Jesus Kristusa nokulihara-hara, ngwendi moomu ga tu pangera.
24 Ntani hena, ogu a limburukwa koyipango yaKarunga kwa kara mouumwe naKarunga ntani Karunga kwa kara mouumwe nage. Ose twa yi diva asi twa kara mouumwe nage, kupitira mompepo zokupongoka ezi ga tu pa.
Nonkango dokonhi
^ MoRugereka asi “vana vaKarunga.”
^ Ndi “kutunda apa ga tameka.”
^ MoRugereka asi “mbuto.”
