Mbilive zokuhova zaJohanesa 5:1-21
5 Nkenye ogu ga pura asi Jesus yige Kristusa, age munwaKarunga ntani nkenye ogu ga hara Karunga, ga hara hena vana vaKarunga.
2 Nsene tu hara Karunga nokulimburukwa koyipango yendi, ose ngatu yi likida asi twa hara vana vendi.
3 Nsene asi twa hara Karunga ngatu limburukwa koyipango yendi ntani yipango yendi kapi ya kara udigu kuyisikisa mo,
4 yeeyi vana vaKarunga kufunda uzuni ntani ose twa funda uzuni, morwa twa kara nepuro.
5 Yilye gokuvhura kufunda uzuni, nani kapisi googu ga pura asi Jesus MunwaKarunga?
6 Jesus Kristusa kwa wizire nomema ntani nohonde, age kapi tupu ga wizire nomema gelike, nye kwa wizire nomema ntani nohonde. Mpepo zokupongoka kugava umbangi weyi, morwa azo usili.
7 Pwa kara yininke yitatu eyi ayi gava umbangi:
8 mpepo zokupongoka, mema ntani honde, yininke eyi yitatu kugava umbangi umwe tupu.
9 Nsene tu tambura umbangi wovantu, twa hepa hena kutambura umbangi waKarunga ou wa pitakana. Morwa Karunga kuna kugava umbangi kuhamena Munendi.
10 Muntu ogu ga pura mwaMunwaKarunga, kwa pungura eyi ga mu tantera Karunga momutjima. Muntu ogu ga dira kupura mwaKarunga, age kutanta asi Karunga yimpempa, morwa age kapi ga pura moumbangi ou a gava Karunga kuhamena Munendi.
11 Ou yiwo umbangi ga gava Karunga, age kwa tu pa mwenyo gwanarunye, ano ose kugwana mwenyo ogo kupitira mwaMunendi.
12 Ogu a tambura MunwaKarunga, nga ka gwana mwenyo ogo, ogu a dili kutambura MunwaKarunga kapi nga ka gu gwana.
13 Ame kuna kumutjangera yininke eyi, yipo mu dive asi mwa kara nehuguvaro lyomwenyo gwanarunye, one ava mwa pura medina lyaMunwaKarunga.
14 Ano ose twa mu huguvara asi, age nga tu zuvha nsene tu mu hundira yuma kuliza nompango zendi.
15 Ano nsene twa yi diva asi, age kutuzuvha apa atu mu hundire nkenye eyi, twa yi diva asi ngatu gwana nkenye eyi tuna kuhundira morwa yige tuna kuyihundira.
16 Nsene gumwe a mona mukwawo kuna kutura nzo ezi azi dili kutwaredesa konomfa, a mu kanderere po, makura Karunga nga mu pa mwenyo. Eyi kwa tamba kovantu ava ava tura nzo ezi azi dili kutwaredesa konomfa. Nye pozili nzo ezi azi twaredesa konomfa. Ame kuna kumutantera asi, mwa ha kanderera po muntu ogu a tura nzo zangoso.
17 Yirugana nayinye yoyidona nzo, nye pwa kara nzo ezi azi dili kutwaredesa konomfa.
18 Ose twa yi diva asi vana vaKarunga kapi ava tura nzo ntani mokumona asi MunwaKarunga kuvatakamesa, mudona kapi ta vhuru kuvakwata.
19 Ose twa yi diva asi ose kwa hamena kwaKarunga, nye uzuni mudima kwa kara mepangero lyomudona.
20 Ose twa yi diva asi MunwaKarunga kwa wiza ntani age kwa ya tu pa nondunge, yipo tu dive Karunga gosili. Ntani ose kwa hamena kwaKarunga gosili, kupitira mwaMunendi Jesus Kristusa. Age yige Karunga gosili ntani yige a gava mwenyo gwanarunye.
21 Vana vange wokuhara, likareni ure noyikarunga yoyimpempa.*
Nonkango dokonhi
^ Ndi “mafano.”
