Mbilive zokuhova zaPeturusa 1:1-25
1 Mbilive ezi kuna kutunda kwaPeturusa, mupositoli gwaJesus Kristusa, zi ze kovanayirongo, ava va lihanena moPontusi, Garata, Kapadokiya, Asiya ntani moBitiniya. Awo kwava horowora
2 kuliza nomu ga yi harera Karunga Guhya ntani kwa va pongora nompepo, yipo va limburukwe ntani nokuvasampera honde zaJesus Kristusa:
Ngano nkenda zaKarunga zonene nombili zi mu vhukire.
3 Karunga GuhyaHompa gwetu Jesus Kristusa va mu hamberere, morwa nkenda zendi zonene, age kwa tu ninka va tu hampurukurure, yipo ngatu kare nehuguvaro lyanarunye. Ose kwa kara nehuguvaro eli, morwa Jesus Kristusa kwa mu pindwire koufe.
4 Karunga ku mu pa upingwa ou ava dili kuvhura kuzonagura, age kwa u mu tulikira meguru
5 one ava a takamesa Karunga kononkondo dendi morwa mwa kara nepuro, yeeyi Karunga kuna kumutakamesera ezoworo eli nga horora posiruwo souhura.
6 Eyi kumuninkisa mu hafe unene, nampili ngomu yina kara asi pokaruwogona tupu, ayo mulyo asi mu guve morwa maudigu gokulisiga-siga aga muna kupita,
7 yipo epuro lyeni eli va heteka ngali mu ninkise va mu kangange nokumufumadeka unene mosiruwo esi Jesus Kristusa ngali horora mwene. Epuro lyeni eli kwa kara nomulyo unene kupitakana ngorodo ezi azi zonauka apa ava zi pitisa momundiro.
8 Nampili ngomu mwa dira kumumona, one kwa mu hara. Nampili ngomu muna kudira kumumona ngesi, one kuna kulikida epuro mwendi ntani one muna kara noruhafo rokudira kuvhura kutanta,
9 morwa one kwa kara nehuguvaro asi epuro lyeni ngali parura nomwenyo deni.
10 Vaporofete ava va udisa kuhamena nkenda zaKarunga zonene ezi va mu pa, kwa likwamberere nokukonakona kuhamena ezoworo eli.
11 Nare-nare, Karunga kwa ruganesere nonkondo* dendi ava tantere asi Kristusa nga hepa makura ngava mu zerure, awo kwa kondjere unene yipo va dive eyi ngayi horokera Kristusa nosiruwo esi ngayi horoka.
12 Karunga kwa horwerere kovaporofete asi nyone va ruganenene kapisi vene. Awo kwa tjenge kuhamena eyi va mu udisira ntani one mwa zuvha kuhamena yininke eyi kupitira mwava va mu udisilire mbudi zongwa nevatero lyompepo zokupongoka ezi va mu tumina kutundilira meguru. Vaengeli kwa hara unene asi va kwate egano yininke eyi.
13 Yipo nye, wapaikireni nondunge deni sirugana sosidigu, vangarareni unene nokuhuguvara monkenda zaKarunga zonene ezi ngava mu pa apa nga horoka Jesus Kristusa.
14 One ngesi mu vana vaKarunga ava ava limburukwa kwendi, hagekeni kukwama madowo aga mwa kere nago apa mwa dilire kumudiva,
15 kareni muna pongoka moukaro weni naunye, ngwendi Mupongoki ogu ga mu zigida,
16 yeeyi kwa tjanga asi: “Mwa hepa kupongoka, yeeyi ame kwa pongoka.”
17 Nsene one kuna kukanderera kwaGuhya ogu a pangura ga hana mpongo nkenye ogu kuliza noyirugana yendi, yirugana yeni yi likide asi one kwa tjira Karunga, siruwo sosisupi esi muna kuparuka mouzuni ou.
18 Yeeyi mwa yi diva asi kapi va mu mangurura* noyininke eyi ayi zonauka, nosisiliveli ndi ngorodo, moukaro weni wa hana sikwafa ou mwa pinga kozinyakurweni.
19 Nye one kwa mu zowora nohonde zondiro zaKristusa, ezi za kara ngwendi zonzwigona za hana sipo ndi sivadi.
20 Karunga yige ga mu horowora, awo uzuni simpe nokuusita si, nye age kwa ya monekere poyiruwo youhura mwarweni.
21 Mwendi yimo mwa pulira mwaKarunga ogu ga mu pindwire koufe nokumuyererepeka, yipo mu pure nokuhuguvara mwaKarunga.
22 One kwa likuhura nyamweni morwa kulimburukwa kousili, eyi yiyo mwa harera vakweni neharo lya hana uyilipaki, yipo nye lihara-hareni unene kutundilira komutjima.
23 One kapi va mu hampurukurura kombuto* ezi azi fu, nye kombuto ezi azi karerere kupitira mononkango edi adi karerere daKarunga gomunamwenyo.
24 Yeeyi etjangwa kwa tanta asi: “Vantu navenye kwa kara ngwendi wayi, ano efumano lyawo nalinye kwa kara ngwendi mbya zowayi, wayi kufa, makura mbya tazi gu ko,
25 nye nonkango daJehova ngadi karerera.” Ano “nonkango” edi yido mbudi zongwa ezi va mu udisira.
Nonkango dokonhi
^ Ndi “mpepo zokupongoka.”
^ MoRugereka asi “zowora.”
^ Kwa tamba mbuto ezi azi vhuru kuvhara.
