Mbilive zokuhova zaPeturusa 2:1-25
2 Nyokeni udona naunye noyimpempa nouyilipaki nokunyenena yininke ntani kagoma mbetakuvali.
2 Kareni ngwendi vakeke ava va hara unene kuzamwa masini, pokuhara unene masini-sini gononkango daKarunga, yipo ngomu kure mwado ngava mu parure,
3 yeeyi one mwa limonena nkenda zaHompa.
4 Apa omu tambura ogu ga kara ngwendi emanya lyomwenyo eli va nyoka vantu, nye Karunga kwa mu horowora ntani age mulyo kwendi,
5 none nyamweni kukara ngwendi mamanya gomwenyo aga vana kutungisa etungo lyopampepo mu kare vapristeli wokupongoka, yipo mu zambe nonzambo dopampepo edi a tambura Karunga kupitira mwaJesus Kristusa.
6 Yeeyi etjangwa kwa tanta asi: “Tareni! Ame kuna kutura moSiyoni emanya eli na horowora, emanya lyemekovhu* eli lya kara nomulyo, ano ogu a likida epuro mwalyo kapi nga swauka.”
7 Yeeyi kweni age mulyo, morwa one vapuli; nye kwava va dira kupura, etjangwa kwa tanta asi “emanya eli va zumbire vatungi, yilyo lya ya kara emanya lyemekovhu”*
8 ntani asi “emanya lyokupundukisa ntani lyokuhandukisa.” Awo kuna kupunduka morwa kapi ava limburukwa kononkango daKarunga. Eyi kwa va ndindira kutunda kwanare.
9 Nye “one kwa hamena komuhoko ogu va horowora, one mbunga zovahompa ava va kara asi vapristeli, one kwa hamena komuhoko gokupongoka, Karunga yige ga mu horowora mu kare vantu vendi, yipo mu udisire nkenye ogu kuhamena nkenda zaKarunga,” age kwa mu horowora mo momundema, yipo mu wize mouzera wendi wokutetura.
10 Yeeyi pomuhowo one kapi mwa kere vantu vaKarunga, nye ngesi muna kara vantu vaKarunga; one kapi va mu likidire nkenda, nye ngesi kuna kumulikida nkenda.
11 Vakwetu wokuhara, tani mu korangeda ngovageni novanayirongo, mu twikire kunyokera po madowo gopanyama aga aga ru mweni.
12 Kareni nonkareso zongwa mokatji konomuhoko, yipo asi pokumurundira asi one kurugana yininke yoyidona, ngava limonene yirugana yeni yoyiwa, yipo ngava yererepekere po Karunga mezuva eli nga ya konakona yininke.
13 Ruganeni eyi ga hara Hompa, pokulimburukwa kovantu ava ga tura po va pangere, yi kare asi hompa ogu ga mu pita,
14 ndi nguuru ogu va tuma yipo a ya tengeke navenye ava ava rugana udona nokuyapandadeka ava ava rugana uwa.
15 Yeeyi Karunga kwa hara asi mu rugane uwa yipo mu mweneke nonkango domawoko-woko dovantu wovagova.
16 Kareni ngwendi vantu wokumanguruka, mwa ha ruganesa emanguruko lyeni ngompito mokurugana yininke yoyidona, nye kareni ngovapika vaKarunga.
17 Omu fumadeke vantu navenye, hareni vapuli vakweni mouzuni mudima, tjireni Karunga, omu fumadeke hompa.
18 Vapika ava limburukwe kovahekuru vawo nefumadeko, kapisi kwava wovawa wombili, nye noku kwava woukenya.
19 Yeeyi Karunga kuhafera ogu a kondjo a kare nezwi lyewa lyokomutjima kwendi, nokulididimikira maudigu* ntani nokumuhepeka age ga hana usima.
20 Uwa musinke nye wa kara po mokulididimikira kukutoonena usima ou wa rugana? Nye Karunga kuyihafera apa o lididimikire maudigu morwa kurugana uwa.
21 Eyi yiyo va mu zigidira, morwa naKristusa nage nyone ga hepera, age kwa mu sigira sihonena sendi yipo mu si kwame.*
22 Age kapi ga tulire nzo, ntani mokana kendi kapi nga mu tundu yimpempa.
23 Apa ngava mu swaura, kapi nga ninki asi nage a va swaure. Apa va mu hepekere, kapi ga va tjilisire, nye age kwa ligeve mwene kogu a pangura mouhunga.
24 Age kwa simba nonzo detu morutu rwendi apa va mu pamparere kositji, yipo ngava tu mangurure kononzo detu ntani ngatu paruke tu rugane youhunga. Ano “yironda yendi yiyo ya mu verura.”
25 Yeeyi one kwa kere ngwendi nonzwi dokuzumbana, nye ngesi one mwa tengura komusita nomutakamesi gonomwenyo* deni.
Nonkango dokonhi
^ Ndi “emanya lyomohuke.”
^ Ndi “emanya lyomulyo po.”
^ Ndi “ruguwo; kukora.”
^ MoRugereka asi “mu kwame monompadi dendi.”
^ Ndi “geparu.”
