Mbilive zokuhova zaPeturusa 3:1-22
3 One vakadi, omu limburukwe kovagara veni, yipo asi nsene kapi ava limburukwa nonkango daKarunga, ngazi va tezwilise nkareso zeni mwa hana kuuyunga,
2 morwa awo ngava limonena nkareso zeni zoukuhuki nefumadeko lyeni lyenene.
3 Maliwapaiko geni ga ha kara gokontunda, eyi kwa kwatera mo malitakero gonohuki ntani kudwara ngorodo ndi yikoverero yondiro,
4 nye aga kare gomuntu gomonda gomomutjima, gonkareso zokulitura zougomoki, maliwapaiko gangesi kapi aga zonauka po ntani Karunga yigo a tara asi mulyo.
5 Yeeyi posiruwo sanare vakadi wokupongoka ava va huguvarere mwaKarunga yimo ngava liwapaike monkedi zangesi, awo ngava limburukwa kovagara vawo
6 ngwendi moomu tupu Sara ga limburukwire Abirahamu nokumutumbura asi hompa gwendi. Ano one vana vendi, nsene mu twikira kurugana uwa nokudira kutjira yuma.
7 One vagara, none mwa hepa kudiva* vakadi veni, yipo mu dive omu nomu vhura kuvatekura nawa. Fumadekeni vakadi veni ngamoomu omu pakere mbili sipako esi asi tauka usimbu, yeeyi nawo ngava ka pinga kumwe none eparu morwa nkenda zaKarunga zonene ntani yipo yi dire kukondera Karunga mokupurakena komakanderero geni.
8 Mokuhulisa, namuvenye lizeni momagazaro, omu hepe kumwe, omu lihara-hare neharo lyosiumbya, omu kare nonkenda ntani omu linunupike.
9 Mwa ha lirugwidira udona noudona ndi mu liswaure-swaure. Nye omu liruganene uwa, yeeyi eyi yiyo va mu zigidira, yipo ngomu ka gwane mauwa.
10 Yeeyi kwa tjanga asi “nkenye ogu ana hara kuhafera eparu nokuparuka eparu lyewa, ga hepa kutakamesa eraka lyendi koudona ntani ga ha uyunga yimpempa.
11 A nyokere po yininke yoyidona ntani a rugane yoyiwa, a papare mbili ntani a zi kondjere.
12 Yeeyi meho gaJehova kwa tara kovahungami, ntani matwi gendi kupurakena komalikwambero gawo, nye Jehova kwa tungwira mugongo gwendi kovantu ava ava rugana yininke yoyidona.”
13 Yilye ogu nga mu rugana yoyidona, nsene mu kondjera kurugana uwa?
14 Nampili mu hepe morwa kurugana youhunga, one vantu woruhafo. Mwa ha tjira* eyi ava tjira vantu ndi asi mu kare nosinka.
15 Nye fumadekeni Kristusa ngaHompa monomutjima deni, omu liwapaikire nkenye apa kulimburura nkenye ogu ana kumupura kuhamena ehuguvaro eli mwa kara nalyo, nye omu yi rugane nougomoki ntani nefumadeko lyenene.
16 Omu kare nezwi lyewa lyokomutjima, yipo asi ava ava mu rundire mononkedi dokulisiga-siga ngava li fe nomuga, morwa nkareso zeni zongwa ngovarongwa vaKristusa.
17 Nsene asi Karunga ana yi pulisire, hansa nsene mu hepa morwa kurugana yoyiwa, mevango lyokuhepa morwa kurugana udona.
18 Yeeyi Kristusa kwa fira nonzo detu pwarumwe tupu. Age muntu gomuhungami ogu ga fira vantu wokudira kuhungama, yipo a mu kwatakanese naKarunga. Age kwa fire norutu ropanyama, nye kwa mu pindwire norutu ropampepo.
19 Age kwa zire norutu oru a ka udisire vaengeli ava va kere modorongo,
20 ava va dilire kulimburukwa apa Karunga ga ndindilire nedidimiko momazuva gaNowa, alyo emuwato kuna kulitunga, omu vantu wovasesu, kutanta asi vantu ntantatu, vava parwilire koruhanzo.
21 Sihorokwa esi kwa fanekesa ekuho eli lina kumuparura (kapisi asi likuhwe ko ediro korutu rweni, nye yipo mu likwambere kwaKarunga a mu vatere mu kare nezwi lyewa lyokomutjima) kupitira mevhumbuko lyaJesus Kristusa.
22 Age kwa za meguru yiyo ga ka hingira korulyo rwaKarunga, ntani vaengeli nomapangero novanankondo kwa va tura mepangero lyendi.
Nonkango dokonhi
^ Ndi “kugazadara ko; kukwata egano.”
^ Ndi nampo asi “walye omu tjira matjiliso gawo.”
